Read ngakarimojong Yoa. 16 Bible Online

Yoa. 16 - ngakarimojong bible

Yoa. 16

¹“Adau ayoŋ alimun ŋakiro ŋun daadaŋ, ikotere nyioliyosi iyes ananupit kus.

²Ikiritarete ikes iyes alosinagogae; kire ebuni apaki ŋina ikiaryata ŋituŋa iyes ebasi kori ikitiyae ŋuna ecamit Akuj.

³Itiyaete ikes ŋun, anerae nyeyenuna ikes Papa kori ayoŋ.

⁴Nai akalimok ayoŋ iyes ŋakiro ŋun, ikotere ani apaki ŋina itiyakinotor neni kus, totamut atemar aris ayoŋ kakalimok iyes. “Nyelimokina ayoŋ iyes ŋakiro ŋun anakisyakinet, anerae ikirukit iyes ka ayoŋ.

⁵Nai tokona aboŋori ayoŋ neni a ŋolo ekeyakuunit ayoŋ, nai emam iyes ipei daŋ ŋini ekeŋisi ayoŋ tema, ‘Ai ilosi iyoŋ?’

⁶Aŋuna tokona adaunia ayoŋ alimokin iyes ŋun daadaŋ, eyaloloŋ ŋikusitai nooi.

⁷Nai akalimokini ayoŋ iyes ŋuna a kire atemar, ikijoikini iyes kalot ayoŋ, anerae pa kalot ayoŋ aneni kus, nyebuni ekeŋarakiniton neni kus. Nai kalot ayoŋ, eyakuuni iŋes neni kus.

⁸Ani edoluni iŋes, itunupi ŋituŋa ŋulu ka akwap ŋuna ka asecit ka ŋuna ka akiyookino, ta ŋuna ka atubokino.

⁹Itunupi ŋuna ka asecit, anerae nyakanupito ikes ayoŋ.

¹⁰Itunupi ŋuna ka akiyookino, anerae alosi ayoŋ neni a Papa, nyikianyuwasi nabo.

¹¹Itunupi ŋuna ka atubokino, anerae adaun ekepukan ŋolo ka akwap a na atubokin.

¹²“Eyakasi ŋakiro ŋuna alalak ŋuna acamit ayoŋ alimokin iyes, nai nyipedorete atitinyikin.

¹³Nai ani ebuni Etau ŋolo irworo ŋuna a kire, ikiyoori iyes nakiro daadaŋ ŋuna a kire; anerae nyirwori iŋes aŋuna ka apedor keŋ bon, nai ebuni iŋes akirwor ŋuna iirarit, nabo ikilimokini iyes ŋuna epote.

¹⁴Eketopoloori iŋes ayoŋ, anerae ebuni iŋes akijaar ŋuna kaŋ, itolimok iyes.

¹⁵Ŋinibore daadaŋ eyakar Papa kaŋ, erae ŋini kaŋ, iŋes nai alimunitor ayoŋ atemar, ebuni iŋes akijaar ŋuna kaŋ, itolimok iyes.

¹⁶“Apaki adio cicinyikianyuwarete ayoŋ nabo; apaki adiocici ekaku, ikianyuwarete ayoŋ nabo.”

¹⁷Kiŋitanaros ŋikasyomak keŋ ŋice ebasi, “Okoe! Nyo mono apolou ŋina a ŋakiro a ŋun? Ikilimok iŋes iwon atemar, ‘Apaki adiocici nyikianyuwarete ayoŋ nabo; apaki adiocici ekaku, ikianyuwarete ayoŋ nabo;’ ka daŋ abala, ‘Anerae alosi ayoŋ neni a Papa.’

¹⁸Nyo mono tokona apolou ŋina ka akirot a ŋina ebala iŋes ‘Iwadiocici’. Ikikuruwo apolou ŋina a ŋakiro a ŋuna irworo iŋes!”

¹⁹Ayeni Yesu atemar acamito ikes akiŋit iŋes ŋakiro ŋun. Aŋun, tolimok ikes tema, “Ikwa ŋuna iŋitanarosi iyes alokidiŋ kus ŋuna alimunit ayoŋ atemar, ‘Apaki adio cicinyikianyuwarete ayoŋ nabo; apaki adio ciciekaku, ikianyuwarete ayoŋ nabo’ a?

²⁰Akalimokini ayoŋ iyes kire atemar, ipote iyes akigworo ka akiwolol, nai elelyani akwap nooi; ipote iyes akiyaloloŋ, nai ibelekin akiyaloloŋ kus toruwor alelyan.

²¹Iyaloloŋi aberu apaki ŋina eryebakinor, anerae adol akeepaki ŋina idounio; nai ani kedau iŋes akidoun, imuryakini iŋes aryeba, anerae elelyani iŋes akidoun ikoku nakwap.

²²Ikote nenipei ŋakiro aneni kus: iyaloloŋete iyes tokona, nai akaanyuni ayoŋ iyes nabo, ido tolelyana ŋitai kus. Emam idiotuŋanan elemari alelyan ŋin aneni kus.

²³“Ani ŋina edolunio Akoloŋit ŋin, emam idiobore ipote iyes akiŋit ayoŋ. Nai akalimokini ayoŋ iyes kire atemar, ibore daadaŋ ŋini iŋitasi iyes alokiro kaŋ, ebuni Papa kaŋ ainakin iyes.

²⁴Akitodol tokona nyiŋita iyes idiobore alokiro kaŋ; kiŋita iryamunete, ikotere alelyan kus ilelebikin.

²⁵“Erwor ayoŋ ŋakiro ŋun daadaŋ a ŋakitadapeta. Ebuni apaki ŋina nyerworya ayoŋ a ŋakitadapeta, nai abuni akisileerekin iyes Papa.

²⁶Akoloŋit ŋin, ipote iyes akiŋita alokiro kaŋ, nai nyakalimokinit ayoŋ iyes atemar ekelipakini iyes Papa kaŋ;

²⁷anerae ikimina iyes Papa elope. Ikimina iŋes iyes, anerae ikiminasi iyes ayoŋ ka inupito atemar abunit ayoŋ aneni a Papa.

²⁸Abu ayoŋ aneni a Papa, abu nakwap, nabo aesikini ayoŋ akwap, oboŋo neni a Papa.”

²⁹Ido tolimokis ŋikasyomak iŋes temasi, “Abe bo tokona nyeriŋa iyoŋ irworo a ŋakitadapeta, nai ileereete ŋakiro kon.

³⁰Ikiyeni tokona isua atemar iyeni iyoŋ ŋakiro daadaŋ, iŋes nai nyiitanitor idiotuŋanan akiŋit iyoŋ akirot. Ikitunupa nu isua atemar, ibunit iyoŋ aneni ka Akuj.”

³¹Toboŋok Yesu ikes tema, “Inupa kire iyes tokona a?

³²Ebunit apaki, kire adolu apaki ŋina ikielarere iyes, ŋina elosyo ŋinituŋanan lore keŋ, okoesikin ayoŋ bon; nai nyedoŋi ayoŋ bon, anerae ikirukit Papa ka ayoŋ.

³³Akalimok ayoŋ iyes ŋun, ikotere toryamut iyes ekisil alotooma kaŋ. Ikiteryamuni akwap iyes ŋican, nai toena ŋitai! Elou ayoŋ akwap.”