Read ngakarimojong Yoa. 18 Bible Online

Yoa. 18 - ngakarimojong bible

Yoa. 18

¹Kedau Yesu akilip ŋin, toloto iŋes ka ŋikeekasyomak ekekwaye aŋolol Kidron. Ayai nen emanikor ŋolo apotu Yesu ka ŋikeekasyomak tolomasi.

²Ayeni Yuda ŋolo alukinon akibois ŋin, anerae eryamunun Yesu ka ŋikasyomak keŋ nen ŋarwa ŋuna alalak.

³Toriko Yuda ŋasigarya ŋuna a Ŋiromanin ka ŋiketeok Akai ka Akuj lomanikor. Eakito ŋisacaradotin ŋulu apolok ka Ŋiparisayon ikes. Atiŋito ikes ŋiboro ŋulu ke ejiye ka ŋitaae ta ŋagilae.

⁴Ayeni Yesu ŋakiro daadaŋ ŋuna itiyakinio neni keŋ, kikomau kiŋaren kec, kiŋit tema, “Ŋae iwarito iyes?”

⁵Toboŋokis ikes temasi, “Yesu ŋolo a Nasaret.” Tolimok Yesu ikes tema, “Ayoŋ lo!” Awuasi Yuda ŋolo alukinon ka ikes.

⁶Ani kedau Yesu alimun ebe, “Ayoŋ lo,” kikutukutoosi ikes, kibusokinos kwap.

⁷Kiŋit Yesu ikes nabo tema, “Ŋae iwarito iyes?” Temasi ikes, “Yesu ŋolo a Nasaret.”

⁸Tolimok Yesu ikes tema, “Adau ayoŋ alimokin iyes atemar ayoŋ lo. Ani nai kerae ayoŋ ikiwarito iyes, kimyekisi ŋikilyok lu toloto.”

⁹(Arae ŋun akisiyookinio ŋakiro ŋuna sek alimunit iŋes ebala, “Papa, mam alokidiŋ ŋulu ibu iyoŋ ikiinak ayoŋ ŋini etooliyo ayoŋ.”)

¹⁰Abu Simoni Petero ŋolo ayakar atum, kitel epito ŋolo ke Esacaradoti a ŋolo Apolon nooi nakit ŋina aloteten, totubo. (Arae ekiro ke epito a ŋol Maliko.)

¹¹Tolimok Yesu Petero tema, “Kinyakak atum kon nakuraro! Itami iyoŋ atemar nyamasi ayoŋ ekopo ŋolo a ŋican ŋolo akainaki ayoŋ Papa kaŋ lo a?”

¹²Apotu ŋasigarya ŋuna a Ŋiromanin ka ekapolon kec ta ŋiketeok Akai ka Akuj ŋulu a Ŋiyudayan kikamut Yesu toena.

¹³Torikosi mono iŋes neni ka Anas, anerae arae Anas ekamuran a Kaipa a ŋolo arae Esacaradoti ŋolo Apolon nooi alokaru a ŋol.

¹⁴Arae Kaipa sek aris kicoco ŋikarikok ŋulu a Ŋiyudayan atemar, ejok epeikile totwan aŋuna a ŋituŋa.

¹⁵Kiwuapakis Simoni Petero ka ecekasyoman Yesu. Ayeni Esacaradoti ŋolo Apolon nooi ekasyoman ŋol; aŋun, abu iŋes torukosi ka Yesu tari nenilapat ka akai a ŋina ke Esacaradoti a ŋol,

¹⁶towuoi Petero alokiŋa alodiye epuke. Toboŋo nai ekasyoman ŋolo ayenen ka Esacaradoti ŋolo Apolon nooi, kisirwor apese ŋina eten epuke, ido yau Petero tooma.

¹⁷Kiŋit apese ŋin Petero tema, “Meere iyoŋ daŋ epei alokasyomak ke ekile a ŋol a?” Toboŋok Petero tema, “Meere.”

¹⁸Aŋuna alilimyo akwap, kinokakis ŋiketiyak ka ŋiketeok akim, towua kirikaut. Kiyoto nai Petero akiwuaŋar ka ikes.

¹⁹Kiŋitiŋit esacaradoti ŋolo apolon Yesu ŋuna a ŋikasyomak keŋ ka ŋuna ka akitatam keŋ.

²⁰Toboŋok Yesu iŋes tema, “Erwor ayoŋ lotuŋa daadaŋ, emam ŋakiro ŋuna abu ewua; abu ayoŋ jwi jwi etatam alosinagogae ka alo Kai ka Akuj, aneni ecunanakin Ŋiyudayan daadaŋ. Emam akirot alimu ayoŋ ewuait.

²¹Nyo nai tokona ikiŋisiŋisitor iyoŋ ayoŋ? Kiŋit ŋituŋa ŋulu apotu kiirasi ŋuna abu ayoŋ erwor; eyenete ikes ŋakiro ŋuna abu ayoŋ erwor.”

²²Ani kedau Yesu alimun ŋakiro ŋun, abu epei alokidiŋ ŋiketeok kibap iŋes tema, “Ikokini iyoŋ irworo neni ke esacaradoti a ŋolo apolon ikoŋina ai?”

²³Toboŋok Yesu tema, “Ani kalimunit ayoŋ ŋuna aronok, kiteyenik ŋituŋa lu daadaŋ neni abala ayoŋ. Ani kerworit ayoŋ ejok, kaanukiro bo ikibapya iyoŋ ayoŋ?”

²⁴Kiyakiya nai Anas Yesu eroko erocitae neni a Kaipa, a ŋolo arae Esacaradoti ŋolo Apolon nooi.

²⁵Ariŋa Petero ewuoi iwuaŋa. Kiŋita ŋuluce iŋes temasi, “Meere iyoŋ daŋ epei alokidiŋ ŋikasyomak keŋ a?” Nai topeg Petero ŋun tema, “Meere.”

²⁶Abu epito epei ŋolo ke Esacaradoti a ŋolo Apolon nooi, ŋolo arae eyenet ke ekile a ŋolo atubori Petero akit, kiŋit Petero tema, “Pa ekeŋolikinit ayoŋ iyoŋ ka iŋes alomanikor a?”

²⁷Topeg nabo Petero ŋun. Ŋinapeipaki toruuni ekokoroit.

²⁸Ani taparacu iwali akwap, torikosi ikes Yesu alokai a Kaipa tari kai ŋina apolon ŋina ke ekapolon a Ŋiromanin, a ŋolo anyaritae Pilato. Nyelomasi ŋikarikok ŋulu a Ŋiyudayan tooma akai ŋin, anerae pa acamito ikes amunaar asegis kec aŋuna ka akimuja ŋasuban ŋuna a Paska.

²⁹Aŋun, abu Pilato toloma neni ayakasi ikes, kiŋit tema, “Anukiro isitakinitotor iyes ekile lo?”

³⁰Toboŋokis ikes temasi, “Kerae nyitiyat ekile lo ŋuna aronok, pa kikipotokinit isua iŋes neni kon.”

³¹Tolimok Pilato ikes tema, “Yaasi iyes ŋilopeyek iŋes, totubokis a Lokisila kus.” Toboŋokis Ŋiyudayan iŋes temasi, “Nyikicamakinit apukan a Ŋiromanin isua akiar ituŋanan.”

³²(Etiyakinosi ŋun, ikotere kiyookinotor ŋakiro ŋuna alimunit Yesu, itoodiunit epite ŋolo etwania iŋes.)

³³Toboŋo Pilato kai keŋ ŋina apolon, tonyarau iŋes Yesu, kiŋit tema, “Irae iyoŋ erwosit a Ŋiyudayan a?”

³⁴Toboŋok Yesu iŋes tema, “Ilimunit iyoŋ elope ŋakiro ŋun, kori ŋicetuŋa ikilimokinito iyoŋ ŋakiro kaŋ?”

³⁵Toboŋok Pilato iŋes tema, “Arae mono ayoŋ Eyudayat ŋolo ayeni ŋun a? Erae ŋikonituŋa ka ŋikonisacaradotin ŋulu apolok ikipotunito iyoŋ neni kaŋ. Nyo isecit iyoŋ?”

³⁶Toboŋok Yesu iŋes tema, “Nyerae apukan kaŋ ŋina ka akwap a na. Kerae torae apukan kaŋ ŋina ka akwap a na, kejito ŋikewuapak kaŋ, ikotere nyekepotokinere ayoŋ neni a ŋikarikok a Ŋiyudayan. Nai nyerae apukan kaŋ ŋina a ne.”

³⁷Kiŋit Pilato iŋes tema, “Iŋes atemar irae iyoŋ erwosit a?” Toboŋok Yesu iŋes tema, “Iyoŋ ilimu atemar arae ayoŋ erwosit. Aponi ekedoun ayoŋ ka abunit ayoŋ nakwap na aŋuna a ipeibore: akiteyenun ŋuna a kire. Ituŋanan daadaŋ ŋini eyai tooma ŋuna a kire, epupi ŋakiro kaŋ.”

³⁸Kiŋit Pilato Yesu tema, “Nyo erae ŋuna a kire?” Kedau Pilato alimun ŋun, toboŋo kiŋa, tolimok Ŋiyudayan tema, “Nyeryamuna ayoŋ asecit ŋina tubokinet iŋes.

³⁹Nai erae etal kus alacakin iyes epeimabus ŋolo iitanete iyes apaki ŋina a ŋasuban a ŋuna a Paska. Icamito nai tokona olacak ayoŋ erwosit a Ŋiyudayan a?”

⁴⁰Tocelut ikes temasi, “Mam, meere lo! Ikicamit isua Baraba!” (Arae Baraba ekademanaran.)