Read ngakarimojong Yoa. 20 Bible Online

Yoa. 20 - ngakarimojong bible

Yoa. 20

¹Ani taparacu eriŋa akwap iryono, akoloŋit ŋina ke Esabit, tolot Maria Magadalena nalyal. Ani edoli inaa, kiŋolik amoru ŋina agolitere aturukan kelemar nawae alopuke.

²Toem nai iŋes neni a Simoni Petero ka ekasyoman ŋoloce, ŋolo amina Yesu, tolimok ikes tema, “Kelemar akuwan ke Ekapolon analyal ka nyikiyeni tari neni kiwuakis ikes iŋes.”

³Tonyout nai Petero ka ekasyoman ŋoloce, toloto nalyal.

⁴Toema ikes, nai abu ekasyoman ŋoloce kilany Petero kisyau nalyal.

⁵Tokukokin iŋes, kiŋolik anaŋga eperi a nen, nai nyeloma tooma.

⁶Todolu nai Simoni Petero ŋolo amotuno alokaku, toloma tooma naturukan, kiŋolik anaŋga eperi,

⁷pa erukito ŋina aenikinitae nakou a Yesu ka ŋinace, nai ebilakina aneni keŋ bon.

⁸Abu ekasyoman ŋoloce daŋ ŋolo esyauni nen, toloma tooma aturukan, kiŋolik, ido tonup.

⁹(Akigiret a ŋina abala ebe, itemokino iŋes toyaru alokatwak.)

¹⁰Toboŋosi nai ŋikasyomak ŋul lorerya kec.

¹¹Nai awuoi Maria alokiŋa aturukan kigworo. Ani ekukokin iŋes aripikin aturukan,

¹²kiŋolik ŋimalaikan ŋiarei ŋulu anapito ŋilowi ŋulu akwaŋak iboiyete aneni eperikinitoe akuwan a Yesu. Eboi epei alowae a ŋolo ka akou, epei alowae a ŋolo a ŋakejen.

¹³Kiŋita ŋimalaikan Maria temasi, “Aberu, kaanukiro igworor iyoŋ?” Toboŋok Maria ikes tema, “Egworo ayoŋ, anerae kelemar akuwan ŋina ke Ekapolon kaŋ, ka nyayeni ayoŋ neni kiwuakis ikes iŋes.”

¹⁴Kedau alimun ŋun, toboboŋ kiŋolik Yesu ewuoi, nai pa ayeni iŋes atemar arae Yesu.

¹⁵Kiŋit Yesu Maria tema, “Aberu, kaanukiro igworor iyoŋ? Ŋae iwarit iyoŋ?” Abala Maria kori erae ekile ŋol eketen emanikor; aŋun, tolimok iŋes tema, “Ekapolon, ani kerae iyoŋ ilemarit iŋes, tolimokinae neni iwuakinit iyoŋ iŋes, ikotere olot olema.”

¹⁶Tolimok Yesu iŋes tema, “Maria!” Toboboŋ Maria tolimu a Ŋaburaniyae tema, “Rabbuni!” (Iŋes atemar eketataman.)

¹⁷Tolimok Yesu iŋes tema, “Nyikitap ayoŋ, anerae eriŋa ayoŋ nyeboŋoro neni a Papa kaŋ; nai tolot, tolimok ŋikaitotoi kaŋ atemar alosi ayoŋ neni a Papa kaŋ, a ŋolo erae Papa kus daŋ; neni ka Akuj kaŋ, a ŋina erae Akuj kus daŋ.”

¹⁸Tolot Maria Magadalena, tolimok ŋikasyomak a Yesu tema, “Aanyu ayoŋ Ekapolon.” Tolimok nabo ikes ŋakiro ŋuna alimokini Yesu iŋes.

¹⁹Ataboŋ ŋinapei ŋin, ŋina ke Esabit, atukokina ŋikasyomak a Yesu tooma akai ŋina agolitoe ŋipukei, anerae akuryakito ikes aŋuna a ŋikarikok a Ŋiyudayan. Abu Yesu towo alokidiŋ kec tolimok ikes tema, “Toyai ekisil neni kus.”

²⁰Ani kedau alimokin ikes ŋun, kitoodik ikes ŋakan ka esyep keŋ. Tolakaros ŋikasyomak iŋolikinete Ekapolon.

²¹Tolimok nabo Yesu ikes tema, “Toyai ekisil neni kus. Ikwaŋinapei ekeyakitor ayoŋ Papa, ekeyaki ayoŋ iyes daŋ.”

²²Kedau alimun ŋun, kieŋak neni kec tema, “Kijaasi Etau ŋolo Asegan.

²³Ituŋanan daadaŋ ŋini isyoniyete iyes ŋasecisya keŋ, isyoniyo, ituŋanan daadaŋ ŋini nyisyoniyete iyes ŋasecisya keŋ, nyisyoniyo.”

²⁴Amam Tomas (ŋolo anyaritae Emuut), ŋolo arae epei alokasyomak a ŋulutomon ka ŋiarei, apaki ŋina abunio Yesu neni kec.

²⁵Aŋun, tolimokis ŋikasyomak ŋuluce Tomas temasi, “Ikianyu isua Ekapolon.” Nai abu Tomas tolimok ikes tema, “Mati keŋolik ayoŋ ŋapores ŋuna a ŋisumar anakan keŋ, ka ewuak ekimoin kaŋ napores ŋuna a ŋisumar ka ewuak akan kaŋ losyepi keŋ, nyanupi ayoŋ.”

²⁶Kelunyar esabit epei, eboiyete ŋikasyomak nabo kaapei, torukito ka Tomas daŋ alokai a ŋina agolol ŋipukei. Totakanu Yesu neni kec tema, “Toyai ekisil neni kus.”

²⁷Tolimok nai Yesu Tomas tema, “Kiwuak ekonikimoin ne, kiŋolik ŋakaakan. Torwau akonikan, kiwuak losyepi kaŋ, tojoŋo aŋayaŋayat, nai tonup!”

²⁸Tolimok Tomas Yesu tema, “Ekapolon kaŋ, Akuj kaŋ!”

²⁹Tolimok Yesu iŋes tema, “Inup iyoŋ, anerae ikiŋolik ayoŋ a? Erereŋ ŋulu enupito pa iŋolikinito!”

³⁰Abu Yesu kitiya ŋakujuwuanisya ŋuna alalak iteete ŋikasyomak keŋ, nyigirir ŋakujuwuanisya ŋun daadaŋ lokitaabo lo.

³¹Nai igiritae nu, ikotere tonupyata iyes atemar erae Yesu iŋes erae Kristo, Lokoku ka Akuj, ka alotooma anupit kus iŋes, toryamut akiyar alokiro keŋ.