Read ngakarimojong Yoa. 21 Bible Online

Yoa. 21 - ngakarimojong bible

Yoa. 21

¹Kedaun ŋun, abu Yesu totakanu nabo neni a ŋikasyomak keŋ alodiyete anam Tiberia. Abu iŋes totakanu ikonata.

²Ayakasi ŋituŋa lu iwapei: Simoni Petero ka Tomas (ŋolo anyaritae Emuut), Nasaniel (ŋolo a Kana anakwap a ŋina a Galileya), kaapei ka ŋidwe a Sebedeo ŋulusapa, ta ŋikasyomak a Yesu ŋice ŋiarei.

³Tolimok Simoni Petero ŋuluce tema, “Alosi ayoŋ akisurum ŋikolya.” Temasi ikes, “Apena kaapei.” Apotu nai ikes todoka ataker toloto nanam, nai nyisuruma ikes idiobore akuwar ŋin.

⁴Ani taparacu ereŋuni Kide, towo Yesu alokipetot a ŋolo ka anam, nai nyeyena ŋikasyomak atemar erae Yesu.

⁵Kiŋit Yesu ikes tema, “Ŋidwe, eyai iyes ediokolya a?” Toboŋokis ikes temasi, “Emam.”

⁶Tolimok iŋes ikes tema, “Tocakakisi atibait lowae ŋolo aloteten ataker, iryamunete iyes ŋikolya.” Tocakakis nai ikes atibait, kigaaliut ŋikolya ŋulu alalak, kipiyo akirikin tooma nataker.

⁷Tolimok ekasyoman ŋolo amina Yesu Simoni Petero tema, “Erae Ekapolon!” Ani iirari Petero atemar arae Ekapolon, tonap ŋilowi, anerae alacarit sek iŋes ŋilowi itiyae; toporo anataker nakipi.

⁸Apotu nai ŋikasyomak ŋuluce todolut lokipetot eya nataker, kiriut atibait ileleba ŋikolya, anerae pa alwaka ikes alokipetot a ŋolo ka anam; arae ŋamitae ŋuna aapiyarito amiat.

⁹Ani edolunete ikes lokipetot neni aonon, kiŋolikis akim ŋina etotoleunit, idokokino ŋikolya kidiama ka toya ŋamugati daŋ diyete nen.

¹⁰Tolimok Yesu ikes tema, “Yautu ŋikolya ŋidi ŋulu igaaliut iyes.”

¹¹Tolot Simoni Petero kiriu atibait lokipetot, ileleba ŋikolya, arae ŋikolya daadaŋ amiat ka ŋatomonikan ka ŋiuni; tari aŋuna alalakyata daŋ, nyeŋeda apotis kec atibait.

¹²Tolimok Yesu ikes tema, “Potu kimuja.” Emam tari edio alokasyomak ŋolo abu totitinyik akiŋit iŋes tema, “Ŋae iyoŋ?” Ayenete ikes atemar arae Ekapolon.

¹³Abu nai Yesu tolemu amugati inak ikes, tolemu ŋikolya daŋ tokorak ikes.

¹⁴Arae atakanikinet a Yesu ŋin ŋina a ŋauni neni a ŋikasyomak keŋ, kedau ayarun alokatwak.

¹⁵Kedaut ikes akimuj, tolimok Yesu Simoni Petero tema, “Simoni lokoku a Yoana, ikimina iyoŋ ayoŋ akilo neni akaminatar ŋuluce lu a?” Toboŋok Petero tema, “Ee Ekapolon, iyeni iyoŋ atemar akamina ayoŋ iyoŋ.” Tolimok nai Yesu iŋes tema, “Kitan ŋikaalei kaŋ ŋulu meesekin.”

¹⁶Kiŋit Yesu Simoni Petero akiŋiset ŋina a ŋaarei tema, “Simoni lokoku a Yoana, ikimina iyoŋ ayoŋ a?” Toboŋok Petero tema, “Ee Ekapolon, iyeni iyoŋ atemar akamina ayoŋ iyoŋ.” Tolimok Yesu iŋes tema, “Kiyok ŋikaalei kaŋ ŋulu meesekin.”

¹⁷Kiŋit Yesu Petero akiŋiset ŋina a ŋauni tema, “Simoni lokoku a Yoana, ikimina iyoŋ ayoŋ a?” Kiyaloloŋ Petero aŋuna abunio Yesu kiŋit iŋes ŋakiŋiset ŋauni ebala, “Ikimina iyoŋ ayoŋ a?” Tolimok nai Petero Yesu tema, “Ekapolon, iyeni iyoŋ ŋakiro daadaŋ, iyeni daŋ atemar akamina ayoŋ iyoŋ!” Tolimok nai Yesu Petero tema, “Kiyok ŋamesekin kaŋ.

¹⁸Akalimokini ayoŋ iyoŋ kire atemar, ŋina iriŋaakar iyoŋ isorokana, ibu iyoŋ kitemonokin, tonyou tolot neni icamit. Nai ŋina imojoŋi, ikeari iyoŋ ŋakan kon, ikitemok icetuŋanan iyoŋ itoriko neni nyicamit iyoŋ alosit.”

¹⁹(Alimuni Yesu ŋakiro ŋun kitoodiunia epite ŋolo ebunio Petero atwanare, ido kitopoloo Akuj.) Ani kedau alimun ŋun, tolimok Petero tema, “Kiwuapakinae ayoŋ.”

²⁰Ani eboboŋi Petero, kiŋolik ekasyoman ŋolo amina Yesu iwuapunit ikes; arae ekasyoman ŋol ŋolo edunyit Yesu akoloŋit ŋina emujata ikes akimuj ŋina esidyon ŋina ka ataboŋ, iŋes ŋolo abala, “Ekapolon, ŋae ikilukini iyoŋ?”

²¹Ani iŋolikini Petero iŋes, kiŋit Yesu tema, “Ani bo ekile lo?”

²²Tolimok Yesu Petero tema, “Ani nai kerae acamit kaŋ aesikin iŋes kidoŋ nege tari ŋina aboŋunio ayoŋ, anu ikikamunito iyoŋ? Kiwuapakinae iyoŋ ayoŋ!”

²³Apotu ŋakiro ŋun kielakin lokasyomak daadaŋ ilereete ebe, nyetwani ekasyoman ŋol jik. Nai pa alimokinit Yesu iŋes atemar nyetwani, nai abala Yesu, “Ani nai kerae acamit kaŋ aesikin iŋes kidoŋ nege tari ŋina aboŋunio ayoŋ, anu ikikamunito iyoŋ?”

²⁴Ekasyoman ŋol iŋes erae esuuda a ŋakiro a nu a daadaŋ igirit ŋakiro nu daadaŋ, ka ikiyeni atemar erae ŋuna isuudat iŋes, ŋuna a kire.

²⁵Eyakasi ŋakiro ŋace ŋuna alalak ŋuna abu Yesu kitiya, ŋuna ani kerae kigiritetei daadaŋ a ŋapeipei, atami ayoŋ atemar kemam neni kiwuakina ŋikitaaboi anakwap a daadaŋ.