Read ngakarimojong Yoa. 3 Bible Online

Yoa. 3 - ngakarimojong bible

Yoa. 3

¹Ayai alokidiŋ Ŋiparisayon ecekile ŋolo anyaritae Nikodemo, ŋolo daŋ arae epei a ŋikarikok a Ŋiyudayan.

²Abu iŋes tolot nakwaare neni a Yesu tolimok tema, “Eketataman, ikiyeni isua atemar irae iyoŋ eketataman ŋolo ibunit aneni ka Akuj, anerae emam idiotuŋanan epedori akitiya ŋakujuwuanisya ŋuna itiyae iyoŋ, mati erukito Akuj ka iŋes.”

³Toboŋok Yesu iŋes tema, “Akalimokini ayoŋ iyoŋ kire atemar, emam ituŋanan epedori akiŋolikin Apukan ka Akuj, mati kidoun iŋes nabo.”

⁴Kiŋit Nikodemo Yesu tema, “Epedori ituŋanan akidouno nabo ikwaani kemojoŋ? Epedori mono iŋes alomar nakook a toto keŋ kidounoe nabo a?”

⁵Toboŋok Yesu iŋes tema, “Akalimokini ayoŋ iyoŋ kire atemar, ani pa kidoun ituŋanan a ŋakipi ka Etau ŋolo ka Akuj, nyelomari iŋes jik Napukan ka Akuj.

⁶Ŋini idounitoe ka akuwan erae akuwan; ŋini idounitoe a Etau a ŋolo ka Akuj, erae etau.

⁷Nyiumok robo aŋuna akalimok ayoŋ iyoŋ atemar itemokino iyes daadaŋ ikidoun nabo.

⁸Ekusi ekuwuam neni ecamit ka iirari iyoŋ akirurum keŋ, nai nyianyuni neni ebunitor kori neni elosi. Ikote nenipei aneni a ŋinituŋanan idounitoe a Etau a ŋolo ka Akuj.”

⁹Kiŋit Nikodemo Yesu tema, “Epedori nai ŋakiro ŋun ikwaani?”

¹⁰Toboŋok Yesu iŋes tema, “Irae iyoŋ eketataman ŋolo apolon alo Isirael, ka nyiyeni iyoŋ ŋakiro ŋun daadaŋ!

¹¹Akalimokini ayoŋ iyoŋ kire atemar, ikirworo isua ŋuna ikiyeni ka ikiteyenunit daŋ ŋuna ikianyu, nai nyicamunito iyes ŋuna ikiteyenunit isua.

¹²Ani pa kinupito iyes ŋuna erworo ayoŋ ŋuna ka akwap, ikokinete nai iyes inupete, erae kakalimok ayoŋ iyes ŋuna anakuj ai?

¹³Emam ituŋanan ipei daŋ adol nakuj, mati Lokoku a Ituŋanan bon ŋolo ebunit anakuj.”

¹⁴Ikwaŋina abunio Moses kikyaarya analoŋisat emun ŋolo etiyaunitae a asuat, itemokino Lokoku a Ituŋanan daŋ kikyaarae kidiama ikwaŋinapei,

¹⁵ikotere ŋini enupi eryamuni akiyar ŋina nyedaun.

¹⁶Kire, abu Akuj tomina akwap nooi, tojal tari Lokoku keŋ ŋolo donupei, ikotere ŋini enupi iŋes nyebukori, nai toryamu akiyar ŋina nyedaun.

¹⁷Anerae pa eyakuunit Akuj Lokoku keŋ atubokin akwap, nai ikotere eunio akwap aŋuna keŋ.

¹⁸Iŋes ŋini enupi Lokoku ka Akuj, nyetubokinio; ŋini nyenupi, etubokinitae sek, anerae nyenupit iŋes ekiro a Lokoku ka Akuj a ŋolo donupei.

¹⁹Atubokino iŋes na ebe: abu akica bu nakwap, nai aminasi ŋituŋa akiryonut akilo akica, anerae aroko ŋuna etiyaete ikes.

²⁰Ituŋanan ŋini itiyae aronis itidiŋit akica ka nyebuni nakica, anerae ekuryanit atemar isileereunio ŋiticisyo keŋ ŋulu aronok.

²¹Nai iŋes ŋini itiyae ŋuna a kire elomuni nakica, ikotere kisileereunoe atemar itiyat iŋes ŋiticisyo keŋ anakimorikina ka Akuj.

²²Kedaun ŋun, toloto Yesu kaapei ka ŋikeekasyomak nakwap ŋina a Yudeya, kiriyata iŋes ka ikes aina ibatisae ŋituŋa.

²³Yoana daŋ ebatisae alo Ainoni alo diyete Salim, anerae alalak ŋakipi a nen, poneneete ŋituŋa akibatisao.

²⁴Etiyasi ŋun eriŋa Yoana nyeena alomabus.

²⁵Apeipaki tolomu epeget alokidiŋ ŋikasyomak a Yoana ka e Yudayat ece aŋakiro a ŋuna atapito akitesegun ŋawat, ikwa icikakinitotor Ŋikisila.

²⁶Potu ikes neni a Yoana temasi, “Eketataman, itamunit iyoŋ ekile ŋolo irukitotor iyoŋ alo Kide aŋolol Yorodan, ŋolo ibu iyoŋ ikiteyenik isua a? Ibatisae iŋes ŋituŋa tokona ka acunar ŋituŋa daadaŋ neni keŋ!”

²⁷Toboŋok Yoana tema, “Nyepedori idiotuŋanan aryamun idiobore, mati einakinitae anakuj.

²⁸Iyes ŋilopeyek iraakasi ŋisuudae a ŋuna alimunit ayoŋ ebe, ‘Meere ayoŋ Kristo, nai ekeyakitae ayoŋ akiŋarenikin iŋes.’

²⁹Ŋini eyakar ateran, iŋes erae ekeitan; nai ekone ŋolo ke ekeitan ŋolo eyai nen, elelyani nooi aŋuna epupyo etoil ŋolo ke ekeitan. Erae alakara na ŋina kaŋ ka elelebun lotau kaŋ.

³⁰Itemokino iŋes torwoniar, nai itemokino ayoŋ ocaryonior.”

³¹“Ŋolo ebunit alokidiama, epol akilo daadaŋ. Ŋolo ebunit alokwap, erae ŋolo ka akwap; irworo daŋ ŋuna ka akwap. Nai ŋolo ebunit anakuj,

³²iŋes irworo ŋuna adau akiteyenun ka ŋuna eira aina. Nai emam ituŋanan acamu ŋuna iteyenunit iŋes.

³³Ŋini acamu ŋakiro keŋ, iŋes iteyenunit atemar, erae Akuj ŋina a kire.

³⁴Ŋolo iyakuunit Akuj, iŋes irworo ŋakiro ŋuna ka Akuj, anerae ilelebikinit Akuj Etau ŋolo Asegan neni keŋ, pa ipimim.

³⁵Emina Akuj Papa Lokoku keŋ ka ewuak ŋiboro daadaŋ nakan keŋ.

³⁶Ŋini enupi Lokoku, iŋes eyakar akiyar ŋina nyedaun; ŋini nyepupi Lokoku, nyeryamuni akiyar ŋin, nai eyai anyunyura ŋina ka Akuj neni keŋ.”