Read ngakarimojong Yoa. 9 Bible Online

Yoa. 9 - ngakarimojong bible

Yoa. 9

¹Ani eriŋa Yesu elosi alorot, kiŋolik iŋes ekile ŋolo edounitoe emudukana.

²Kiŋita ŋikasyomak keŋ iŋes temasi, “Eketataman, ŋae esecit, ekile lo kori ŋikauruunak keŋ, idounitere iŋes emudukana?”

³Toboŋok Yesu ikes tema, “Nyesecit ekile lo kori nyesecito ŋikauruunak keŋ. Erae amuduko keŋ ŋinakisileereunet apedor ŋina ka Akuj aneni keŋ.

⁴Itemokino iwon etiyata ŋiticisyo ŋulu a ŋolo ekeyakuunit ayoŋ eriŋa erae apaaran; ebunit akiryonut ŋina ka akuwar, ŋina nyepedorya idiotuŋanan akitiya.

⁵Ani ca eriŋa ayoŋ ayai nakwap, Arae Ayoŋ akica ŋina ka akwap.”

⁶Kedau akirwor ŋun, abu kimwaak ŋakimul kwap, tomunau ecoto edio a ŋakimul, kiwosak nakonyen ke emuduk.

⁷Tolimok Yesu iŋes tema, “Ape kilota ŋakonyen kon anabwal a ŋina a Siloam” (apolou keŋ atemar “Iyakitae”). Tolot iŋes, kilota, toboŋu ekienyi.

⁸Apotu ŋikidunyet ka ŋituŋa ŋulu sek eteete iŋes ilipanar temasi, “Okoe, meere mono ekile lo ŋolo sek iboiyonokin epeiwae nen, kilipanar a?”

⁹Temasi ŋice, “Kire, erae iŋes!” Tobas ŋice, “Meere iŋes, ikwaan erae akikwaan.” Nai tolimok iŋes ikes tema, “Erae ro ayoŋ pei!”

¹⁰Kiŋita ŋituŋa ŋul iŋes temasi, “Aa ro bo, akienyunete mono ŋakonikonyen ikwaani?”

¹¹Tolimok iŋes ikes tema, “Ekile ŋolo enyaritae Yesu amunauni ecoto, kiwosak nakonyen kaŋ, okolimok ayoŋ tema, ‘Ape nabwal ŋina a Siloam, kilota.’ Abu nai ayoŋ olot nabwal, elota, ido okienyu.”

¹²Kiŋita ikes iŋes temasi, “Ai bo tokona eyai iŋes?” Toboŋok iŋes ikes tema, “Nyayeni ayoŋ!”

¹³Apotu nai ŋituŋa ŋul yaasi ekile ŋolo sek amudukana neni a Ŋiparisayon.

¹⁴Arae akoloŋit ŋina amunaunia Yesu ecoto kitaŋaleunio emuduk ŋina a Sabato.

¹⁵Kiŋita nabo Ŋiparisayon ekile ŋol epite ŋolo kekienyunia. Tolimok nai iŋes ikes tema, “Abu iŋes kiwosak ecoto nakonyen kaŋ, olot ayoŋ elota ka akienyi tokona.”

¹⁶Temasi Ŋiparisayon ŋice, “Nyebunit ekile ŋol aneni ka Akuj, anerae nyiricakinit iŋes ekisil ŋolo ka akoloŋit a ŋina a Sabato.” Nai temasi ŋice, “Okoe, ikokini mono ekile ŋolo erae ekasecan itiyae ŋakujuwuanisya ŋun ai?” Tosodi totyakatyakas ikes.

¹⁷Kiŋita nabo Ŋiparisayon ekile ŋol temasi, “Itami tokona iyoŋ atemar ŋae ekile ŋolo ikitekienyuni iyoŋ?” Toboŋok iŋes tema, “Erae iŋes ekadwaran.”

¹⁸Nai apotu Ŋiyudayan nyenupa atemar kemudukana ekile ŋol, ido ekienyi tokona, akitodol neni anyarauniata ikes ŋikauruunak keŋ.

¹⁹Kiŋita ikes ŋikauruunak temasi, “Erae mono logo lokoku kus a? Ibasi iyes ebe edounio iŋes emudukana. Ekokini bo iŋes ekienyuni ai?”

²⁰Toboŋokis ŋikauruunak keŋ ikes temasi, “Ikiyeni atemar erae iŋes lokoku kosi ka edounio iŋes emudukana.

²¹Nai nyikiyeni isua epite ŋolo iteo tokona kori nyikiyeni daŋ ŋini kitekienyuni ŋakonyen keŋ. Kiŋita iŋes, anerae epol, epedori erwor bon.”

²²Alimunete ŋikauruunak keŋ ŋun aŋuna akeritotor ŋikarikok a Ŋiyudayan; anerae atukito sek Ŋiyudayan atemar, ŋini enupi ebe Yesu iŋes erae Kristo, ikisaryo alosinagoga.

²³Ŋakiro ŋun, ikes alimunioto ŋikauruunak atemar, “Epol iŋes, kiŋita!”

²⁴Tonyarata ikes nabo ŋolo sek amudukana, tolimokis iŋes temasi, “Kikoŋ alokiŋaren Akuj atemar ilimuni iyoŋ ŋuna a kire; ikiyeni isua atemar ekasecan ekile ŋolo kikitekienyuni iyoŋ.”

²⁵Toboŋok iŋes tema, “Ani kerae iŋes ekasecan, nyayeni ayoŋ ŋun, nai ayeni apeikirot: amudukana sek ayoŋ, nai tokona akienyi!”

²⁶Kiŋita nabo ŋulupeituŋa iŋes temasi, “Ikikokini mono iŋes iyoŋ ai? Etekienyuni mono iŋes ŋakonyen kon ikwaani?”

²⁷Toboŋok ekile ŋol ikes tema, “Adau ayoŋ alimokin iyes tete sek, nai ipotu towout akiirar. Nyo icamitotor akiirar nabo? Kori ca icamito iyes daŋ aruwor ŋikasyomak keŋ?”

²⁸Kisoloto ikes iŋes temasi, “Iyoŋ irae ekasyoman keŋ, nai isua ikirae ŋikasyomak a Moses.

²⁹Ikiyeni isua atemar abu koloŋ Akuj kirwor neni a Moses, nai ŋol, nyikiyeni tari neni ebunitor!”

³⁰Toboŋok ekile ŋol ikes tema, “Okoe eumokina nu! Ibasi iyes nyiyenete neni ebunitor, nai adau iŋes akitekienyun ŋakaakonyen!

³¹Ikiyeni iwon atemar nyepupi Akuj ŋikasecak, epupi ŋulu ekerito iŋes bon ka ŋulu itiyaete ŋuna ecamit iŋes ikes kitiyata.

³²Ŋinapei koloŋ kisyakinia akwap, emam ituŋanan eirar, ebala etekienyu idiotuŋanan ice ŋini idounitoe emudukana.

³³Kerae nyebunit ekile ŋol aneni ka Akuj, kemam idiobore itiyakini iŋes.”

³⁴Tolimokis ŋituŋa ŋul iŋes temasi, “Ikidounitoe iyoŋ irae ekasecan ka itusubuna iyoŋ eketataman isua a?” Kiritasi nai ikes iŋes alosinagoga.

³⁵Ani iirari Yesu atemar kiritar ekile ŋol, tolot kiwara iŋes, kiŋit tema, “Inup iyoŋ Lokoku a Ituŋanan a?”

³⁶Toboŋok iŋes tema, “Ekapolon, ŋae mono iŋes, ikotere onup iŋes?”

³⁷Tolimok Yesu iŋes tema, “Iberakin iyoŋ akiŋolikin iŋes ka iŋes ŋolopei irworotor iyoŋ!”

³⁸Tema nai ekile ŋol, “Ekapolon! Anup!” Kisyak aryedik, kilip neni a Yesu.

³⁹Tolimu nai Yesu tema, “Abunit ayoŋ nakwap atubonokin, ikotere ŋulu sek emudukaka ekienyunete, ido ŋulu sek ekienyete tomudukakyata.”

⁴⁰Kiirasi Ŋiparisayon ŋice ŋulu aya diyete keŋ ŋakiro ŋun, kiŋita ikes Yesu temasi, “Ibala tokona iyoŋ ikimudukaka isua daŋ a?”

⁴¹Tolimok Yesu ikes tema, “Kerae tomudukaka iyes, kemam iyes asecit; nai aŋuna irworotor atemar ‘Ikite,’ irubakinito iyes irae ŋikasecak.”