Read ngakarimojong Ŋitic. 12 Bible Online

Ŋitic. 12 - ngakarimojong bible

Ŋitic. 12

¹Ŋirwa ŋulupei, togeu erwosit Erode akikam ŋice alokidiŋ ŋikanupak ecamit akisican ikes.

²Abu iŋes toar Yakobo lokaato keŋ a Yoana ka atum.

³Ani eanyuni iŋes atemar ajoikinito ŋakiro ŋun Ŋiyudayan, abu kikamu Petero daŋ. (Atakanunete ŋakiro nu apaki ŋina enumunumere ŋasuban ŋuna a ŋamugati a ŋuna emam ŋakinyalet kec.)

⁴Ani kedau iŋes akikamun Petero, kijukak mabus, kipotok losigarya ŋulu atyakitae ŋatyaket ŋaomwon, ŋinatyaket ŋisigarya ŋiomwon. Acamit Erode aŋaun iŋes kelunyar Paska, ido kisitakinae alokiŋaren ŋituŋa.

⁵Aŋun, aponi togoloe Petero alomabus, nai elipete Ŋikristo nooi Akuj aŋuna keŋ.

⁶Nakwaare nyiwalara akoloŋit ŋina acamitor Erode akisitakin Petero alokiŋaren ŋituŋa, ajotoe Petero alokidiŋ ŋisigarya ŋiarei, toenitetei iŋes a ŋiriko a ŋiarei. Toyakas daŋ ŋisigarya ŋulu eteok lokekia a mabus.

⁷Atipei, totakanu emalaika ŋolo ke Ekapolon, kinuaku akica ejera. Totap emalaika eseket a Petero, kiiŋiiŋak kitekienyu, tolimok tema, “Tonyou atipei!” Tolacakinos ŋiriko anakan keŋ atipei.

⁸Tolimok nai emalaika iŋes tema, “Tonap ŋilowi ka ŋamuk.” Kitiya Petero ŋun. Tolimok emalaika iŋes tema, “Tonap ekoti kon, ikiwuapak ayoŋ.”

⁹Kiwuapak nai Petero iŋes kiŋa mabus. Pa ayeni iŋes atemar ŋuna etiyae emalaika erae ŋuna a kire; atami iŋes atemar kori ete atakanikinet.

¹⁰Ani kedepasi ikes ŋisigarya ŋulu eteok ŋulu tanyan ka ŋulu atupakinete, todolo lopuke ŋolo a ŋasuwa ŋolo ecorosiyarit Yerusalem. Toŋaar epuke bon, tolomasi ikes kiŋa. Tomekis ikes erukude ŋolo ke etaun epei, atipei toŋopiya nai emalaika.

¹¹Toyenu nai Petero ŋuna kepotu kitiyakinos neni keŋ tema, “Ayenu ayoŋ kire tokona atemar Ekapolon iyakuunit emalaika keŋ aiun ayoŋ anapedor a ŋina ke Erode ka anakiro a daadaŋ a ŋuna acamito Ŋiyudayan akitiya.”

¹²Ani kileereto ŋakiro nu aneni keŋ, tolot kai a Maria a toto a Yoana a ŋolo arae Mariko, neni acunakina ŋituŋa ŋulu alalak ilipete.

¹³Ani ikoŋikoŋokini Petero epuke ŋolo alokiŋa, bu aketiyan ŋina anyaritae Roda akisirwor ŋini ekoŋikoŋi.

¹⁴Ani eyeni iŋes etoil a Petero, tolakari nooi nyeŋaa mono epuke, nai toem tolimok ŋituŋa atemar ewuoi Petero alokiŋa.

¹⁵Tolimokis ŋituŋa iŋes temasi, “Ikibilerit iyoŋ!” Nai torubak iŋes ebala ebe erae kire. Toboŋokis ikes temasi, “Erae emalaika keŋ.”

¹⁶Nai torubak Petero ikoŋikoŋi epuke. Ani eŋaarete ikes, kiŋolikis iŋes toumokis.

¹⁷Kikia iŋes akan keŋ akisililiŋ ikes, ido kitatamik ikes epite ŋolo ayaunia Ekapolon iŋes alomabus. Tolimok iŋes ikes tema, “Tolimokisi nugu neni a Yakobo ka lokaitotoi.” Torotok nai iŋes, tolot iwace.

¹⁸Ani iwalari, kiguryakinos nooi ŋisigarya aŋuna kepotu kitiyakinos neni a Petero.

¹⁹Abu Erode tolimu atemar toripiripai nooi ŋakiro a Petero, nai nyeryamut ikes iŋes. Aŋun, abu kiŋitiŋit ŋisigarya ŋulu eteok mabus, ido tolimu atemar toarae ikes. Tolot nai Erode alo Yudaya tari Kaisaria, kiboi aina ŋirwa ŋidi.

²⁰Aŋoikinit Erode ŋituŋa ŋulu a Tiro ka Sidon. Potu nai ŋituŋa ŋul kaapei neni keŋ. Ani kedaut ikes akitacamun Blasto ŋolo arae eketiyan ke Erode, ŋolo ekinyomitae ŋakiro kec, kiŋita ikes Erode akisil ka ikes; anerae arae nakwap ŋina epukat Erode aryamununuya akwap kec akimuj.

²¹Ani edoli akoloŋit ŋina aseunit Erode akiryamakinor ka ikes, tonap ŋikeelowi ŋulukipukaet, kiboikin lokicoloŋ ŋolo ka apolou, ido kirwor lotuŋa.

²²Tocelut ŋituŋa temasi, “Irworo iŋes erae akuj, meere ituŋanan!”

²³Apaki ŋinapei, kitedyakak emalaika ŋolo ke Ekapolon Erode toramakin kwap, anerae abu iŋes kimyek ŋituŋa itopoloorito iŋes erae akuj, pa etopoloorit iŋes Akuj ŋina a kire. Tonyama ŋikur iŋes, totwan.

²⁴Nai torubak akirot ŋina ka Akuj iyata ka tokeikin akwap.

²⁵Ani kedaut Baranaba ka Saulo etic kec ŋolo eyakitere ikes, toboŋut alo Yerusalem potu Antiokio, erukito ka Yoana ŋolo erae Mariko.