Read ngakarimojong Ŋitic. 14 Bible Online

Ŋitic. 14 - ngakarimojong bible

Ŋitic. 14

¹Alo Ikonio, toloto Paulo ka Baranaba lopite ŋolopei sek, tooma esinagoga a Ŋiyudayan. Kirworo ikes a nen alopite a ŋolo abu kitunup Ŋiyudayan ŋulu alalak ka ŋulu pa arae Ŋiyudayan ŋakiro a Yesu.

²Nai apotu Ŋiyudayan ŋulu awounito akinup kiguryakis ka kicocoa daŋ ŋituŋa ŋulu pa arae Ŋiyudayan akitoroniyar ŋikanupak.

³Aŋun, kiboiyoto Ŋikiyakia a nen apaki ŋina aoyan, kirworos ŋakiro ŋuna ke Ekapolon pa ekuryanito. Abu Ekapolon kiteyenu ebe erae ŋuna a kire ŋakiro ŋuna erworosi ikes, aŋuna ainakinia ikes apedor ŋinakitiyaet ŋakujuwuanisya ka ŋaumonokineta.

⁴Nai atyakatyaka ŋituŋa ŋulu ke etaun; ariito ŋice ka Ŋiyudayan, toriito ŋice ka Ŋikiyakia.

⁵Totukut nai ŋulu pa arae Ŋiyudayan ka Ŋiyudayan kaapei ka ŋikarikok kec akibuŋa ka akicak Ŋikiyakia a ŋamoru.

⁶Ani eyenunete Ŋikiyakia ŋakiro ŋun, tosiwa toloto Listra ka Derube, lotaunio ŋulu ka akwap a Likonia ka nakwapin ŋuna erikaunito.

⁷Tolimonokis ikes Ŋakiro ŋuna Ajokak lotuŋa aina.

⁸Ayai Listra ekile ŋolo aŋwalito ŋakejen; aŋwalit iŋes ŋinapei anakidounet ka pa arotonokini jik.

⁹Apupi iŋes Paulo irworo. Kitek Paulo iŋes, ani keanyuwa atemar eyakar anupit akitaŋaleuno,

¹⁰tolimu a etoil a ŋolo apolon tema, “Tonyou, towo kitenar!” Tokuraun ekile, torotok.

¹¹Ani iŋolikinete ŋasepico ŋakiro ŋuna abu Paulo kitiya, tocelut a Ŋalikoniae temasi, “Kepotu ŋakujo neni yok esibito ŋituŋa!”

¹²Tomaikis ikes Baranaba ekiro ŋolo enyaritae Seus, tomaikis Paulo ekiro ŋolo enyaritae Eremes, anerae arae ekerworon ŋolo apolon.

¹³Yau esacaradoti ŋolo ka akuj a ŋina anyaritae Seus a ŋina ayai akai keŋ kiŋaren etaun, ŋimoŋin ka ŋatur lokekia ŋulu ke etaun, anerae acamito iŋes ka ŋituŋa aarakin amuronot Lokiyakia.

¹⁴Ani iirarete Baranaba ka Paulo ŋakiro ŋun, tociliciliyasi ŋilowi kec, toema tooma nasepico a ŋituŋa iworoete ebasi,

¹⁵“A ŋikilyok, kaanukiro itiyaata iyes nu? Isua daŋ ikirae ŋituŋa ikwa iyes! Ikiyaunit isua Ŋakiro ŋuna Ajokak neni kus, ikotere kibelekinos anakujo a ŋuna koŋinae neni ka Akuj a ŋina eyari. Iŋes erae Akuj ŋina asubi kidiama ka akwap, anam ka ŋiboorei daadaŋ ŋulu eyakasi tooma kec.

¹⁶Ananyameta a ŋuna amunyarosi, abu Akuj tocamak ŋakwapin akitiya ŋuna acamito.

¹⁷Tari kikote nen, itoodiunit iŋes jwi jwi akiteyenunet ŋina ka ayakau keŋ aloboro a ŋulu ajokak, a ŋulu itiyae iŋes; ikiinunui iŋes akiru alokidiama ka ŋapakio ŋuna elemeneneere; ikisimuji iŋes iyes ka ikitalakanari iyes.”

¹⁸Ani tari kirwor Ŋikiyakia ŋakiro ŋun, pa apatana ikes akiretakin ŋasepico aarakin ikes amuronot.

¹⁹Nai aponito nen Ŋiyudayan alo Antiokio ka Ikonio, kicocoiyasi ikes ŋasepico, kitiriwo lowae kec; ido kimasamasata Paulo a ŋamoru, kiriyasi kiŋa etaun etamete atemar kori atwana.

²⁰Nai ani etukokinosi ŋikanupak neni keŋ, tonyou iŋes, toboŋo toloma lotaun. Akoloŋit ŋina atupakini, tonyout iŋes ka Baranaba, toloto Derube.

²¹Tolimonokis Paulo ka Baranaba Ŋakiro ŋuna Ajokak alo Derube. Ani kedaut aryamun ŋikanupak ŋulu alalak, toboŋosi Antiokio, kitoro Listra ka Ikonio.

²²Kitogogoŋo ikes ŋikanupak, kisimukekis arubakin ananupit. Kitatama ikes ŋikanupak ebe, “Itemokino iwon etoro locan ŋulu alalak, eriŋa nyelomara Napukan ka Akuj.”

²³Toseut nai Paulo ka Baranaba ŋikatukok a ŋinatukot a Ŋikristo, ŋulu epolokinete ikes. Alotooma ŋakilipeta ka akikany akimuj, apotu Ŋikiyakia kicikakis ikes neni ke Ekapolon, a ŋolo anupito ikes.

²⁴Ani kiryam ikes akwap ŋina a Pisidia, potu neni anyaritae Pampilia.

²⁵A nen, tomora mono Ŋakiro ŋuna Ajokak alotaun a ŋolo anyaritae Periga, toloto nai ŋolo anyaritae Atalia.

²⁶A nen, todoka ikes ameeli, toboŋosi Antiokio, etaun ŋolo ayai Siria, neni ecikakinitae ikes anajokis a ŋina ka Akuj aŋuna ke etic a ŋolo tokona adaut ikes akirikakin.

²⁷Ani edolunete ikes Antiokio, tocunakis ŋikanupak, tolimokis ikes ŋakiro daadaŋ ŋuna abu Akuj kitiya aneni kec ka epite ŋolo abunio Akuj toŋaarya erot ŋolo enupyata ŋituŋa ŋulu nyerae Ŋiyudayan.

²⁸Kiboiyoto ikes apaki ŋina aoyan a nen erukito ka ŋikasyomak.