Read ngakarimojong Ŋitic. 16 Bible Online

Ŋitic. 16 - ngakarimojong bible

Ŋitic. 16

¹Todol Paulo tari Derube ka Listra. Ayai nen Ekristoit ŋolo anyaritae Timoteo, ŋolo arae toto keŋ Ayudayat ŋina anupit Yesu, nai arae papa keŋ Egirik.

²Etojokito ŋikanupak daadaŋ ŋulu alo Listra ka Ikonio Timoteo.

³Acamit Paulo arukor ka iŋes; abu iŋes ya Timoteo kileŋer aŋuna a Ŋiyudayan a ŋulu ayakasi nakwapin ŋun, anerae ayenete ikes daadaŋ atemar arae papa a Timoteo Egirik.

⁴Ani irimorete ikes lotaunio, tolimonokis ikes ŋikanupak akiwuap ŋakiro ŋuna apotu Ŋikiyakia ka ŋikatukok totubut alo Yerusalem.

⁵Aŋun, kitogogoŋoi ŋatukon a ŋikanupak ananupit ka kiyatas ŋikanupak a ŋinakoloŋit.

⁶Kirimosi ikes nakwapin ŋuna a Pirigia ka Galatia, kedau Etau ŋolo Asegan awoun ikes akisera ŋakiro ŋuna ka Akuj alo Asia.

⁷Ani edolete ikes lokukoru ŋolo a Misia, kikatakis ikes alosit nakwap ŋina anyaritae Bisinia; nai nyecamak ikes Etau ŋolo a Yesu.

⁸Aŋun, kitoro ikes Misia, totiyaaros Toroas.

⁹Akoloŋit ŋin nakwaare, bu atakanikinet neni a Paulo: awoi ekile ŋolo alo Makedonia edyekit iŋes ebala, “Bua Makedonia, ikiŋarak isua!”

¹⁰Ani keanyuwa Paulo atakanikinet ŋin, kiitanae isua atipei alosit Makedonia, anerae ikipotu oyenutu atemar kikinyar Akuj isua alimonokin Ŋakiro ŋuna Ajokak neni kec.

¹¹Todokae isua ameeli alo Toroas tocorotae tari Samosirake, akoloŋit ŋina atupakini todoloi Neapolis.

¹²Torotokinoe a nen a ŋakejen tolotoi Pilipi, etaun ŋolo apolon anakwap a Makedonia ŋolo eboiyoto Ŋiromanin. Kiriyae isua ŋirwa ŋidi alotaun a ŋol.

¹³Ani edoli akoloŋit ŋina a Sabato, tolotoi isua kiŋa etaun diyete aŋolol, neni atamakinitae isua atemar kori etukonokin Ŋiyudayan akilip. Kiboikinetei isua, kirworoe neni a ŋaberu a ŋuna atukokina nen.

¹⁴Apei alokidiŋ ŋuna ikipupete isua, arae aberu ŋina anyaritae Lidia ŋina alotaun a ŋolo a Tyatira, ŋina agyelanari ŋilowi ŋulu kipura areŋak. Arae iŋes aberu ŋina ainakina neni ka Akuj. Abu Ekapolon toŋaa etau keŋ akiirar tocamu ŋakiro ŋuna erworo Paulo.

¹⁵Ani kibatisae iŋes kaapei ka ŋituŋa ŋulu ke ekal keŋ, itodyek isua tema, “Ani kire kitamete iyes atemar arae ayoŋ akanupan ŋina ke Ekapolon, potu kiboiyoto alokai kaŋ.” Abu iŋes ikitacamu isua alosit ka iŋes.

¹⁶Apeikoloŋit elosyo isua neni elipeneneere, kiryamunetei ka apese ŋina arae apito, ŋina ayakar ekipye ŋolo ainakinit iŋes akidwar ŋakiro ŋuna eponito alokiŋaren. Aryamianakini iŋes ŋikapolok keŋ ŋisiliŋa ŋulu alalak anakidwar keŋ.

¹⁷Kiwuapu iŋes Paulo ka isua ecela ebala, “Erae ŋikilyok lu ŋiketiyak ŋulu ka Akuj a ŋina alokidiama nooi! Iseraete ikes epite ŋolo ipedoryata iyes aiuno!”

¹⁸Kitiya iŋes nu ŋirwa ŋulu alalak, akitodol ŋina aŋoya Paulo, ido toboboŋ tolimok ekipye tema, “Akalimokini ayoŋ iyoŋ alokiro a Yesu Kristo atemar tolomu aneni keŋ!” Tolomu ekipye aneni keŋ esaa ŋolopei ŋol.

¹⁹Nai ani eyenunete ŋikapolok keŋ atemar adaun epite ŋolo sek aryamununiata ikes ŋisiliŋa, aŋuna eritarere ekipye, kikamut ikes Paulo ka Silas, torikosi ikes lokepukak ŋulu ayakasi neni iikiikere.

²⁰Ani kedaut ikes ayaun ikes lokatubok, temasi, “Erae ŋikilyok lu Ŋiyudayan, isiguryaete ikes etaun yok.

²¹Itatamete ikes ŋitalyo ŋulu italeo iwon Ŋiromanin akiwuap ka akitiya.”

²²Toloma asepic a ŋituŋa daŋ nakiro ŋuna esitakinitere ikes. Tociliciliyasi ŋikatubok ŋilowi a Paulo ka Silas, tolimokis ŋituŋa akibuŋa ikes a ŋadase.

²³Ani kibuŋae ikes nooi, kiwuakinae mabus, kicikakinae ekapolokiniton mabus akiyok ikes ejok.

²⁴Ani iirari ekapolokiniton mabus ŋuna ecikakinio iŋes, togolok ikes nagule ŋina alotooma nooi, toen ŋakejen kec nakito ŋuna apotyok.

²⁵Ani eapikini kidiŋ akuwar, elipete Paulo ka Silas toeos ŋieosyo neni ka Akuj, topupete ŋimabus ŋuluce ikes.

²⁶Ŋinapeipaki, tomaranik akwap nooi, kiukok ejera ameun alokwap. Atipei toŋaaros ŋikekya daadaŋ, tolacaros ŋiriko aneni a ŋimabus a daadaŋ.

²⁷Ani ekyenyuni ekapolokiniton mabus, kiŋolik ŋikekya ŋulu ke ejera daadaŋ eŋaara, totamak atemar keema ŋimabus; aŋun tolemu atum keŋ ecamit akicumakin bon.

²⁸Nai kiworou Paulo ke etoil a ŋolo apolon tema, “Nyiwan akonikuwan! Ikiya isua daadaŋ ne!”

²⁹Tonyarau ekapolokiniton mabus ituŋanan ayaun etaa, kipumar tooma, toramakin kiŋaren Paulo ka Silas emarani.

³⁰Ya nai iŋes ikes kiŋa, kiŋit ikes tema, “Ŋikapolok, nyo itemokino ayoŋ etiya, ikotere oiun?”

³¹Temasi ikes, “Tonup Ekapolon Yesu, ido toiun kaapei ka ekonikal.”

³²Tolimonokis nai ikes ŋakiro ŋuna ka Akuj neni keŋ ka lotuŋa ŋulu alokai keŋ.

³³Ya iŋes ikes nakwaare esaa ŋolopei ŋol, kilot ŋajemei kec. Aponi kibatisae iŋes atipei kaapei ka ekal keŋ.

³⁴Ya iŋes Paulo ka Silas kai keŋ, inak ikes akimuj. Tolakaros iŋes ka ŋituŋa keŋ, aŋuna aponiata ikes tonupa Akuj.

³⁵Ani iwalari akwap, kiyakuut ŋikatubok ŋipoliso atemar, “Kimyekisi ŋikilyok ŋul toloto.”

³⁶Tosodi ekapolokiniton mabus tolimok Paulo ŋakiro ŋun tema, “Eyakuut ŋikatubok akirot atemar ikilacakin iyes. Tonyoutu nai, toloto a ekisil.”

³⁷Nai tolimok Paulo ikes tema, “Aponi ikibuŋae isua alokiŋaren ŋituŋa pa ikitubokinitae--isua ŋituŋa ŋulu a Roma! Apotu ikes ikiwuakis isua mabus. Ecamito nai tokona ikes alacakin isua pa eyenete ŋituŋa a? Nyepedor jik! Itemokino potu ikes pei ŋilopeyek ikilacakis isua.”

³⁸Yaasi ŋipoliso ŋakiro ŋun lokatubok. Ani iirarete ikes atemar arae Paulo ka Silas ŋituŋa a Roma, tobul ikes.

³⁹A ŋun, potu ikes adyekit Paulo ka Silas akisyon ikes. Toŋaut nai ikes alomabus, kiŋitakis ikes alosit alotaun.

⁴⁰Tolomut Paulo ka Silas alomabus, toloto neni a Lidia. Kiryamun ikes aina ka ŋikanupak, tolimokis ikes ŋakiro ŋuna kisimukekinet, torotokis nai alotaun.