Read ngakarimojong Ŋitic. 17 Bible Online

Ŋitic. 17 - ngakarimojong bible

Ŋitic. 17

¹Toloto ikes, kitoro lotaunio ŋulu ka Ampipoli ka Apolonia tari Tesalonika neni ayai esinagoga ŋolo a Ŋiyudayan.

²Ikwaŋina araakar epite a Paulo, abu tolosene losinagoga. Kiyana iŋes ka ŋituŋa a nen ŋirwa ŋuluuni ŋulu arae ŋulu a Sabato, tolimonokini ikes ŋakiro ŋuna igiritae Nakigireta.

³Kisileerek ka kitoodik ikes atemar etemokino Kristo toryamu ŋican ka toyaru alokatwak. Tolimu Paulo tema, “Yesu lo, ŋolo eserae ayoŋ neni kus, iŋes erae Kristo.”

⁴Tonupa ŋice alokidiŋ kec, toriwo neni a Paulo ka Silas. Tonupa daŋ Ŋigirik ŋulu alalak ŋulu ainakina neni ka Akuj, kaapei ka ŋaberu ŋuna alalak ŋuna apolok alotaun.

⁵Nai min arakao neni a Ŋiyudayan, kiriraut ŋikerimitok emaket ŋice, toyeut aruruma. Kisiguryakis ikes etaun daadaŋ, tolomasi ka agogoŋu lore a Yason, iwarito Paulo ka Silas ayaun ikes kiŋa lotuŋa.

⁶Nai ani eryamunete ikes emamukasi, kiriut Yason kaapei ka ŋikanupak ŋice lokapolok ŋulu ke etaun, tocelas ebasi, “Etolomut ŋikilyok lu ŋakiro ŋuna aronok nakwap daadaŋ! Tokona apotu ikes lotaun yok

⁷ka ejau Yason ikes kai keŋ. Eŋerito ikes daadaŋ ŋikisila ŋulu ke ekepukan a Roma, aŋuna ebaakatar ebe eyai erwosit ece ŋolo enyaritae Yesu.”

⁸Ani iirarete ŋituŋa ka ŋikapolok ŋulu ke etaun ŋakiro ŋun, kiidakinos nooi.

⁹Kitelemut ŋikapolok Yason ka ŋuluce daŋ ŋisiliŋa ŋulu acamakinere ikes akiboi alokiŋa ejera. Tolacakis nai ikes toloto.

¹⁰Ŋinapei ani ewari akwap, tolimokis ŋikanupak Paulo ka Silas atemar toloto Berea. Ani edolete ikes inaa, toloto losinagoga a Ŋiyudayan.

¹¹Apupete ŋituŋa a nen ŋakiro akilo ŋulu alo Tesalonika, anerae apotu kijaut ŋakiro ŋuna ka Akuj ecamito nooi, tosyomete a ŋinakoloŋit ŋakiro ŋuna igiritae Nakigireta, ecamito aripun erae kerae kire ŋakiro ŋuna erworo Paulo.

¹²Aŋun, tonupa ikes ŋulu alalak; tonupa daŋ Ŋigirik ŋulu alalak, ŋaberu ŋuna ajakaanak, kaapei ka ŋikilyok.

¹³Nai ani iirarete Ŋiyudayan ŋulu alo Tesalonika atemar iserae Paulo ŋakiro ŋuna ka Akuj tari alo Berea, potu ikes neni daŋ, togeut akitutuk ŋituŋa, kisiguryakis.

¹⁴Kitenakis ŋikanupak Paulo atipei, tolot ananam; nai kidoŋo Silas ka Timoteo Berea.

¹⁵Apotu ŋikilyok ŋulu etenarete Paulo kitodolo iŋes Asen. Toboŋosi nai ikes Berea, kedau Paulo akicik ikes atemar okoryamut iŋes Silas ka Timoteo atipei alotooma apaki ŋina euruwuana.

¹⁶Ani eriŋa Paulo idarit Silas ka Timoteo alo Asen, toronik iŋes nooi epite ŋolo alalaata ŋakujo alotaun a ŋol.

¹⁷Aŋun, kirworo iŋes alosinagoga ka Ŋiyudayan kaapei ka ŋuluce ŋulu ainakina neni ka Akuj; kimocoete jwi jwi alomaket ka ŋulu arae ŋikalotok.

¹⁸Kimocoto daŋ iŋes ka ŋikaosok ŋulu anyaritae Ŋipikuriyae ka Ŋisitoikae. Temasi ŋice, “Inyoni ecamit ekile ŋolo irworo car lo alimun?” Temasi ŋice, “Esibit elimonokini iŋes ŋakiro ŋuna a ŋakujo a ŋuna egelaaka.” Alimunete ikes ŋun, anerae alimonokini Paulo ŋakiro ŋuna a Yesu ka ŋuna ka ayarun alokatwak.

¹⁹Aŋun, tonyaraiyasi ikes iŋes yaasi loikiiko ŋolo ke etaun, ŋolo anyaritae Areopago, tolimokis iŋes temasi, “Ikicamit isua akiirar akitatam ŋina kitete na, ŋina itatami iyoŋ.

²⁰Anerae epupyo isua ŋakiro ŋace ŋuna egelaaka; aŋun, ikicamit isua ayenun apolou kec.”

²¹(Aminasi ŋituŋa ŋulu ka Asen ka ŋulu gelae ŋulu aya nen aayenen ŋapakio daadaŋ irworosi ŋakiro ŋuna alunyarosi ka akiiranar ŋuna kitet.)

²²Towo Paulo alokiŋaren eikiiko ŋolo ka Areopago, kirworik tema, “Ŋituŋa ŋulu ka Asen, ayenu ayoŋ atemar iraakasi iyes ŋituŋa ŋulu iyaito ibore daadaŋ alowae a ŋolo ke edin.

²³Apaki ŋina erimoritor ayoŋ etaun kus ka eŋolianak neni ilipyananaata iyes, abu oanyua neni imurotor iyes neni egiritae neni ebala, ‘Neni ka akuj a ŋina nyeyenio.’ Akuj ŋin nai, ŋina ilipete iyes neni keŋ nyiyenete, iŋes tokona eserae ayoŋ ŋakiro keŋ.

²⁴Akuj na ŋina asubuni akwap ka ibore daadaŋ ŋini eyai tooma keŋ, ŋina erae Ekapolon ŋolo anakuj ka akwap; nyiboi iŋes anakais a ŋuna edukito ŋituŋa akilipya ŋakujo.

²⁵Nabo daŋ nyiitanit iŋes akiŋarakinet a ŋituŋa esibit icana iŋes idiobore, torae bo iŋes einanakini akiyar ka ekieŋanu ta ŋiboro daadaŋ neni kec.

²⁶Abu Akuj tosub ŋibukui a ŋituŋa daadaŋ alokile ke epei, kisiboik ikes nakwap daadaŋ, kedau atubun apaki ŋina eyaryata ka neni iboikinosi.

²⁷Etiyae Akuj ŋun, ikotere kiwara ŋituŋa iŋes, toraraput, ido toryamut iŋes. Tari kikote nen daŋ, nyelwana iŋes aneni yok a daadaŋ.

²⁸Anerae ebookoi ebe: ‘Ikiyari, ikilosi ka ikiya iwon aŋuna ka Akuj.’ Ikwaŋinapei ebaakatar ŋikegirak kus ŋice ebe, ‘Ikirae iwon kire ŋiletok keŋ.’

²⁹Ikwaŋinapei ikiraakar iwon ŋiletok ŋulu ka Akuj, nyitemokino iwon ikitami atemar ikwaan eyakae keŋ ka etorube ŋolo eyeunitae ke egolid kori ke esilipa kori ka amoru--etorube ŋolo eyeuni ituŋanan ka aosou keŋ.

³⁰Akitodol apaki na, abu Akuj nyimaraki ŋapakio ŋuna pa ayeniata ŋituŋa iŋes, nai tokona ecikak ŋituŋa anakwapin a daadaŋ akibelekin neni keŋ.

³¹Anerae atubu Akuj akoloŋit ŋina etubokinia ŋituŋa daadaŋ anakwap anakiyookino ka erae ituŋanan ŋini aseu iŋes itiyakini ŋun. Etoodiu iŋes ŋun lotuŋa daadaŋ anakiteyarun ituŋanan ŋin alokatwak!”

³²Ani iirarete ikes ŋuna ka ayarun alokatwak, tojamuwasi ŋice iŋes; nai temasi ŋice ebe, “Ikicamit isua akiirar iyoŋ irworo ŋakiro ŋun nabo.”

³³Aŋun, tolot Paulo aloikiiko.

³⁴Nai apotu ŋikilyok ŋice toriwo ka iŋes, tonupa: alokidiŋ ŋul, ayai Dionisio ŋolo ka atukot a ŋina ka Areopago ka aberu ŋina anyaritae Damaris ta ŋice daŋ.