Read ngakarimojong Ŋitic. 18 Bible Online

Ŋitic. 18 - ngakarimojong bible

Ŋitic. 18

¹Ekaku a ŋun, torotok Paulo alo Asen, tolot lotaun ŋolo anyaritae Korinto.

²Toryamu iŋes aina Eyudayat ŋolo anyaritae Akwila, ŋolo auritae alo Ponitio. Keriŋa Akwila eboŋuni alo Italia, torukito ka aberu keŋ Prisila, anerae kebu Klauda ekepukan a Roma tolimu atemar torotokis Ŋiyudayan daadaŋ alo Roma. Tolot Paulo aanyun ikes,

³toruko ka ikes, kitiyata kaapei, anerae arae iŋes daŋ ekadonyon ŋiemae ikwapei ikes.

⁴Kimocoenenee Paulo alosinagoga a ŋinakoloŋit a Sabato, iwarit akitunup Ŋiyudayan ka Ŋigirik ŋakiro ŋun.

⁵Ani epote Silas ka Timoteo alo Makedonia, totum Paulo aayenen akeepaki daadaŋ elimonokini ka iteyenunui Ŋiyudayan atemar Yesu iŋes erae Kristo.

⁶Nai ani itepegete ikes iŋes ka kirworotor iŋes neni aronon, kilakilakaa iŋes ŋilowi keŋ tema, “Ani tokona kikitubok Akuj iyes, erae ŋun ŋuna kus! Emam ŋuna akatapito ayoŋ. Ameun tokona alosi ayoŋ lotuŋa ŋulu nyerae Ŋiyudayan.”

⁷Torotok iŋes alosinagoga tolot, akiboi kai a Tito Yusito. Arae Tito ekile ŋolo ainakina neni ka Akuj ka pa arae Eyudayat. Aapi akai keŋ alosinagoga.

⁸Tonupa nai ekapolokiniton esinagoga ŋolo arae ekiro keŋ Kirispo ka ekal keŋ daadaŋ Ekapolon Yesu. Ani iirarete ŋituŋa ŋulu alalak ŋulu alo Korinto ŋakiro ŋun, tonupa, kibatisae.

⁹Akoloŋit apei nakwaare, bu atakanikinet neni a Paulo, kisirworik Ekapolon iŋes tema, “Nyikuryaniar, nai torubak ilimonokini ka nyiesik jik,

¹⁰anerae ikirukit ayoŋ ka iyoŋ. Emam ituŋanan epedori akiwan iyoŋ, anerae ŋituŋa ŋulu alalak alotaun a lo, erae ŋulu kaŋ.”

¹¹Aŋun, kiboi Paulo a nen todol ekaru epei ka ŋilapyo ŋikanikapei itatami ŋakiro ŋuna ka Akuj lotuŋa.

¹²Ani ituruworyo Galio ekawuoikiniton ekepukan a Roma anakwap a ŋina ka Akaia, tocunakinos Ŋiyudayan iwapei, kikamut Paulo yaasi loikiiko.

¹³Temasi ikes ebe, “Ikatakinit ekile lo akitacamun ŋituŋa akilip Akuj alopite a ŋolo nyecamito Ŋikisila a Moses!”

¹⁴Ani edikino Paulo irworikini, tolimok Galio Ŋiyudayan tema, “Kerae torae ŋakiro nu ŋuna aronok kori ŋuna ka aseconu a ŋina apolon, keya ŋakiro ŋuna apedorya ayoŋ apupokin iyes Ŋiyudayan.

¹⁵Nai ikwaŋinapei eraakar ebura lo ŋolo a ŋakiro ka ŋirorwa ka ŋikisila kus a ŋilopeyek, itemokino iyes ŋilopeyek tosubakis ŋakiro kus. Nyaruwor ayoŋ ekatubon ŋolo a ŋakiro a ŋuna ikote nu!”

¹⁶Kirita iŋes ikes kiŋa aneni eikiikere.

¹⁷Kikamut ikes daadaŋ Sostene ekapolokiniton esinagoga, kibuŋata iŋes alokiŋaren eikiiko. Nai nyemitak Galio ŋun tari iwadio.

¹⁸Kiboiyoto Paulo ka ŋikanupak alo Korinto ŋirwa ŋulu alalak. Ani ekaku, totyakas ka ikes, torukosi iŋes ka Prisila ta Akwila, todoka ameeli, toloto Siria. Ani eriŋa Paulo nyeloto alo Kenikerea, totub ŋitim keŋ aŋuna ka akikoŋ a ŋina abu iŋes kikoŋ neni ka Akuj.

¹⁹Todolo ikes Epeso, tolot Paulo bon losinagoga akiyan ka Ŋiyudayan.

²⁰Kiŋitakis ikes iŋes akiboi ekaoyan ka ikes, nai abu nyecamu.

²¹Nai ani erotokini iŋes, tolimok ikes tema, “Aboŋuni ayoŋ neni kus, erae kerae acamit ka Akuj.” Todok nai iŋes ameeli alo Epeso, toesik Prisila ka Akwila a nen.

²²Ani edoli iŋes Kaisaria, tolot Yerusalem akimal atukot ŋina a ŋikanupak; tolot nai Antiokio.

²³Ani kedau iŋes apaki adio a nen, torotok tolot kirimo nakwapin ŋuna a Galatia ka Pirigia, kisimukek ŋikanupak daadaŋ.

²⁴Apaki ŋin, bu lotaun ŋolo ke Epeso Eyudayat ŋolo anyaritae Apolo, ŋolo edounitoe alo Alekisandaria. Ayeni iŋes erwor nooi, ayeni daŋ Ŋakigireta nooi.

²⁵Kitatamitae iŋes ejok Erot ŋolo ke Ekapolon. Etatami iŋes ŋakiro a Yesu alopite a ŋolo eyookino ka alelakinit nooi; nai ayeni iŋes ebatisimu a Yoana bon.

²⁶Kisyak nai iŋes erwor alosinagoga pa ekuryanit. Ani iirarete Prisila ka Akwila iŋes, tonyaraiyasi iŋes, tolimokis Erot ŋolo ka Akuj alopite a ŋolo iyookino adepar.

²⁷Ani etyakuni Apolo alosit Akaia, kisimukekis ŋikanupak ŋulu a Epeso iŋes alosit, kigirakis ŋabaruwae neni a ŋikanupak a ŋulu alo Akaia akijaun iŋes aina. Ani edoli iŋes inaa, kiŋarak iŋes nooi Ŋikristo ŋulu keris keruworosi ŋikanupak anajokis a ŋina ka Akuj.

²⁸Anerae anakimoco keŋ ka Ŋiyudayan alokiŋaren ŋituŋa, abu kilou ikes, kitoodiu a Nakigireta ebe Yesu iŋes erae Kristo.