Read ngakarimojong Ŋitic. 19 Bible Online

Ŋitic. 19 - ngakarimojong bible

Ŋitic. 19

¹Ani eriŋa Apolo eyai Korinto, kirimo Paulo nakwapin ŋuna a Galatia ka Pirigia, todol tari Epeso. Toryamu iŋes aina ŋikasyomak ŋidi,

²kiŋit ikes tema, “Ipotu iyes toryamut Etau ŋolo Asegan apaki ŋina inupyata iyes a?” Toboŋokis ikes temasi, “Nyiirara isua tari atemar eyai icebore ŋini enyaritae Etau ŋolo Asegan.”

³Kiŋit Paulo ikes tema, “Alibatisimu nai ikibatisatere iyes?” Toboŋokis ikes temasi, “Arae ebatisimu a Yoana.”

⁴Tema nai Paulo, “Abu Yoana kibatisa a ebatisimu a ŋolo kiyet ŋasecisya; nai alimonokini iŋes ŋituŋa akinup ŋolo ebuni alokaku keŋ, iŋes Yesu.”

⁵Ani iirarete ikes ŋun, kibatisae ikes alokiro ke Ekapolon Yesu.

⁶Kidokok nai Paulo ŋakan keŋ neni kec, min Etau ŋolo Asegan neni kec; kirworikis ikes ŋaŋajepa ŋuna agelegelya, todwara ŋakiro ŋuna ka Akuj.

⁷Aapikinit ekimar a ŋikilyok a ŋul ŋitomon ka ŋiarei.

⁸Torubak Paulo elosenene losinagoga; ŋilapyo ŋiuni irworo lotuŋa pa ekuryana, kisimoco ikes iwarit akitunup ikes ŋakiro ŋuna ka Apukan ka Akuj.

⁹Nai esyaaka ŋice jik, nyenupa; ido irworotor Erot ŋolo ke Ekapolon alopite a ŋolo aronon alokiŋaren atukot daadaŋ. Aŋun, toesik Paulo ikes, totyakaros ka ŋikasyomak aneni kec. Anyoun apaki ŋin, erworo iŋes jwi jwi alokai a Tiranus neni a ŋituŋa.

¹⁰Kitiya iŋes ŋun ŋikaru ŋiarei, kisiira Ŋiyudayan ka Ŋigirik daŋ alo Asia ŋakiro ŋuna ke Ekapolon.

¹¹Etiyae Akuj ŋakujuwuanisya ŋuna ailiilok aneni a Paulo.

¹²Ayaununuyete ŋituŋa neni a ŋikadyakak ŋakitambarae ka ŋarapeta ŋuna keris Paulo kisitiya, kiritanarere ŋidekesyo kec ka kitorotonokinere ŋipyan aneni kec.

¹³Kikatakis nai Ŋiyudayan ŋice, ŋulu erimito kiritanarete ŋipyan, akisitiya ekiro ŋolo ke Ekapolon Yesu akiritanarya ŋipyan. Abasi ikes lopyan, “Akalimokini ayoŋ iyoŋ alokiro a Yesu, a ŋolo iserae Paulo ŋakiro keŋ, tolot.”

¹⁴Aya daŋ ŋisapa ŋikanikaarei ŋulu ke Eyudayat a ŋolo anyaritae Sikepa ŋolo arae esacaradoti ŋolo apolon. Etiyaete ikes daŋ ŋakiro ŋun.

¹⁵Nai tema ekipye neni kec, “Ayeni ayoŋ Yesu ka ayeni Paulo; nai ataŋae bo iyes?”

¹⁶Toboŋ ekile ŋolo ayai ekipye neni keŋ, kitijik ikes ka aryenyeo, kilou ikes. Toema ikes daadaŋ alokai ekoris ŋilowi ka eyakatar ŋaruma.

¹⁷Toyenut Ŋiyudayan ka Ŋigirik daadaŋ ŋulu alo Epeso ŋakiro ŋun, tokuryaketa daadaŋ, kitopoloosi ekiro ŋolo ke Ekapolon Yesu.

¹⁸Apotu ŋikanupak ŋulu alalak tolimonosi alokiŋaren ŋituŋa ŋakiro ŋuna aronok, ŋuna sek keris ikes kitiyata.

¹⁹Yaut ŋikalalak ŋulu sek arae ŋikekukujak ŋikitaaboi kec iwapei kicunyakis alokiŋaren ŋituŋa daadaŋ. Kimoriut ikes ebei ŋolo a ŋikitaaboi, todol daadaŋ ŋisilipae ŋalipyo ŋatomonikan.

²⁰Alopite a ŋol, abu akirot ŋina ke Ekapolon kiyatakin nooi ka kielakin nakwapin.

²¹Ani kitiyakinosi ŋakiro ŋun, totyaku Paulo alosit Makedonia ka Akaia, tolot nai Yerusalem. Tolimu iŋes tema, “Ani kadau ayoŋ ayakaun nen, itemokino oanyu Roma daŋ.”

²²Kiyakiya iŋes kiŋaren ŋikeŋarakinitok keŋ ŋiarei, Timoteo ka Erasto, toloto Makedonia; eriŋa iŋes iriyat alo Asia.

²³Arae apaki na ayakar aruruma ŋina apolon Epeso aŋuna ke Erot a ŋolo ke Ekapolon.

²⁴Ayai nen eceketyekan ŋisilipae, ŋolo anyaritae Demetrio, ŋolo etyeki ŋitorubei ŋulu ka akai a ŋolo ka akuj a ŋina anyaritae Artemis. Ayaununui akicuruta keŋ epoida ŋolo alalan nooi neni a ŋiketiyak.

²⁵Tonyarau iŋes ŋiketiyak keŋ iwapei ka ŋuluce daŋ ŋulu etiyaete etic ŋolopei ŋol, tolimok ikes tema, “Ŋikilyok, iyenete iyes atemar neni itorunit ebari yok lotic lo.

²⁶Iteete ka iirasi iyes ŋilopeyek Paulo lo. Ebala iŋes ebe nyerae ŋakujo ŋuna itiyaunito ŋituŋa ŋakujo tari iwadio ka etunup ŋituŋa daadaŋ a ne alo Epeso ka akwap ŋina ka Asia daadaŋ.

²⁷Iŋes nai atemar alomu neni aronon; eryamuni akicuruta yok ekiro ŋolo aronon. Meere ŋun daŋ bon, eruwor akoŋinait akai ka akuj a ŋina enyaritae Artemis ka akuj yok ŋina apolon, edaun daŋ arwonu keŋ--ŋina ilipyata ŋituŋa alo Asia ka anakwapin a daadaŋ iŋes!”

²⁸Ani iirarete ŋasepico ŋakiro ŋun, toŋoa nooi, kisyakis ecelet ebasi, “Epol Artemis ŋina a Epeso!”

²⁹Kiguryakis ikes etaun daadaŋ. Kikamut ikes ŋirukitos a Paulo ŋiarei Gaio ka Aristako, ŋulu arae Ŋimakedoniyae, yaasi neni ebolyare.

³⁰Acamit Paulo alomar tooma nasepic, nai nyecamakis ŋikanupak iŋes.

³¹Ŋikapolok daŋ ŋice ŋulu araakasi ŋikonei keŋ, kiyakikis iŋes akirot ŋina adyekitotor nyeloma neni ebolyare.

³²Apaki ŋin, egurya eikiiko nooi a nen; acelasi ŋice ŋakiro ŋace, tocelas ŋice ŋace ŋuna agelaaka, anerae pa ayenete ŋulu alalak ŋakiro ŋuna atukokinitere ikes.

³³Toreiyasi Ŋiyudayan Alekisanda kiŋaren ŋituŋa. Ani isimukekinete ŋituŋa iŋes akirworikin, kikia Alekisanda akan keŋ, ikotere eiunor iŋes.

³⁴Nai ani eyenunete ikes atemar arae iŋes Eyudayat, tocela ikes ŋakiro ŋapei, yaasi ŋisaae ŋiarei ebasi, “Epol Artemis ŋina a Epeso!”

³⁵Kelunyar apaki ŋina aoyan, kisililiŋ ekaran ŋolo ke etaun ikes tolimok tema, “Ŋikilyok ŋulu ke Epeso, eyenete ŋituŋa daadaŋ atemar Epeso iŋes erae eketen akai ŋina ka akuj a ŋina enyaritae Artemis a ŋina apolon ka etorube keŋ ŋolo adouni anakuj.

³⁶Emam ituŋanan ŋini epegi ŋakiro ŋun. Aŋun, itemokino iyes kililiŋa, nyitiyata idiobore ka atipei.

³⁷Iyaut iyes ŋikilyok lu ne tari pa erae ŋikokolak ŋulu a ŋakais a ŋuna ka akuj yok kori pa iyanyito akuj yok.

³⁸Ani kire kisitakinito Demetrio ka ŋiketiyak keŋ idiotuŋanan, eyakasi ŋirwa ŋulu iikiikere ka eyakasi ŋikatubok; epedorete ikes akisitanakin aina.

³⁹Nai ani keyai ibore ice ŋini icamito iyes, esubakinio aloikiiko a ŋolo a ŋituŋa yok.

⁴⁰Anerae epedoryo akisitakin iwon aŋuna ka aruruma a ŋina etiyakin nakoloŋit na. Emam ŋakiro ŋuna ejokya acela na ka nyikipedori iwon alimun adiokirot ŋina ikigaŋi iwon aŋuna keŋ.”

⁴¹Ani kirwor ŋun, kiela ekaran ŋituŋa.