Read ngakarimojong Ŋitic. 2 Bible Online

Ŋitic. 2 - ngakarimojong bible

Ŋitic. 2

¹Ani edoli akoloŋit ŋina a Pentekoste, acunakina ŋikanupak daadaŋ iwapei.

²Tonaŋakin ikes atipei eruye ŋolo esibit ŋolo ke ekuwuam a ŋolo apolon ebuni alokidiama, kiryam tooma akai ŋina aya ikes.

³Kiŋolikis nai ikes ŋiboorei ŋulu ekote ŋakimia ielakin pena neni kec a daadaŋ.

⁴Kilelebikin Etau ŋolo Asegan neni kec daadaŋ, togeut akirwor ŋaŋajepa ŋuna agelegelya, ikwaŋina ainakinitor Etau ŋolo Asegan ikes akirwor.

⁵Ayakasi nai nen Ŋiyudayan ŋulu eboiyete alo Yerusalem, ŋulu ainakina neni ka Akuj; aponito ikes alobukui a daadaŋ a ŋulu anakwap.

⁶Ani iirarete ikes eruye ŋol, tocunun asepic a ŋituŋa ŋina alalan, toumokis ikes daadaŋ, anerae ŋinituŋanan alokidiŋ kec apupi Ŋikiyakia irworosi aŋajep keŋ.

⁷Toumokis ikes nooi temasi, “Erae ŋituŋa lu ŋulu irworosi Ŋigalileyan.

⁸Kaanukiro nai ikipupio iwon ikes irworosi ŋaŋajepa yok?

⁹Ikiponit iwon anakwapin a nu: alo Parisia, alo Media ka Elam; alo Mesopotamia, Yudaya ka alo Kapadokia, Ponito ka Asia;

¹⁰alo Pirigia, Pampilia ka Ijipit ta ŋiwaetin a Libia ŋulu eya diye Kurene. Ikirae iwon ŋice ŋulu alo Roma,

¹¹Ŋiyudayan ka ŋulu nyerae Ŋiyudayan ŋulu ikicamu anupit kec. Ikiponit bo iwon ŋice alo Kirete ka Arabia--nai opupete bo iwon daadaŋ ikes irworosi a ŋaŋajepa yok ŋakiro ŋuna ka aumokin ŋuna etiyak Akuj!”

¹²Aŋuna ka aumokinit ka ataaŋaŋ kec, kisyakis akiŋitanar make ebasi, “Anukiro nu?”

¹³Nai tokyenatar ŋice ikes temasi, “Emerasi ŋituŋa lu!”

¹⁴Abu Petero towua ka Ŋikiyakia ŋuluce ŋulutomon ka epei, tosodi tocelu tema, “Ŋituŋa ŋulu a Yudeya ka iyes daadaŋ ŋulu iboiyete alo Yerusalem, toyenutu nu ka topupokisi ŋakiro kaŋ kojokan!

¹⁵Nyemerasi ŋituŋa lu ikwaŋina itamakinitotor iyes; eriŋa erae ŋisaae ŋiuni ŋulu ka ataparacu.

¹⁶Nai erae ŋuna iteete iyes tokona ŋuna erworit ekadwaran Yoel ebala:

¹⁷‘Ebala Akuj, etiyakini ayoŋ nu alorwa a ŋulu esidyok; eyakikini ayoŋ Etau kaŋ lotuŋa daadaŋ. Edwarete ŋikusidwe ŋulusapa ka ŋulupesur, eanyunete ŋikusisorok ŋatakanikineta ka irujaete ŋikasikou kus.

¹⁸Kire tari ŋiketiyak kaŋ, ŋikilyok ka ŋaberu, eyakikini Etau kaŋ ŋirwa ŋul, ido todwara.

¹⁹Etiyakini ayoŋ ŋakujuwuanisya alokidiama ka ŋaumonokineta alokwap: eyakaun ŋaokot ka akim ta apuru ŋina alalan nooi;

²⁰isiryonio akoloŋ cuc, ka itereŋio elap puu kikok ŋaokot, eriŋa nyedolo Akoloŋit ŋina apolon nooi ŋina ke Ekapolon.

²¹Ido nai ituŋanan daadaŋ ŋini enyarit ekiro ŋolo ke Ekapolon, eiunio.’

²²Topupokisi ŋakiro nu, iyes ŋituŋa a Isirael! Arae Yesu ŋolo a Nasaret ituŋanan ŋini eyakuunit Akuj. Abu iŋes kiteyenik ŋakiro neni kus alotooma ŋakujuwuanisya ka ŋaumonokineta ta ŋakitoodikineta ŋuna abu Akuj kitiya alotooma keŋ. Iyenete iyes ŋilopeyek ŋun.

²³Aris Akuj anacamit ka anaosou keŋ ka alope ketyaku atemar itemokino ikirikokin iyes Yesu ka toara iŋes, anajalakin ŋituŋa ŋulu asecak ibubukinete iŋes lomusalaba.

²⁴Nai abu Akuj kiteyaru iŋes alokatwak; tolacu iŋes anapipilu a ŋina ka atwanare, anerae pa apedori atwanare akien iŋes.

²⁵Anerae erworit koloŋ Daudi ŋakiro keŋ ebala, ‘Ŋirwa daadaŋ, ete ayoŋ Ekapolon alokiŋaren kaŋ; eyai iŋes nakan kaŋ ŋina aloteten, ikotere nyeryaŋiryaŋakin ayoŋ.

²⁶Aŋun, elelyani ekaatau ka ikipuro iyoŋ etoil kaŋ. Ayeni ayoŋ atemar atwani, nai ayakar ayoŋ akigeno;

²⁷anerae nyikimyekini iyoŋ ayoŋ anakibois a ŋikatwak, kori nyicamakini iyoŋ eketiyan kon ŋoloseuna ebosi.

²⁸Ikitoodik iyoŋ ayoŋ ŋirotin ŋulu elosete nakiyar ka eketelelyani ayoŋ nooi neni ikirukitor ka iyoŋ.’

²⁹“Ŋikaitotoi: itemokino ayoŋ ekesileerek iyes ŋakiro ŋuna a papaa yok a Daudi. Abu iŋes totwan ka aponi tonukae, ido eyai alyal keŋ tari tokona ne neni ikiya iwon.

³⁰Ayeni Daudi atemar, aris Akuj kikoŋ atemar eturuwori lopapait keŋ epei erwosit, kilunyokin lokicoloŋ keŋ.

³¹Aŋuna araakar Daudi ekadwaran, toyenu ŋuna alosi Akuj akitiyakin alorwa a ŋulu alokiŋaren, kirwor ŋuna ka ayarun a Kristo tema, ‘Nyimyekina Akuj iŋes anakibois a ŋikatwak, nyebosa akuwan keŋ analyal.’

³²Eteyaru Akuj Yesu ŋolopei ŋol alokatwak ka ikirae isua daadaŋ ŋisuudae ŋulu a ŋakiro a ŋun.

³³Adau Akuj Papa akitopoloor iŋes, ewuak lowae keŋ ŋolo aloteten ka ainakin iŋes Etau ŋolo Asegan ikwaŋina aris kiikinere; ido ŋuna iteete iyes ka topupete tokona, erae ainakinet ŋina ke Etau a ŋolo Asegan a ŋolo ikibukok Yesu isua.

³⁴Anerae nyeloto Daudi nakuj, nai abu tema, ‘Atema Ekapolon neni ke Ekapolon kaŋ, kiboikin teten kaŋ,

³⁵akitodol neni ewuakinia ayoŋ ŋimoi kon kwap ŋakejen kon.’

³⁶Aŋun, itemokino tokona ŋituŋa a Isirael daadaŋ toyenut atemar, Yesu ŋolo ibubukinete iyes lomusalaba, iŋes abu Akuj kituruwo Ekapolon ka Kristo!”

³⁷Ani iirarete ŋituŋa ŋakiro ŋun, tonomosi ŋakiro ŋitai kec, tosodo kiŋita Petero ka Ŋikiyakia ŋuluce temasi, “A ŋikaitotoi, ikikokini tokona isua ai?”

³⁸Tolimok Petero ikes tema, “Tokiwa ŋasecisya kus, kibatisae ŋinituŋanan alokidiŋ kus alokiro a Yesu Kristo, ikotere isyoniyo ŋasecisya; ido toryamut ainakinet ŋina ka Akuj--Etau ŋolo Asegan.

³⁹Anerae arae akiikinet ka Akuj ŋina kus ka ŋikusidwe ta neni a ŋituŋa a daadaŋ a ŋulu elwaka a ŋulu enyaraunit Ekapolon yok Akuj neni keŋ.”

⁴⁰Kiteyenik Petero ikes ŋakiro ŋuna alalak, kisimukek tema, “Toiunos anakisicanio a ŋina eryamunete ŋituŋa ŋulu aronok ŋulu ka anyamet a na!”

⁴¹Tonupa ŋituŋa ŋulu alalak ŋakiro keŋ kibatisae, ido kiyatakin lokanupak ŋituŋa ŋulu adolito ŋalipyo ŋauni akoloŋit ŋin.

⁴²Torubakis ikes daadaŋ epupete ŋakiro ŋuna etatamete Ŋikiyakia, togeut ikes alosenen natukot ŋina a ŋikanupak akimuj kaapei ka akinumunum Akimuj ŋina ke Ekapolon ta akilipenen.

⁴³Etiyasi ŋakujuwuanisya ka ŋaumonokineta ŋuna alalak aneni a Ŋikiyakia, toumokis nai ŋituŋa daadaŋ a ŋun.

⁴⁴Torubakis ŋikanupak daadaŋ erukito ka emorete ŋiboro kec.

⁴⁵Agyelanarete ikes ebari ka ŋiboro kec, tokorakis ŋisiliŋa neni a ŋinituŋanan lopite ŋolo eitanitor iŋes.

⁴⁶A ŋinakoloŋit, apotu ikes torubakis iryamunun kaapei Kai ka Akuj, akimuj kaapei ka akinumunum Akimuj ŋina ke Ekapolon alorerya kec. Amorete ikes akimuj ka alelyan ka arimao;

⁴⁷epurosi ikes Akuj ka tominakinito ŋituŋa daadaŋ ikes. A ŋinakoloŋit, eyatanakini Ekapolon natukot kec ŋulu aiununuyo.