Read ngakarimojong Ŋitic. 20 Bible Online

Ŋitic. 20 - ngakarimojong bible

Ŋitic. 20

¹Ani kedaun aruruma, tonyarau Paulo ŋikanupak iwapei, kisimukek ikes, ido tolimok tema, “Ikianyun.” Torotok nai iŋes Makedonia.

²Ani kedau akirim ŋitela ŋul daadaŋ, kisimukek ŋikanupak a nen, ido tolot Akaia.

³Kiriya iŋes aina ŋilapyo ŋiuni. Ani eriŋa iŋes itemonokin alosit ka ameeli Siria, toyenu atemar etukosi Ŋiyudayan aŋuna keŋ. Aŋun, totyaku iŋes akitor nabo Makedonia eboŋori.

⁴Torukosi ŋituŋa lu ka iŋes: Sopate ŋolo alo Berea--lokoku a Piro, Aristako ka Sekondo ŋulu alo Tesalonika, Gaio ŋolo alo Derube, Tuciko ka Tropimo ŋulu alo Asia ka Timoteo.

⁵Toberaros ikes kiŋaren ikidarut isua alo Toroas.

⁶Ani edaun ŋasuban ŋuna a ŋamugati a ŋuna emam ŋakinyalet, torotokinoe isua ka ameeli alo Pilipi. Kelunyarosi ŋirwa ŋikan, torukaunae ikes alo Toroas, kiriyae aina esabit epei.

⁷Akoloŋit ŋina ke Esabit, apaki ŋina ikiyakar isua iwapei akinumunum Akimuj ŋina ke Ekapolon, abu Paulo kirwor neni a ŋikanupak a ŋulu a nen akitodol kidiŋ akuwar, aŋuna arotokinitor iŋes taparacu keŋ.

⁸Ayakasi ŋitaae ŋulu alalak nagule ŋina alokidiama, ŋina ikitukokina isua.

⁹Eboi esorokit ŋolo anyaritae Eutiko alodirisa; ikwaŋina arubakinitor Paulo irworo, kilurakin nooi Eutiko akitodol neni ajotooror. Kimasun kwap alodirisa a ŋolo anagule a ŋina ayai kidiama ŋunaarei. Toryamunae iŋes etwanit.

¹⁰Todoka nai Paulo kwap, torwakin neni keŋ, totun iŋes, tolimu tema, “Nyikibul, eyari iŋes!”

¹¹Toboŋo iŋes kidiama kai, tokorak Akimuj ŋina ke Ekapolon kimuja kaapei. Kirworo iŋes ka ikes ekaoyan akitodol nakipiripirunet akoloŋ, ido torotok.

¹²Yaasi ikes esorokit lore eyari ka alakara ikes nooi.

¹³Tolotoi isua alo Toroas kiŋaren, todokae ameeli tari Asos, kimyekinae Paulo ebunit a ŋakejen a nen, aneni atyakunitae isua akitodokia iŋes ameeli; anerae aris iŋes kikilimok isua akitiya ŋun.

¹⁴Ani ikiryamakin iŋes ka isua Asos, kitodokakinae isua iŋes ameeli, tolotoi tari loculat Mitilene.

¹⁵Torotokinoe a nen, kitoroi taparacu iwalari diyete eculat ŋolo anyaritae Kios. Kelunyar akoloŋit apei, todolunoe isua loculat Samo; ani akoloŋit ŋina atupakini ŋin, todoloe Mileto.

¹⁶Aris Paulo ketyaku adepar Epeso, ikotere nyicanicanaar adiopaki alo Asia. Ekirikira iŋes erae kepedori adolun Yerusalem nyedolo akoloŋit ŋina a Pentekoste.

¹⁷Kiyaku Paulo akituk alo Mileto tari Epeso alimokin ŋikatukok ŋulu ka atukot a ŋikanupak akisiryam iŋes.

¹⁸Ani edolunete ikes, tolimok iŋes ikes tema, “Iyenete iyes ŋilopeyek epite ŋolo ikirukitor iyes ka ayoŋ apaki daadaŋ, ameun akoloŋit ŋina adolunio ayoŋ Asia.

¹⁹Abu ayoŋ etiyanak Ekapolon anapatanu tari anapakio a ŋuna egworor ka ŋuna aryamunitor ŋican, ikwaŋina arubakinitotor Ŋiyudayan etukosi aŋuna kaŋ.

²⁰Iyenete iyes atemar abu ayoŋ nyemunon idiobore ŋini eyai epoida aneni kus, abu okolimonok ka eketatamik anatukon ka alorerya kus.

²¹Abu ayoŋ eteyenik Ŋiyudayan ka Ŋigirik daŋ atemar etemokino ikes tokiwa ŋasecisya kec alokiŋaren Akuj ka tonupa Ekapolon yok Yesu Kristo.

²²Nai tokona, anakipup Etau ŋolo ka Akuj, alosi ayoŋ Yerusalem pa ayeni ŋuna akatakanikinete ayoŋ aina.

²³Ŋuna ayeni ayoŋ ikes nu: eketeyenunui Etau ŋolo Asegan ayoŋ alotaunio a daadaŋ atemar ekedarit ayoŋ alomar mabus ka aryamun ŋakisicaneta.

²⁴Nai aneni kaŋ nyepol akiyar nooi akilo aŋetakin akerit na ŋina erae etic ŋolo akainakinit Ekapolon Yesu ayoŋ akitiya. Etic ŋol iŋes akiteyenun Ŋakiro ŋuna Ajokak ŋuna ka ajokis a ŋina ka Akuj.

²⁵“Ayeni ayoŋ tokona atemar iyes daadaŋ ŋulu adau ayoŋ alimonokin ŋuna ka Apukan ka Akuj, nyikiŋolikinete ayoŋ nabo.

²⁶Aŋun, ekekekini iyes nooi napeikoloŋit na atemar, ani tokona kitutubokinosi iyes Akuj, emam ŋuna akatapito ayoŋ.

²⁷Anerae nyimunono ayoŋ akiserakin iyes ŋuna daadaŋ ecamit Akuj.

²⁸Kimukeuna make ka kiyoko esipan daadaŋ ŋolo ecikak Etau ŋolo Asegan nakan kus. Toraakas ŋikeyokok ŋulu ka atukot a ŋina a ŋikanupak Akuj, ŋina abu iŋes kituruwo ŋina keŋ a ŋaokot a Lokoku keŋ.

²⁹Ayeni ayoŋ atemar ani karotok ayoŋ, epote ŋipeei ŋulu adedeŋak nooi neni kus ka nyeesikinete akinyasun esipan.

³⁰Ebuni apaki ŋina elomuniata tari alokidiŋ kus ŋikalyokonok ŋice ecamito atemar kiwuapakis ŋikanupak ikes.

³¹Aŋun nai, totenito totamunito atemar tari anapakio a ŋuna egworor ayoŋ, abu ekesimukek iyes daadaŋ akuwar ka apaaran, tolunyar ŋikaru ŋiuni.

³²“Nai tokona, ekewuakini ayoŋ iyes nakan ŋuna ka Akuj ka nakiro ŋuna ka ajokis keŋ, ŋina epedori akitogogoŋ ka ainakin iyes ŋarereŋisyo ŋuna iŋadat Akuj aŋuna a ŋituŋa a ŋulu eturuwo iŋes ŋulu keŋ.

³³Iyenete iyes ŋilopeyek atemar nyiwuakina ayoŋ ekibure losilipa a ituŋanan a idio, logolid kori lolowi,

³⁴nai abu ayoŋ a ŋakan kaŋ etiya ka oryamu ibore daadaŋ ŋini ikiitanit ayoŋ ka ŋirukitos kaŋ.

³⁵Eketoodik ayoŋ iyes alopitesyo a daadaŋ atemar itemokino ŋinituŋanan kitiya ka agogoŋu, ikotere epedori akiŋarakin ŋulu epalag anatamunit ŋakiro ŋuna abala Ekapolon Yesu, ‘Eyai arereŋu nooi nainanakin akilo naryamunun.’ ”

³⁶Ani irikakini Paulo erwori, toryediko kaapei ka ikes daadaŋ, kilipa.

³⁷Totunakinos ikes daadaŋ neni keŋ enuyete ebasi, “Tolot neni ajokan.”

³⁸Egworosi ikes ka eyaloloŋete nooi a ŋakiro a ŋuna aris iŋes kelimu atemar nyiŋolikinete ikes iŋes nabo. Kitenakis nai iŋes nameeli.