Read ngakarimojong Ŋitic. 22 Bible Online

Ŋitic. 22 - ngakarimojong bible

Ŋitic. 22

¹“Ŋikaitotoi ka atapapa, topupokinae ayoŋ erworo aŋuna kaŋ alokiŋaren kus!”

²Ani iirarete ikes iŋes irworo a Ŋayudayan, kililiŋa ikes totakinos cek. Torubak Paulo irworo, tema,

³“Arae ayoŋ Eyudayat ŋolo ekedounitoe alo Taso anakwap a ŋina a Cilicia, nai eketopolounitoe a ne alo Yerusalem, arae ekasyoman ŋolo a Gamaliel. Abu iŋes eketatam ayoŋ ejok epite ŋolo itemokino ewuapitor Ŋikisila ŋulu atapapaa yok ka abu ayoŋ olelaki Akuj nooi ikwapei tokona ilelakinitotor iyes daadaŋ a ne.

⁴Abu ayoŋ esican ka oar ŋituŋa ŋulu ewuapito Erot ŋolo ke Ekapolon Yesu. Abu ayoŋ ekamununu ŋikilyok ka ŋaberu oyaana mabus.

⁵Epedori Esacaradoti ŋolo Apolon nooi ka atukot daadaŋ akisuuda atemar erworo ayoŋ ŋuna a kire. Abu ayoŋ oryamu aneni kec ŋabaruwae ŋuna losyet neni a ŋikaitotoi a ŋulu arae Ŋiyudayan alo Damasko. Ido abu olot inaa akikamun ŋituŋa ŋul, ikotere oyau ikes Yerusalem eenen a ŋiriko, kisicanae.

⁶“Ani alosi ayoŋ aapiyari Damasko kidiŋ apaaran, toŋesun atipei anakuj akica ŋina apolon nooi kinuak neni ayai ayoŋ.

⁷Emasakin ayoŋ kwap, eira etoil ebala neni kaŋ, ‘Saulo, Saulo! Kaanukiro ikisicanitor iyoŋ ayoŋ?’

⁸Eŋit ayoŋ otema, ‘Ŋae iyoŋ, Ekapolon?’ Toboŋok iŋes tema, ‘Arae ayoŋ Yesu ŋolo a Nasaret, ŋolo isicanit iyoŋ.’

⁹Toanyuwasi ŋikilyok ŋulu ikirukit ka ayoŋ akica, nai nyiirara ikes etoil a ŋolo erworo neni kaŋ.

¹⁰Eŋit ayoŋ otema, ‘Nyo itemokino ayoŋ etiya, Ekapolon?’ Tema Ekapolon neni kaŋ, ‘Tonyou toloma Damasko, ikilimokinio iyoŋ aina ŋakiro daadaŋ ŋuna aseu Akuj atemar kitiya iyoŋ.’

¹¹Kabu ayoŋ omudukan aŋuna ka akica a ŋina emilia nooi; aŋun, apotu ŋirukitos kaŋ ekekamut akan, okorikosi Damasko.

¹²“Ayai Damasko ekile ŋolo anyaritae Anania, ŋolo ajokan, ŋolo ainakina neni ka Akuj. Ewuapit iŋes Ŋikisila a Moses ka akerito iŋes Ŋiyudayan daadaŋ ŋulu alo Damasko.

¹³Abu iŋes bu neni kaŋ, towo alodiyete kaŋ tema, ‘Lokaato Saulo, kiŋolik nabo!’ Esaa ŋolopei ŋol, okienyu ayoŋ, oanyuwa iŋes.

¹⁴Tema nai iŋes, ‘Ikiseu iyoŋ Akuj ŋina atapapaa yok ayenun acamit keŋ, aanyun Eketiyan keŋ ŋolo iyookino ka akiirar iŋes irworo a etoil keŋ ke elope.

¹⁵Anerae iruwor iyoŋ esuuda keŋ alotooma alimokin ŋituŋa daadaŋ ŋuna ianyu iyoŋ ka ŋuna iira.

¹⁶Nyo nai tokona eriŋa iyoŋ idarit? Tonyou, ikibatisae ka kilip alokiro a Yesu, ido kisyoni ŋasecisya kon.’

¹⁷“Oboŋo ayoŋ Yerusalem. Ani akoloŋit apei eriŋa elipi alo Kai ka Akuj, bu atakanikinet neni kaŋ,

¹⁸oanyuwa Ekapolon ebala, ‘Kiburuburak atipei arotokin alo Yerusalem, anerae nyecamunete ŋituŋa a ne akisuuda kon aŋuna kaŋ.’

¹⁹Oboŋok ayoŋ otema, ‘Ekapolon, eyenete ikes nooi atemar abu ayoŋ olosenenee losinagogae akikam ka akibuŋa ŋulu ikinupito iyoŋ.

²⁰Ani ŋina aarere Stepano ŋolo arae esuuda kon, ayai ayoŋ elope nen etojokite atwanare keŋ ka eŋadat ŋilowi a ŋulu aarete iŋes.’

²¹Tema Ekapolon neni kaŋ, ‘Tolot, anerae ekeyakiyari ayoŋ iyoŋ neni elwana nooi, lotuŋa ŋulu nyerae Ŋiyudayan!’ ”

²²Topupokis ŋituŋa Paulo tari neni alimunio nu; togeut nai acela nooi temasi, “Tolemasi iŋes! Toara iŋes! Nyitemokino iŋes toyar!”

²³Acelasi ikes, kiwakiwakete ŋilowi kec, kielete ŋalup kidiama.

²⁴Tolimok ekapolon a ŋisigarya a Roma ŋisigarya keŋ ayaar Paulo lolain, kicikak ikes akibuŋa iŋes nooi, ikotere eyenunere ŋakiro ŋuna acelatar Ŋiyudayan neni keŋ ikona.

²⁵Nai ani kedaut ikes akien iŋes a ŋarukanes, tolimok Paulo ekapolokiniton ŋisigarya amiat ŋolo awuoi alodiye tema, “Ikicamakinit iyoŋ ekisil akibuŋa ituŋanan ŋini a Roma, tari eriŋa nyetubokina a?”

²⁶Ani iirari ekapolokiniton ŋisigarya amiat ŋakiro ŋun, tolot neni a ŋolo apol akilo iŋes, kiŋit tema, “Iyeni iyoŋ ŋakiro ŋuna itiyae iyoŋ a? Erae ekile lo ituŋanan a Roma!”

²⁷Aŋun, tolot ekapolon ŋol elope neni a Paulo, kiŋit tema, “Tolimokinae ayoŋ, irae iyoŋ ituŋanan ŋini a Roma a?” Toboŋok Paulo tema, “Ee.”

²⁸Tolimu ekapolon tema, “Abu ayoŋ oruwor ituŋanan ŋini a Roma anakitac ŋisiliŋa ŋulu alalak.” Tema Paulo, “Nai arae ayoŋ ŋolo a Roma anauruunet.”

²⁹Kikutukutoosi atipei ŋikilyok ŋulu sek alosete akiŋitiŋit Paulo ŋakiro. Tobul ekapolon a ŋisigarya nooi eyenuni atemar arae Paulo ituŋanan a Roma ka aŋuna abunio iŋes toen Paulo a ŋiriko.

³⁰Nai acamit ekapolon a ŋisigarya aanyun kire ŋakiro ŋuna esitakinitotor Ŋiyudayan Paulo; aŋun, abu iŋes taparacu keŋ tolaca ŋiriko aneni a Paulo, tocunak ŋisacaradotin ŋulu apolok ka Atukot daadaŋ. Ya nai iŋes Paulo kitowuo alokiŋaren kec.