Read ngakarimojong Ŋitic. 27 Bible Online

Ŋitic. 27 - ngakarimojong bible

Ŋitic. 27

¹Ani etubuni Pesto atemar adol apaki ŋina erotokinere isua Italia, apotu ŋikapolok a Ŋiromanin alo Kaisaria inakis Paulo ka ŋimabus ŋice neni a Yulio, a ŋolo arae ekapolokiniton ŋisigarya amiat ŋulu anyaritae “Ajore ŋina ke ekepukan.”

²Todokae isua ameeli ŋina abunit alotaun Adaramitium, ŋina alosi lotaunio ŋulu ka Asia ŋulu aya lokipetot ŋolo ka anam. Ikirukit isua ka Aristako, ŋolo auruunitae alo Makedonia, a ŋolo a Tesalonika.

³Todoloe isua lotaun Sidon akoloŋit ŋina atupakini. A nen, torimaan Yulio aneni a Paulo, tocamak iŋes alosit aanyun ŋikonei keŋ, ikotere eryamuni akiŋarakinet ŋina eitanit iŋes.

⁴Kipororoe isua a nen, tolotoi ikiteriboorit ekipetot ŋolo ke eculat a Kupuro, anerae ikibukinit ekuwuam isua.

⁵Ani kedoki isua anam ŋina a Cilicia ka Pampilia, poni lotaun Mira ŋolo anakwap a ŋina a Licia.

⁶Toryamu a nen ekapolokiniton ŋisigarya amiat ameeli ŋina abunit alotaun Alekisandaria, ŋina alosi Italia; tosodi ikitodok isua ameeli ŋin.

⁷Kiyapae isua iwadio ŋirwa ŋulu alalak, ani ekaku todolunoe ka atyonis diyete etaun Kinido. Ikwaŋinapei pa ikitepedorya ekuwuam isua arubakin ikitorit neni ikicamit, ikipotu oloto a ŋun lowae ŋolo alo Kwap ikiteriboorit eculat Kirete, kitoroi neni anyaritae Salomone.

⁸Torubakinae isua ka atyonis enokitoe ekipetot, todolunoe lotaun ŋolo enyaritae “Ŋolo iteere ŋameeli ejok”, neni eapi alotaun a Laseya.

⁹Ikwapei abunio apaki ŋina alalan tolunyar ka aris kelunyar apaki ŋina ka akikany akimuj, togogoŋior alosit ka ameeli, anerae aapuunit apaki ŋina ejoŋoere alosit a ŋameeli. Tolimok Paulo ŋituŋa ŋakiro ŋuna eŋarakinak tema,

¹⁰“Ŋikilyok, ani kikirubak iwon ikilosi, eŋolikinit ayoŋ atemar ikiryamuni iwon ŋican ŋulu apipilak; emunaarosi ameeli kaapei ka ŋiboro ka acepaki ikitwaki iwon daŋ.”

¹¹Nai tomitak ekapolokiniton ŋisigarya amiat ŋuna alimonokinete ekapolokiniton ameeli ka elope ameeli, akilo amitakin ŋuna erworo Paulo.

¹²Aŋuna tari pa ajokya etaun ŋol akiboiyo ŋirwa ŋulu ka alilimu, apotu ŋikalalak temasi torotokinoe a nen, igenosi atemar kori ikidoli Poenikis etaun ece ŋolo alo Kirete, ŋolo eyai kidiŋ Kwap-To ka Kuju-To, ikotere iboiyete a nen ŋirwa ŋulu ka alilimu.

¹³Ŋolopite ageunia ekuwuam ediocici akutun alowae a ŋolo alo Kwap, temasi ŋikilyok kori epedorete ikes akitiya ikwaŋina atubunitotor; kikeut ibore ŋini apotyon ŋini itowuoi ameeli, kitonoko ameeli ekipetot ŋolo a Kirete.

¹⁴Nai tokut atipei ekuwuam ŋolo agogoŋon alowae a ŋolo a Kirete, anyaritae ekuwuam ŋol “Kuju-Kide”.

¹⁵Ani enaŋi ekuwuam ameeli ka agogoŋu, todaun epite ŋolo elosyo lowae ŋolo akutunitor ekuwuam, ido tojamakinae isua akimukekinit kimyekinae ameeli tokuta ekuwuam.

¹⁶Ani itoryo isua diyete ekipetot ŋolo ke eculat a ŋolo cici a ŋolo enyaritae Kauda, topedoroe ka atyonis akiriun atuba ŋina ka ameeli tooma.

¹⁷Ani kedaun akiriun atuba, kilogiloga ŋilopeyek ameeli kec a ŋaunoi. Akerito ikes atemar kori ikilomari lorus ŋolo alokipetot a Libia. Aŋun, tocakut ikes anaŋga ŋina emetor ekuwuam ameeli, kimyekis ekuwuam bon ekutarit ameeli.

¹⁸Torubak ekuwuam ŋolo apolon ekusi; togeut ŋilopeyek ameeli akoloŋit ŋina atupakini akimasanar kiŋa ŋiboro ŋice ŋulu aya nameeli

¹⁹ka akoloŋit ŋinace, kimasasi ikes ŋiboro ŋulukitiyaet ameeli kiŋa.

²⁰Aŋuna adolyo ŋirwa ŋulu alalak pa etakani akoloŋ kori ŋikacer ka torubakinite ekuwuam ekusi nooi, tojoŋoi isua jik akigeno tari iwadio atemar eyaryo.

²¹Aris kelunyar apaki ŋina aoyan nyimuja ikes aŋuna a ŋatyokisyo a ŋun, tosodi Paulo towo alokidiŋ kec tema, “Ŋikilyok, kerae kiirarito iyes ŋakiro kaŋ, pa kerotokinitoe iwon alo Kirete ka pa keryamunitae ŋican lu ŋulu apipilak ka atwakiyar ŋiboro.

²²Nai tokona akadyekit ayoŋ iyes, toena ŋitai; anerae emam ipei daŋ alokidiŋ kus ŋini etwaniari akiyar, nai ameeli bon etwakiaryo.

²³Anerae bien nakwaare, abu emalaika ŋolo ka Akuj a ŋina arae ayoŋ ŋolo keŋ ka ŋina elipi ayoŋ, bu neni kaŋ,

²⁴tema, ‘Paulo, nyikibul! Itemokino iyoŋ towo alokiŋaren ekepukan a Roma. Kiira! Aŋuna kon, eiuni Akuj tari ŋituŋa daadaŋ ŋulu idokito ka iyoŋ ameeli.’

²⁵Aŋun, ŋikilyok, toena ŋitai! Anerae anupit ayoŋ ŋakiro ŋuna ka Akuj atemar ikokinete nenipei akalimokinitere ayoŋ.

²⁶Nai ikikutari ekuwuam iwon neni eyai eculat edio.”

²⁷Aris kelunyarosi ŋisabito ŋiarei ŋulu ageunia ekuwuam ŋolo apolon akikut, ikirimitor isua ananam a ŋina enyaritae Mediteranian. Ani edoli kidiŋ akuwar, temasi ŋikametok ameeli kori keapiar diyete akwap.

²⁸Aŋun, kiyooliyosi ikes nakipi auno ŋina aenikinitae ibore ŋini apotyon, toryamut atemar arae acukul a ŋakipi ŋamitae ŋatomoniomwon. Kelunyar apaki adiouriyen, kitiyata ikes ikoŋinapei, toryamut acukul a ŋakipi erae ŋamitae ŋatomoniuni.

²⁹Tobul ikes temasi kori elosi ameeli anaŋakin neni eya ŋatabab, aŋun kiyooliyosi ikes alokaku ŋiboorei ŋulu apotyok ŋiomwon ŋulu itowuoete ameeli, togata atemar kerae kiwala akwap atipei.

³⁰Ani eriŋa nyiwalara, kikatakis ŋikametok ameeli akisi anameeli esibit elosete akiyatakin kiŋaren ameeli ŋiboorei ŋice ŋulu itowuoete iŋes; nai keris ikes kiyooliyosi atuba nakipi, ecamito alomar tooma keŋ.

³¹Nai tema Paulo neni ke ekapolokiniton ŋisigarya amiat ka neni a ŋisigarya ebe, “Mati kerubakis ŋituŋa lu eyakasi nameeli, nyipedorete iyes aiun.”

³²Tosodo nai ŋisigarya totubo ŋaunoi ŋuna aenito atuba anameeli, kimyekis atuba todoiyo nakipi.

³³Ani eapuuni akiwalar, todyek Paulo ikes daadaŋ akinyam adiokimuj tema, “Iboiyoto iyes ŋirwa ŋitomon ka ŋiomwon nyimuja idiobore.

³⁴Aŋun, akadyekit nai ayoŋ iyes, kimuja adiokimuj; iitanito iyes iŋes aŋuna ka aryamunia agogoŋu ikwapei emamukar tari ipei alokidiŋ kus ŋini ewana.”

³⁵Kedau alimun ŋun, tolemu Paulo amugati, tolakar neni ka Akuj alokiŋaren kec a daadaŋ, tonyilinyili, togeu akimuj.

³⁶Toryamut nai ikes daadaŋ akisimukekinet, ido kimuj ŋinituŋanan akimuj adio.

³⁷Arae ekimar kosi a ŋulu ikiya nameeli ŋamiae ŋaarei ka ŋatomonikanikaarei ka ŋikanikapei.

³⁸Ani kimwoko ikes, kimasasi ŋaganoi kiŋa, ikotere tookiar ameeli.

³⁹Ani iwalari, kiŋolikis ikes akwap, nai nyeyena atemar ai. Nai kiŋolikis agule ŋina ka anam ŋina eleleba asinyon, neni apotu ikes totyakut atemar kirimok ameeli todolere nen.

⁴⁰Aŋun, totubutuboto ikes ŋaunoi ŋuna aenitere ŋiboorei ŋulu itowuoete ameeli, kidoŋo tooma nakipi; ŋinapeipaki, tolacanakis ŋaunoi ŋuna aenito ŋameeta. Kikyaasi nai anaŋga ŋina alokiŋaren ameeli, ikotere ekutarya ekuwuam ameeli kiŋaren, tolot lokipetot.

⁴¹Nai tonaŋ ameeli neni tekeny, towo todaun arotokinet, tobwaŋa ŋikaguragurae a ŋakipi ŋulu elapasi nooi ameeli alokaku.

⁴²Totukut ŋisigarya akiar ŋimabus daadaŋ, ikotere nyelum tari epei, tolot lokipetot, ido toem nariet.

⁴³Nai aŋuna acamitor ekapolokiniton ŋisigarya amiat aiun Paulo, kiretak iŋes ikes akitiya ŋuna atukunito. Tolimok iŋes ŋituŋa ŋulu apedorete akilum akisyaun aporor kiŋa ameeli, tolumo toloto lokipetot.

⁴⁴Ani ekaku, totupakis ŋuluce imiidikina nabaoi kori ŋabwaŋabwaŋaet ŋuna ka ameeli. Arae lo epite ŋolo adolere isua daadaŋ lokipetot emam ŋace.