Read ngakarimojong Ŋitic. 5 Bible Online

Ŋitic. 5 - ngakarimojong bible

Ŋitic. 5

¹Ayai ekile ŋolo anyaritae Anania ka aberu keŋ Sapira. Togyelasi ikes daŋ emanikor kec ece,

²nai abu Anania kiŋadaiya ŋisiliŋa ŋice, toyeni aberu keŋ daŋ; tosodi inak ŋuluce neni a Ŋikiyakia.

³Nai tolimok Petero Anania tema, “Anania, kaanukiro imyekinia iyoŋ Satan ilelebikin lotau kon, ido tomodik iyoŋ Etau ŋolo Asegan, aŋuna iwuaya ŋisiliŋa ŋice ŋulu igyelarya iyoŋ emanikor?

⁴Ani eriŋa iyoŋ nyegyelara emanikor ŋol, arae ŋolo kon; nabo ani kigyela, arae ŋisiliŋa ŋulu kon. Kaanukiro nai itubunio iyoŋ akitiya ŋakiro ŋuna ikote ŋun? Nyerae ŋituŋa imodikinit iyoŋ, nai erae Akuj!”

⁵Ani iirari Anania ŋakiro ŋun, topokor, totwan. Tobul ŋituŋa daadaŋ ŋulu eirarete ŋakiro ŋun.

⁶Potu ŋisorok kimuko akuwan keŋ, yaasi kiŋa, tonuka.

⁷Ani elunyar ŋisaae ŋulu aapiyarito ŋiuni, tolomu aberu ka Anania nen pa eyeni ŋakiro ŋuna kepotu kitiyakin.

⁸Tolimok Petero iŋes tema, “Tolimokinae ayoŋ, kerae lu ŋisiliŋa daadaŋ ŋulu iryamunete iyoŋ ka lokile kon igyelarete emanikor.” Toboŋok iŋes tema, “Ee, daadaŋ lu.”

⁹Tolimok Petero iŋes tema, “Kaanukiro iponiata iyoŋ ka lokile kon tocamut akikatakin Etau ŋolo ke Ekapolon? Topupok! Ipupi iyoŋ ŋakejen alopuke a? Erae ŋuna a ŋisorok a ŋulu sek alosito akinuk lokile kon, ikidakarete ikes iyoŋ daŋ kiŋa.”

¹⁰Atipei, topokor Sapira alokiŋaren Petero, totwan alodiyete ŋakejen keŋ. Ani elomunete ŋisorok toryamut iŋes ketwana, yaasi kiŋa, tonuka diyete ekile keŋ.

¹¹Tobul nooi atukot a Ŋikristo ka ŋuluce daadaŋ ŋulu apotu kiirasi ŋakiro ŋun.

¹²Apotu Ŋikiyakia kitiyata ŋakujuwuanisya ka ŋaumonokineta ŋuna alalak alotuŋa. Acunanakin ŋikanupak daadaŋ Kai ka Akuj, tooma Ebarasan a Solomon.

¹³Emam ituŋanan ŋini pa arae ekanupan ŋini abu toŋirik arukit ka ikes, nai etopoloorito ŋituŋa ikes.

¹⁴Apotu ŋaberu ka ŋikilyok ŋulu alalak tonupa Ekapolon, kiyatakinos lokanupak.

¹⁵Aŋuna a ŋakiro a ŋuna etiyaete Ŋikiyakia, apotu ŋituŋa yaut ŋikadyakak lorotin, kiperikis lokitaadae ka lojamu, ikotere ani itori Petero nen, min etorube keŋ neni a ŋice kec.

¹⁶Tosutut ŋituŋa alotaunio a ŋulu edunyasi ka Yerusalem daŋ, yaut ikes ŋikadyakak ka ŋulu ekamunito ŋipyan, kitaŋaleunoe daadaŋ.

¹⁷Min arakao nooi aŋuna a Ŋikiyakia neni ke Esacaradoti a ŋolo Apolon nooi ka ŋirukitos keŋ ŋulu arae ŋulu ka atukot a ŋina a Ŋisadukayon.

¹⁸Ido apotu ikes kikamut Ŋikiyakia, kiwuakis ikes mabus iteete ŋituŋa daadaŋ.

¹⁹Nai ani nakwaare, toŋaa emalaika ŋolo ke Ekapolon ŋikekya ŋulu a mabus, ido yau ikes kiŋa, tolimok ikes tema,

²⁰“Toloto Kai ka Akuj, tolimokis ŋituŋa ŋakiro daadaŋ ŋuna ka akiyar a ŋina kitete a na, a ŋina ayau Yesu.”

²¹Kitiyata Ŋikiyakia ikwaŋina alimokinitere: ani taparacu eriŋa elilim, tolomasi Kai ka Akuj, kisyakis akitatam ŋituŋa. Ani edolunete Esacaradoti ŋolo Apolon nooi ka ŋirukitos keŋ, tonyaraut Atukot ka ŋikatukok daadaŋ ŋulu a Isirael iwapei. Kiyakiyasi nai ikes ŋisigarya mabus ayaun Ŋikiyakia.

²²Nai ani edolete ŋisigarya, torukaut Ŋikiyakia emameete alomabus. Toboŋosi ikes, tolimokis Atukot

²³temasi, “Aponi isua toryamunae ejera egolol ejok ka ŋisigarya ŋulu eteok ewuasi alokekya. Nai ani eŋaaryo isua, toryamunae emam ituŋanan ayai tooma!”

²⁴Ani iirarete ekapolokiniton ŋiketeok ŋulu ka Akai ka Akuj ka ŋisacaradotin ŋulu apolok ŋakiro nu, totaaŋaŋa ikes nooi temasi, “Anu ta etakanunete aŋuna a ŋakiro a nu?”

²⁵Bu nabo ituŋanan ice, tolimok ikes tema, “Topupokisi! Ŋikilyok ŋulu iwuakinito iyes mabus, eya tokona Kai ka Akuj itatamete ŋituŋa!”

²⁶Toloto ekapolokiniton ŋol ka ŋiketeok ŋulu ka Akai ka Akuj arikun Ŋikiyakia alo Kai ka Akuj. Nai nyikamut ikes Ŋikiyakia ka agogoŋu, anerae akerito atemar kori ikimasete ŋituŋa ikes a ŋamoru.

²⁷Ani keyaut ikes Ŋikiyakia, kitowua alokiŋaren Atukot. Tolimok Esacaradoti ŋolo Apolon nooi ikes tema,

²⁸“Ikicikit paaran isua iyes nooi atemar, toesikisi akitatam alokiro a lo, nai isiryam iyes ŋakiro ŋuna itatamete Yerusalem daadaŋ ka icamito daŋ areeun atemar pena ŋaokot keŋ nakyes kosi!”

²⁹Nai toboŋokis Petero ka Ŋikiyakia temasi, “Itemokino isua opupete Akuj akilo ŋituŋa.

³⁰Abu Akuj atapapaa yok kiteyaru Yesu, ŋolo ipotu iyes kibubukis lomusalaba, toara.

³¹Kitopoloo Akuj iŋes, kisiboik lowae ŋolo aloteten keŋ toruwor Ekarikon ka Ekaiunan, ikotere Ŋisirael epedorete akiki, kisyoni Akuj ŋasecisya kec.

³²Ikirae isua ŋisuudae ŋulu a ŋakiro a ŋun--isua ka Etau ŋolo Asegan, ŋolo einakinit Akuj neni a ŋulu iwuapito ŋakiro keŋ.”

³³Ani iirari Atukot ŋakiro ŋun, toŋo nooi, kiitan akiar ikes.

³⁴Nai tonyou Eparisayot epei a Natukot ŋolo anyaritae Gamaliel. Arae iŋes eketataman a Ŋikisila, ŋolo etopoloorito ŋituŋa daadaŋ. Abu tolimok ŋituŋa ayaar Ŋikiyakia kiŋa adiouriyen;

³⁵ido kisirwor ŋituŋa tema, “Ŋituŋa a Isirael, tocoito mono iyes ŋuna icamito akitiyakin lokilyok lu.

³⁶Anerae ŋikaru ŋidi ŋulu alunyar, abu Teudas bu itusubuna idiotuŋanan, kiwuapakis iŋes ŋituŋa ŋulu aapikinit ekimar ŋamiae ŋaomwon. Nai aponi toarae iŋes kielaros ŋikewuapak keŋ, tosalut ŋuna etya neni.

³⁷Ekaku keŋ, bu Yuda ŋolo arae Egalilayat ŋirwa ŋulu emarere ŋituŋa, kiwuapakis ŋituŋa ŋice iŋes. Nai aponi toarae iŋes daŋ ka kielarae ŋikewuapak keŋ daadaŋ.

³⁸Aŋun, anakiro a ŋuna a tokona a nu, akalimokini ayoŋ iyes atemar, kimyekisi ŋikilyok lu make! Toesikisi ikes toloto! Ani kerae lotuŋa eponitotor ŋuna elosikinito kori itiyaete ikes, esalunete.

³⁹Nai ani kerae neni ka Akuj eponitotor, nyipedorete iyes akiretakin ikes, acepaki iryamunete atemar itepegete iyes Akuj.” Tocamu Atukot ŋakiro a Gamaliel.

⁴⁰Tonyaraut nai ikes Ŋikiyakia tooma, kibuŋata, ido kicikakis nyirwor nabo alokiro a Yesu, tolakakis ikes toloto.

⁴¹Tolomasi Ŋikiyakia a Natukot elakara nooi, anerae atamete ikes atemar amaikina ikes aryamun ŋican aŋuna ke ekiro a Yesu.

⁴²Torubakis Ŋikiyakia a ŋinakoloŋit itatamete ka elimonorete alo Kai ka Akuj ka alorerya atemar Yesu erae Kristo.