Read ngakarimojong Ŋitic. 8 Bible Online

Ŋitic. 8 - ngakarimojong bible

Ŋitic. 8

¹Ayai Saulo nen, kitojokite atwanare a Stepano. Akoloŋit ŋin, tolomu akisicanio ŋina aronon nooi natukot a ŋikanupak a Yesu ŋina ayai Yerusalem. Kielarae ŋikanupak daadaŋ, toloto ikes Yudeya ka Samaria; kidoŋo Ŋikiyakia bon.

²Tonuka nai Stepano ŋikilyok ŋulu ainakina neni ka Akuj, kigworos nooi aŋuna keŋ.

³Nai abu Saulo kisyak akinyasun ŋatukon a ŋikanupak; erimit iŋes nakais akiriunun ŋikilyok ka ŋaberu, toen ikes alomabus.

⁴Apotu ŋikanupak ŋulu aponi kielarae tolimonokis Ŋakiro ŋuna Ajokak nakwapin daadaŋ ŋuna apotu ikes toloto.

⁵Tolot epei kec ŋolo anyaritae Pilipo lotaun ŋolo apolon alo Samaria, tolimonok ŋituŋa ŋakiro ŋuna a Kristo.

⁶Ani iirarete ŋasepico ŋakiro a Pilipo ka toanyuwasi ŋakujuwuanisya ŋuna etiyae iŋes, topupokis nooi daadaŋ ŋakiro ŋuna erworo iŋes.

⁷Anerae apotu ŋipyan tolomut alotuŋa a ŋulu alalak iworoete nooi a etoil a ŋolo apolon; kitaŋaleunoe ŋulu alalak ŋulu alilim ŋakoyo ka ŋawat ka ŋulu aŋwalito.

⁸Aŋun, toyakaun alelyan nooi lotaun ŋolo apolon ŋol.

⁹Ayai lotaun ŋol ekile ŋolo anyaritae Simoni, ŋolo sek kitiyae ŋakikukujaeta, ŋolo kebu kituumok ŋituŋa ŋulu ka akwap a Samaria, etusubuna iŋes idiotuŋanan ŋini apolon.

¹⁰Topupo ŋituŋa daadaŋ iŋes ameun alocaryo tari narwonita ebasi, “Erae ekile lo apedor ŋina ka Akuj ŋina enyaritae ‘Apedor ŋina Apolon.’ ”

¹¹Apupete ŋituŋa ŋakiro keŋ, anerae abu iŋes ya apaki ŋina aoyan ituumonokini ikes a ŋakikukujaeta keŋ.

¹²Nai ani enupete ikes Pilipo ŋina alimonokinia Ŋakiro ŋuna Ajokak ŋuna ka Apukan ka Akuj ka ŋuna ka apedor ke ekiro a Yesu Kristo, aponi kibatisae ikes, ŋikilyok kaapei ka ŋaberu.

¹³Abu Simoni daŋ elope tonup, kibatisae. Abu iŋes torubak erukito ka Pilipo; etuumokinito iŋes ŋaumonokineta ka ŋakujuwuanisya ŋuna apolok ŋuna etiyasi.

¹⁴Kiirasi nai Ŋikiyakia ŋulu ayakasi Yerusalem atemar acamut ŋituŋa ŋulu a Samaria ŋakiro ŋuna ka Akuj, kiyakiyasi ikes Petero ka Yoana neni kec.

¹⁵Ani edolete ikes, kilipakis ŋituŋa, ikotere eryamunete Etau ŋolo Asegan.

¹⁶Kibatisatae ikes alokiro ke Ekapolon Yesu bon; ariŋa Etau ŋolo Asegan nyemino tari neni a ipei kec.

¹⁷Kidokokis nai Petero ka Yoana ŋakan kec neni a ŋikanupak, ido toryamut ikes Etau ŋolo Asegan.

¹⁸Ani eanyuni Simoni atemar aponi inakinae Etau ŋolo Asegan anakidokokin ŋakan ŋuna a Ŋikiyakia, inak iŋes ikes ŋisiliŋa,

¹⁹tema, “Inakinae ayoŋ daŋ apedor na, ikotere ani ŋini daadaŋ edokokini ayoŋ ŋakan, toryamu Etau ŋolo Asegan.”

²⁰Nai kiŋenyak Petero iŋes tema, “Totwania iyoŋ kaapei ka ŋikonisiliŋa! Itami mono iyoŋ kire atemar ipedori aryamun ainakinet ŋina ka Akuj a ŋisiliŋa a?

²¹Nyimarar iyoŋ ka emam ibore kon eyai lotic lo, anerae nyiyookino etau kon alokiŋaren Akuj.

²²Aŋun, toki nai aronis kon na, kilip neni ke Ekapolon atemar ani kepedor, kisyoni iŋes ŋuna eya lotau kon.

²³Anerae ete ayoŋ atemar ileleba arakao neni kon ka ikienit iyoŋ asecit.”

²⁴Toboŋok Simoni tema, “Kilipa neni ke Ekapolon aŋuna kaŋ, ikotere nyitiyakin idiobore ŋini ilimu iyoŋ neni kaŋ.”

²⁵Ani kedaut Petero ka Yoana akiteyenun ka erwor ŋakiro ke Ekapolon, toboŋosi Yerusalem elimonokinete Ŋakiro ŋuna Ajokak lorerya ŋulu alalak ŋulu a Samaria.

²⁶Apeikoloŋit, tolimok emalaika ŋolo ke Ekapolon Pilipo tema, “Tonyou tolot nakan ŋina alo Kwap, lorot ŋolo etiyaar alo Yerusalem, ŋolo itori naloŋisat tari Gasa.”

²⁷Tonyou nai Pilipo, tolot. Ayai lorot ŋol ekile ŋolo anakwap a ŋina a Esiopia ŋolo arae ekolup. Apolokinit iŋes ŋisiliŋa daadaŋ ŋulu a Kandace, a ŋina epukat Esiopia. Kelosit sek ekile lo Yerusalem akilip.

²⁸Aboŋi iŋes lore apaki ŋin, edokit agaari ŋina erito ŋaŋolei, tosyomi ekitaabo ŋolo ke ekadwaran a Isaya.

²⁹Tolimok Etau ŋolo Asegan Pilipo tema, “Tolot nagaari ŋin, kidunya neni keŋ.”

³⁰Toem nai Pilipo nagaari, kiira ekile ŋol esyomi ekitaabo ŋolo ke ekadwaran a Isaya, kiŋit tema, “Iyeni iyoŋ apolou a ŋakiro a ŋuna isyomi iyoŋ a?”

³¹Toboŋok iŋes tema, “Ekokini ayoŋ ayenuni ai, erae pa kakalimoki ayoŋ ituŋanan idio?” Tonyaraiya nai iŋes Pilipo adokar nagaari, kiboikin ka iŋes.

³²Ŋakiro ŋuna asyomi ekile ŋol a Nakigireta ikes nu: “Ikwa amesek ŋina erikoryo akiŋol kori ikwa ililiŋia imesek alokiŋaren ekatubon ŋajul keŋ, nyelimuno iŋes adiokirot.

³³Alotooma akitiditeuna keŋ, aponi kitiyae ŋuna nyeriyan neni keŋ. Ŋae elimori ŋuna a ŋiletok keŋ, anerae alemar akiyar keŋ anakwap.”

³⁴Kiŋit ekile ŋol Pilipo tema, “Tolimokinae kare, ŋae irworor ekadwaran, iŋes pei elope kori ituŋanan ice?”

³⁵Kirworik nai Pilipo, togeu a Nakigireta a ŋunapei a ŋun, tolimonok iŋes Ŋakiro ŋuna Ajokak ŋuna a Yesu.

³⁶Ani elosete ikes alorot, todolo neni ayakasi ŋakipi, ido tolimok ekapolon ŋol Pilipo tema, “Kiŋolik, ŋakipi nu! Nyo ekeretakini ayoŋ akibatisao?” [

³⁷Tolimu Pilipo tema, “Ani kinupit iyoŋ a ekonitau a daadaŋ, ipedori akibatisao.” Toboŋok iŋes tema, “Anupit atemar erae Yesu Kristo Lokoku ka Akuj.”]

³⁸Kitowuo iŋes agaari, torukosi iŋes ka Pilipo kidiŋ ŋakipi, kibatisa Pilipo iŋes.

³⁹Ani elomunete ikes anakipi, ya Etau ŋolo ke Ekapolon Pilipo, nyiŋolik nabo ekapolon iŋes. Nai tolot lore keŋ elelyani.

⁴⁰Totakanu nai Pilipo aneni enyaritae Asotus, elimonokini Ŋakiro ŋuna Ajokak lotaunio daadaŋ tari neni adolyo Kaisaria.