Read ngakarimojong Ŋirom. 13 Bible Online

Ŋirom. 13 - ngakarimojong bible

Ŋirom. 13

¹Itemokino ŋinituŋanan tokerite ŋikapolok ŋulu ka apukan, anerae neni ka Akuj iŋes ebunitor apolou daadaŋ ka erae Akuj einakinit ikes apolou.

²Ituŋanan daadaŋ ŋini itepegi ŋikapolok ŋulu ipukato, itepegi iŋes ŋuna atubu Akuj ka daadaŋ ŋini itiyae ikoŋina, eyauni atubokino neni keŋ ka ilope.

³Anerae nyeyaunete ŋikapolok akuryanu neni a ŋulu itiyaete ŋuna ajokak, nai eyaunete akuryanu neni a ŋulu itiyaete ŋuna aronok. Aŋun, ani kicamit iyoŋ akiboi emam akuryanit anituŋanan a ŋini ipukat, kitiya ŋuna ajokak ikotere ikituruwori iŋes iyoŋ ŋolo ijok aneni keŋ.

⁴Anerae erae iŋes eketiyan ŋolo ka Akuj, ŋolo itiyae etic keŋ aŋuna ka akiŋarakin iyoŋ. Nai ani kitiya iyoŋ ŋuna aronok, itemokino tokuryaniar aneni keŋ, anerae eyakar iŋes apedor ŋinakisicanet iyoŋ. Erae iŋes eketiyan ŋolo ka Akuj ŋolo eyauni akisicanet ŋina ka anyunyura a ŋina ka Akuj neni a ŋulu itiyaete ŋuna aronok.

⁵Aŋuna a ŋakiro a ŋun, itemokino iyes tokerito ŋikapolok ŋulu ka apukan--meere ca aŋuna ka akerit anyunyura ŋina ka Akuj bon, nai itemokino torae aŋuna ikilimokinitotor iyes ŋatameta kus daŋ.

⁶Erae ŋakiro ŋunapei ŋun itacata iyes ocur daŋ, anerae itiyaete ŋikapolok aŋuna ka Akuj, apaki daadaŋ ŋina itiyaata etic ŋolo itemokino ikes kitiyata.

⁷Inakisi ŋituŋa daadaŋ ŋiboro ŋulu ebeiyarito neni kec: ocur neni a ŋulu ebeiyarit ocur, akerit neni a ŋulu ebeiyarit akerit ka akitopoloorit neni a ŋulu ebeiyarit apolou.

⁸Kiuryasi nyemin amica adio kidiŋ kus ka ituŋanan ice--mati amica ŋina itemokino toyakatar--iŋes bon amina ŋuluce. Ŋini emina ituŋanan ŋinice, adau akiwuap Ŋikisila.

⁹Ŋakiciketa ŋuna ebasi: “Nyilom, nyiar, nyikoko, nyikiburak ibore a ŋinicetuŋanan” ka ŋakiciketa ŋunace daadaŋ, eyakasi tooma Lokisil epei ŋolo ebala, “Tomina ekonikidunyet ikwaŋina iminar iyoŋ akonikuwan.”

¹⁰Ituŋanan ŋini emina ekidunyet keŋ, nyitiyakini jik aronis neni keŋ. Amina nai, iŋes akiwuap Ŋikisila daadaŋ.

¹¹Nabo akilo, itemokino iyes kitiyata ŋun, anerae iyenete iyes apaki ŋina a tokona: adolu apaki ŋina itemokino iyes tokienyuniata anajo. Anerae aapuu nooi apaki ŋina ikiunere iwon akilo neni ekoni apaki ŋina ikigeunia akinup.

¹²Aapuu akuwar alunyar, aapuu akiwalar. Ojoŋoto nai akitiya ŋiticisyo ŋulu ka akiryonut, olemutu ŋiboro ŋulu ikijiyo anakica.

¹³Eboiyoto ejok ikwa ŋituŋa ŋulu eya nakica ŋina ka apaaran; olemasi adakanu kori emeret, olemasi amalao kori akiŋobel, olemasi ejiye kori arakao.

¹⁴Nai tolemutu ŋiboro ŋulu ke ejiye ŋulu erae ŋulu a Yesu Kristo, ido tojoŋoto atamunit aseconu ŋina a ŋawat kus aŋuna ka akitiya ŋuna ecamito ikes akitiya.