Read ngakarimojong Ŋirom. 14 Bible Online

Ŋirom. 14 - ngakarimojong bible

Ŋirom. 14

¹Tocamutu ekile ŋolo epalag ananupit eyakaun neni kus, nai nyipeganakinosi ka iŋes anakiro a ŋuna erae ŋatameta keŋ a elope.

²Ecamakini anupit a ituŋanan a ice ilope akinyam ibore daadaŋ, nai ituŋanan ŋini epalag ananupit, eŋeri iŋes akinyam akiriŋ.

³Nyitemokino ituŋanan ŋini enyami ibore daadaŋ isoloe ŋini nyenyami daadaŋ; aso ŋini eŋerit akinyam akiriŋ, nyitemokino etubokini ŋini enyami ibore daadaŋ, anerae acamu Akuj iŋes.

⁴Ŋae iyoŋ itubokini eketiyan a ituŋanan a ice? Erae ekapolon keŋ etyakuni erae kibusokina iŋes kori kilounit; elosi iŋes akiloun, anerae Ekapolon iŋes epedori akisiloun iŋes.

⁵Etami ituŋanan ice atemar eyai akoloŋit ŋina epol akilo ŋunace, nai etami ice atemar ikwaan ŋirwa daadaŋ. Itemokino ŋinituŋanan kiwuap ŋuna ebasi ŋatameta keŋ ejokak.

⁶Ituŋanan ŋini itopoloorit akoloŋit ace, itiyae ŋun anakerit Ekapolon. Iŋes daŋ ŋini enyami ibore daadaŋ, itiyae ŋun anakerit Ekapolon, anerae elakari iŋes neni ka Akuj aŋuna ka akimuj. Ŋini daŋ eŋeri akinyam ŋiboro ŋice, itiyae ŋun anakerit Ekapolon ka elakari iŋes neni ka Akuj.

⁷Emam iwon ŋini eyari aŋuna keŋ bon, emam iwon ŋini etwani aŋuna keŋ bon.

⁸Ani kikiyari iwon, ikiyari aŋuna ke Ekapolon, ka ani kikitwaka, ikitwaki aŋuna ke Ekapolon. Tari nai kikiyari kori kikitwaka, ikirae iwon ŋulu ke Ekapolon.

⁹Anerae abu Kristo totwan ka toyaru aŋuna ka aruwor Ekapolon a ŋulu eyarete ka ŋulu atwak.

¹⁰Kaanukiro nai etubonokiniata ŋice kus ŋuluce? Ka kaanukiro isolooto ŋice kus ŋuluce? Ikilosi iwon daadaŋ akiwo alokiŋaren Akuj, ikitubok iŋes iwon.

¹¹Anerae ebasi Ŋakigireta ebe, “Ebala Ekapolon, ikwaŋina eraakar kire atemar ayari ayoŋ, ikoni nenipei atemar eryediki ŋinituŋanan alokiŋaren kaŋ, ka elimori ŋinituŋanan atemar ayoŋ arae Akuj.”

¹²Isisauni nai ŋinituŋanan alotooma yok ŋakiro keŋ a ilope alokiŋaren Akuj.

¹³Aŋun nai, ojoŋoto atubonokin make. Nai ŋuna itemokino iwon otyakutu akitiya nu: nyitemokino akitiya idiobore ŋini isigukini lokaato yok ananupit keŋ kori ŋini itolomari iŋes nasecit.

¹⁴Ayeni ka eketoodikinit ayoŋ Ekapolon Yesu atemar emam ibore ŋini nyeseg alotooma keŋ bon, nai ani kenup ituŋanan atemar nyeseg icebore, eruwor nai ibore ŋin ŋini nyeseg aneni keŋ.

¹⁵Ani kitakadak iyoŋ lokaato kon aŋuna a ibore a ŋini inyami iyoŋ, ido nyenyami iŋes, iŋes atemar nyeriŋa nai iyoŋ itiyae ŋuna ka amina. Nyimyek akimuj ŋina imuji iyoŋ emunaiyari ituŋanan ŋini abunio Kristo totwania!

¹⁶Nyimyek ibore ŋini ibala iyoŋ ejok eryamuni ekiro ŋolo aronon.

¹⁷Anerae meere Apukan ka Akuj ŋina ca imujere ka emasere, nai erae ŋina ka akiyookino ka ŋina ke ekisil ta ŋina ka alelyan a ŋina ikiinakinit Etau ŋolo Asegan.

¹⁸Ituŋanan daadaŋ ŋini itiyanakini Kristo alopite a ŋol, elakar Akuj aŋuna keŋ ka itojokete ŋituŋa etic keŋ.

¹⁹Aŋun nai, itemokino iwon jwi jwi ekatakisi akitiya ŋuna eyaunete ekisil ka ŋuna ikiŋarakinete akitogogoŋo make.

²⁰Nyinyasut aŋuna ka akimuj ŋuna adau Akuj akitiya. Epedoryo ŋamuja daadaŋ akimuj, nai erono akimuj ibore ŋini itolomari ituŋanan ŋinice nasecit.

²¹Ŋuna itemokino akitiya ikes ŋuna ka akimyekin akinyam akiriŋ kori akimat ŋagwe kori akitiya ŋinibore daadaŋ ŋini isigukini lokaato kon ananupit keŋ.

²²Kiricite nai ŋuna inupit iyoŋ aŋuna a ŋakiro a ŋun, erae ŋuna kon bon ka Akuj. Elakara ituŋanan ŋini nyitusubuna ekasecan itiyae ŋuna ebala ejokak!

²³Nai ani keŋayaŋayat ituŋanan aŋuna ka akimuj a ŋina imuji iŋes, etubokini Akuj iŋes apaki ŋina imuja iŋes akimuj ŋin, anerae nyitiyae iŋes ŋuna elimokinit anupit keŋ iŋes; ido ibore daadaŋ ŋini eŋerit ŋuna elimunit anupit, erae asecit.