Read ngakarimojong Ŋirom. 16 Bible Online

Ŋirom. 16 - ngakarimojong bible

Ŋirom. 16

¹Acamit ayoŋ alimokin iyes atemar erae nakaato yok Poibe, ŋina itiyae etic ŋolo ka atukot a Ŋikristo alo Kenikerea, ituŋanan ŋini ajokan.

²Kijautu iŋes alokiro ke Ekapolon, lopite ŋolo itemokino ŋituŋa ŋulu ka Akuj itiyaete ka inakisi iŋes akiŋarakinet daadaŋ ŋina iitani iŋes aneni kus; anerae abu iŋes kiŋarak ŋituŋa ŋulu alalak, ekeŋarak tari ayoŋ.

³Kimalakinae Prisika ka Akwila, ŋulu ikitiyae ka ayoŋ etic ŋolo a Yesu Kristo;

⁴ajalito ikes akiyar kec aŋuna kaŋ. Alakara ayoŋ nooi neni kec--meere nai ayoŋ bon, elakara tari Ŋikristo daadaŋ ŋulu nyerae Ŋiyudayan.

⁵Kimalata tari Ŋikristo ŋulu iryamiryameneneete kai kec. Kimalakinae Epaeneto lokone kaŋ ŋolo erae iŋes ageuni akinup ŋakiro a Kristo anakwap a Asia.

⁶Kimalakinae Maria ŋina itiyae etic aŋuna kus.

⁷Kimalakinae tari Andoroniko ka Yunia, ŋulu erae Ŋiyudayan ikwa ayoŋ, ŋulu aponi toenae kaapei ka ayoŋ. Erwoko ikes nooi alokiyakia ka apotu toruworos Ŋikristo eriŋa ayoŋ.

⁸Kimalakinae Ampliato lokone kaŋ ŋolo minat anaraakau ŋipei aneni ke Ekapolon.

⁹Kimalakinae tari Urubano ŋolo ikitiyae ka ayoŋ etic a Kristo; kimalata tari lokone kaŋ ŋolo minat Sitaku.

¹⁰Kimalakinae Apele ŋolo adaun aripun atemar emina kire Kristo. Kimalakinae ŋituŋa ŋulu ke ere ka Arisitobulo.

¹¹Kimalakinae Erodio ŋolo erae Eyudayat ikwa ayoŋ ka ŋituŋa daadaŋ ŋulu ke ekal a Narikiso, ŋulu emorikin ke Ekapolon.

¹²Kimalakinae Turupena ka Turuposa, ŋuna itiyaete etic ke Ekapolon ka nakone kaŋ Peresi, ŋina itiyae etic ŋolo alalan ŋolo ke Ekapolon.

¹³Kimalakinae Rupus, Ekristoit ŋolo eyenen alotic ke Ekapolon ka toto keŋ ŋina ekeuryarit ayoŋ ikwa lokoku keŋ.

¹⁴Kimalakinae Asunikirito, Pelego, Erime, Patiroba ka Erima ta ŋikaitotoi ŋulu Kristayon daadaŋ ŋulu erukito ka ikes.

¹⁵Kimalakinae Pilologo ka Yulia, Nereo ka nakaato keŋ Olumpa, ta ŋituŋa ŋulu ka Akuj daadaŋ ŋulu erukito ka ikes.

¹⁶Kimalas itunasi make itoodiunito atemar iminin. Ikimalaete iyes Ŋikristo daadaŋ.

¹⁷Ŋikaitotoi kaŋ, ekemaimai ayoŋ iyes atemar tocoikis ŋulu etyakatyakaete ŋituŋa, ido kitooliyosi ananupit kec; ŋulu eŋerito ŋakiro ŋuna aponi ikitatami iyes. Tocoito irukete ka ikes!

¹⁸Anerae nyerae Kristo itiyanakinete ŋituŋa ŋulu ikote ŋul, nai itiyanakinete etic ŋolo ka akiwarit akimuj. Irworosi ikes ŋakiro ŋuna abobok, kirapirapete ŋituŋa alorwor kec ecamito amodikin ŋituŋa ŋulu epalag!

¹⁹Eirasi ŋituŋa daadaŋ epite ŋolo iwuapitotor iyes ŋakiro ŋuna ka Akuj ka alakara ayoŋ nooi ikotere iyes. Acamit ayoŋ iyes toosok, toyenete ibore ŋini ejok ka tomam ŋuna ikikamunito anakiro a ŋuna aronok.

²⁰Ido eapi Akuj ŋina erae alope ekisil, ainakin iyes apedor akipicar Satan a ŋakejen kus. Toyai neni kus ajokis ŋina ke Ekapolon yok Yesu Kristo.

²¹Ikimalae iyes Timoteo ŋolo ikitiyae ka ayoŋ, ikimalae tari Lukio, Yason tari Sosipatiro, ŋulu erae Ŋiyudayan ikwa ayoŋ.

²²Ayoŋ Teretio ŋolo ekesigiritae abaruwa na, ekemalae iyes alokiro ke Ekapolon.

²³Ikimalae Gaio ŋolo eketepeyonit ayoŋ, ŋolo erae kai keŋ iryamiryameneneete Ŋikristo. Ikimalat iyes Erasto ŋolo erae ekeŋadan ŋisiliŋa ŋulu ke etaun alo ka lokaatokosi Kwarito.[

²⁴Toyai neni kus a daadaŋ ajokis ŋina ke Ekapolon yok Yesu Kristo. Amen.]

²⁵Oinakisi akipuro neni ka Akuj! Epedori iŋes akiturubakin iyes inupito alopite a ŋolo a Ŋakiro a ŋuna Ajokak a ŋuna a Yesu Kristo, ŋuna etatami ayoŋ ka alopite a ŋolo ka akitoodikinet a ŋakiro a ŋuna koloŋ emunonitae.

²⁶Nai tokona esileereun ŋakiro ŋun a Nakigireta a ŋikadwarak ka eteyenikin lotuŋa a ŋibukui a daadaŋ lopite ŋolo icikakinitor Akuj ŋina nyesaluni; ikotere tonupa ka kiwuapa daadaŋ ŋakiro ŋuna ka Akuj.

²⁷Toyai apolou ŋina nyedaun alotooma Yesu Kristo neni ka Akuj, a ŋina erae iŋes bon eos nooi! Amen.