Read ngakarimojong Ŋirom. 3 Bible Online

Ŋirom. 3 - ngakarimojong bible

Ŋirom. 3

¹Inyoni ŋini alalan eyakatar Ŋiyudayan akilo ŋini eyakatar ŋituŋa ŋuluce? Kori alipoida eyakar akileŋeryo kec?

²Eyai kire epoida lowaetin daadaŋ! Ŋuna iŋarenete, abu Akuj kicikak ŋakiro keŋ neni a Ŋiyudayan akiyok.

³Nai nyiwuapa ŋituŋa ŋice ŋakiro ŋuna ka Akuj. Iŋes mono atemar nyerubakini Akuj daŋ iricit ŋakiikineta keŋ a?

⁴Mam jik! Erubakini Akuj iricit ŋakiikineta keŋ tari kelyokoko ŋituŋa daadaŋ. Ikwapei igiritere Nakigireta ebe, “Apaki ŋina irworikinia iyoŋ Akuj, ileere atemar iyookino iyoŋ; ka iloununui iyoŋ ŋina ikisitakinere.”

⁵Nai ani kitoodiunito ŋuna aronok ŋuna ikitiyae iwon akiyookino ŋina ka Akuj, ikitemari iwon ai? Ikitemari mono nyiyookino Akuj aŋuna ikisicania iwon aŋuna a ŋiticisyo yok a ŋulu aronok a? (Erworo ayoŋ nu lopite ŋolo a ŋituŋa)

⁶Mam jik! Ani pa kiyookino Akuj, ikokini nai iŋes etubokini akwap ai?

⁷Epedorete ŋice alimun ebe: ani bo kitopoloorit aronis kaŋ Akuj anakisileereunit akiyookino keŋ, kaanukiro erubakinitor iŋes akatubokinit ayoŋ arae ekasecan?

⁸Kaanukiro bo nyikitemarya ebe, “Etiyata ŋuna aronok ikotere itoodiunere ŋuna ajokak?” Kire apotu ŋicetuŋa ekeyany ayoŋ ebasi etatami ŋakiro nu! Aŋun nai, etubokini Akuj ikes alopite a ŋolo itemokino totubokinere.

⁹Nyo nai kire? Eyai mono iwon Ŋiyudayan ibore ŋini ikilounitor iwon ŋituŋa ŋulu nyerae Ŋiyudayan a? Mam jik! Anerae adau ayoŋ alimun ebe ipukat asecit ŋituŋa daadaŋ--Ŋiyudayan ka ŋulu nyerae Ŋiyudayan daŋ,

¹⁰ikwaŋinapei igiritere Nakigireta ebe: “Emam ituŋanan iyookino, emam ipei daŋ;

¹¹emam idio daŋ eyeni ŋuna iyookino kori ŋini iwarit akimorikin ka Akuj.

¹²Aŋero ŋituŋa daadaŋ Akuj; aruworosi daadaŋ ŋikoŋinae; emam ŋini itiyae ŋuna ajokak, emam tari ipei daŋ.

¹³Ŋakiro ŋuna irworosi ikes eyaununuyete atwanare; ileleba amodiyo ŋina aronon lorwor kec, nabo daŋ ŋakiro ŋuna irworosi ikes erae ŋuna aarak, ikote akisorit ŋina ke emun.

¹⁴Ileleba ŋilam ka adedeŋu nakituka kec.

¹⁵Nyeayeneneete ikes apaki ŋina aoyan akiwan kori akiar idiotuŋanan.

¹⁶Neni daadaŋ elosete ikes, inyasunete ido kidoŋo ŋican nen.

¹⁷Nyeyenete ikes ŋuna ke ekisil.

¹⁸Nyeyenete ikes ŋuna ka akerit Akuj.”

¹⁹Ikiyeni nai iwon atemar ŋuna elimunito Ŋikisila, elimunito aŋuna a ŋulu ipukato Ŋikisila, ikotere isililiŋere ŋipegeta daadaŋ ka yaunae ŋituŋa daadaŋ, totubok Akuj ikes.

²⁰Anerae, emam ituŋanan elimoryo atemar iyookino alokiŋaren Akuj aŋuna iricitor Ŋikisila. Etic a Ŋikisila iŋes akitoodikin ituŋanan atemar esecit iŋes.

²¹Nai tokona adaun akisileereun epite ŋolo elimorya Akuj atemar iyookino ituŋanan alokiŋaren keŋ, ikwapei iteyenunitotor Ŋikisila ka ŋikadwarak. Nai nyikamunito ŋun Ŋikisila.

²²Akiyookino na, ŋina ka Akuj, ebunit alotooma anupit Yesu Kristo, neni a daadaŋ a ŋulu enupito. Emam atyeketait,

²³anerae aseca daadaŋ ka aŋopiki epite ŋolo eryamuniata apolou ŋina anakuj ŋina etemokino toryamut.

²⁴Nai anajokis keŋ abu Akuj tolimo atemar iyookino ikes alokiŋaren keŋ aŋuna a Yesu Kristo a ŋolo elakununui ikes anakipukao a ŋina ka asecit. Erae ŋin ainakinet ŋina nyetacio.

²⁵Abu Akuj kipoto Yesu Kristo, ikotere akeetwanare eruwor ŋina isyoniyere ŋasecisya a ŋituŋa a ŋulu enupete iŋes. Abu Akuj kitiya ŋun, ikotere kitoodiunia atemar iyookino iŋes alope. Koloŋ sek abu Akuj totitinyik ka nyemitak ŋasecisya a ŋituŋa.

²⁶Nai tokona, emitakinit Akuj ŋasecisya a ŋituŋa. Alopite a lo, itoodiunit iŋes atemar iyookino iŋes alope, nabo elimori Akuj atemar iyookino ŋituŋa daadaŋ alokiŋaren keŋ ŋulu enupito Yesu.

²⁷Nyo nai ikisiturokini iwon? Emam ibore ipei daŋ! Ikotere nyo? Erae aŋuna ikiwuapitor iwon Ŋikisila a? Meere, nai aŋuna ikinupitor.

²⁸Anerae ikinupit ebe elimori Akuj atemar iyookino ituŋanan alokiŋaren keŋ aŋuna enupitor iŋes, meere aŋuna iwuapitor Ŋikisila.

²⁹Erae mono Akuj ŋina a Ŋiyudayan bon a? Meere mono iŋes Akuj a ŋituŋa a ŋulu nyerae Ŋiyudayan daŋ a? Ee, erae iŋes Akuj a ŋulu nyerae Ŋiyudayan daŋ.

³⁰Erae Akuj apei, elimori atemar iyookino Ŋiyudayan alokiŋaren keŋ aŋuna ka anupit kec ka itiyae ikwaŋinapei neni a ŋulu nyerae Ŋiyudayan.

³¹Itoodiunito nai ŋun atemar ikijamuwarit iwon Ŋikisila aŋuna ka anupit a ŋin a? Mam jik! Akilo, ikitopoloorit iwon Ŋikisila.