Read ngakarimojong Ŋirom. 6 Bible Online

Ŋirom. 6 - ngakarimojong bible

Ŋirom. 6

¹Ikitemari nai tokona iwon ai? Ikitemari orubakisi ikisecenene ikotere ajokis ŋina ka Akuj iyatakin a?

²Mam jik! Nyepedori asecit akitap iwon, anerae ikipotu iwon otwaka alokiŋaren asecit, ikikokini nai iwon ikirubakini ikisecenene ai?

³Nyiyenete mono iyes atemar iwon daadaŋ ŋulu aponi ikibatisae akimorikin ka Yesu Kristo, aponi ikibatisae akimorikin ka atwanare keŋ a?

⁴Aŋuna nai ka akibatisao yok, iwon ikipotu omora atwanare keŋ ka aponi itonuki ka iŋes; ikotere nai iwon daŋ ikiyari anakiyar a ŋina kitete, ikwaŋinapei eteyarunere Kristo alokatwak aŋuna ka apolou a ŋina ka Akuj a Papa.

⁵Ani kikimorikina sek iwon ka iŋes anatwanare keŋ alopite a ŋolo atwania iŋes, ikwaŋinapei, ikimorikin iwon ka iŋes anayarun keŋ alopite a ŋolo eteyarunere iŋes.

⁶Ikiyeni iwon atemar epite ŋolo sek ikiyakar iwon, aponi toarae kaapei ka Kristo alomusalaba, ikotere inyasunio epite ŋolo ka asecit alotooma yok ka nyikirubak iwon ikirae ŋipi ŋulu ka asecit.

⁷Anerae ani etwani ituŋanan, adaun iŋes alacakin anasecit.

⁸Nai ani kikitwakit sek iwon kaapei ka Kristo, ikinupit daŋ atemar ikiponi akiyar kaapei ka iŋes.

⁹Anerae ikiyeni iwon atemar aponi kiteyarunae Kristo alokatwak ka nyetwani nabo; nyipukae atwanare iŋes nabo jik.

¹⁰Abu iŋes totwan alokiŋaren asecit; nyitemokino iŋes totwan nabo, nai eyari iŋes tokona aŋuna ka Akuj.

¹¹Aŋun, iyes daŋ, itemokino totamakis atemar itwakito iyes ŋilopeyek alokiŋaren asecit ka iyarete aŋuna ka Akuj anakimorikina ka Yesu Kristo.

¹²Nyitemokino nai asecit ipukae ŋawat kus, ikotere nyiwuapyata iyes ekibure ŋolo a ŋawat kus.

¹³Nyijalakis ediokineri kus neni ka asecit, ikotere nyisitiyae ikwa ibore ŋini ejiyere alowae a ŋolo ka aronis. Nai inakisi ŋakusiwat neni ka Akuj ikwa ŋuna eteyarun alokatwak nakiyar ŋina kitete. Tojalakisi ŋinerin kus daadaŋ neni ka Akuj, ikotere kisitiya ikwa ŋiboro ŋulu ejiyere alowae a ŋolo ka akiyookino.

¹⁴Nyikipukat asecit iyes, anerae nyikipukato iyes Ŋikisila, nai ikipukat ajokis ŋina ka Akuj.

¹⁵Nyo nai? Itemokino iwon oseca, anerae meere Ŋikisila ikipukato iwon, nai ikipukat ajokis ŋina ka Akuj a? Mam jik!

¹⁶Iyenete iyes kire atemar, ŋina ijalatar iyes tocamut aruwor ŋipi ŋulu a ituŋanan a ice, iruworosi ŋipi ŋulu a ituŋanan a ŋini iwuapito iyes--kerae ŋipi ŋulu ka asecit a ŋina ikirikori natwanare kori ŋipi ŋulu ka akiwuapit ŋakiro ŋuna ka Akuj, ŋuna eyaunete akiyookino alokiŋaren Akuj.

¹⁷Nai olakaros neni ka Akuj! Anerae apaki ace, ipotu iyes toruworos ŋipi ŋulu ka asecit; nai ekaku ipotu kiwuapa a ŋitai kus a daadaŋ ŋuna a kire, ŋuna eya nakitatam ŋina ipotu iyes toryamut.

¹⁸Aponi itolacakin iyes anasecit, ido idaut aruwor ŋipi ŋulu ka akiyookino, ŋulu itiyaete aŋuna ka Akuj.

¹⁹(Erworo ayoŋ alopite a ŋolo irworotor ŋituŋa ikotere epataniar iyes ayenun ŋakiro kaŋ, anerae ipalag iyes anatameta.) Koloŋ sek ipotu iyes tojala ŋawat kus toruworos ŋipi ŋulu a ŋuna nyesegak ka ŋuna aronok aŋuna ka akitiya ŋuna nyiyookino alokiŋaren Akuj. Ikwaŋinapei, itemokino tokona iyes tojala ŋawat kus toruworos ŋipi ŋulu ka akiyookino, kitiyata ŋuna ka akiyookino alokiŋaren Akuj.

²⁰Apaki ŋina iponiata iyes toruworotor ŋipi ŋulu ka asecit, ilacakina iyes anakiyookino.

²¹Nyo nai ipotu iyes toryamut apaki ŋina itiyaata iyes ŋakiro ŋun ŋuna tokona ikirumitotor iyes ŋileec? Atwanare iŋes abu bu anakiro a ŋun!

²²Nai tokona aŋuna ikilacakinere iyes anasecit ka iruworotor ŋipi ŋulu itiyaete aŋuna ka Akuj, iryamunete tokona iyes akiyar ŋina italakarit Akuj ka iryamunete moi akiyar ŋina nyedaun.

²³Anerae eropit ŋolo ka asecit iŋes atwanare; nai ainakinet ŋina a ikoŋin ŋina ka Akuj iŋes akiyar ŋina nyedaun alotooma Yesu Kristo Ekapolon yok.