Read ngakarimojong 1 Ŋikor. 1 Bible Online

1 Ŋikor. 1 - ngakarimojong bible

1 Ŋikor. 1

¹Ayoŋ Paulo ŋolo akanyarau Akuj aŋuna ka acamit keŋ aruwor ekiyakia ŋolo a Yesu Kristo ka Sostene lokaato yok,

²ikigirit abaruwa na neni ka atukot a Ŋikristo a ŋina eyai Korinto: neni kus a ŋulu ikityakunitae anakimorikina ka Yesu Kristo, ŋulu ikinyarae aruwor ŋituŋa ŋulu ka Akuj, kaapei ka ŋulu daadaŋ ilipete anakiboisyo a daadaŋ alokiro a Yesu Kristo Ekapolon yok, a ŋolo erae Ekapolon kec ka ŋolo yok.

³Toyai neni kus ajokis ka ekisil aneni ka Akuj Papa yok ka aneni ke Ekapolon Yesu Kristo.

⁴Alakara ayoŋ neni ka Akuj kaŋ jwi jwi aŋuna kus, aŋuna ikiinia iŋes iyes ajokis alotooma Yesu Kristo.

⁵Anerae anakimorikina kus ka Kristo, iryamut iyes alopitesyo a daadaŋ erwor ka ayenut daadaŋ.

⁶Igogoŋioto iyes anakiro a ŋuna a Kristo a ŋuna aponi isua ikiteyenikin iyes.

⁷Aŋun, emam ainakinet ŋina ke Etau a ŋolo Asegan ŋina nyiryamunito iyes eriŋa idarito kitoodiunae Ekapolon yok Yesu Kristo anapolou keŋ.

⁸Erubakini iŋes ikitogogoŋit iyes ananupit kus tari nasalunet, ikotere itoryamun iyes emam ŋuna ikisitakinere Akoloŋit ŋina ke Ekapolon yok Yesu Kristo.

⁹Ikinyoma Akuj ŋina adau anyarare iyes nakimorikina ka Lokoku keŋ, Ekapolon yok Yesu Kristo.

¹⁰Ŋikaitotoi kaŋ! Ekemaimai ayoŋ iyes alokiro a Ekapolon yok Yesu Kristo, atemar tocamunos make alorwor kus tomam atyakatyaka alokidiŋ kus, nai toraakas ŋulu imorikina anatameta ka ananupit kus.

¹¹Ŋikaitotoi kaŋ, akalimokis ayoŋ ŋituŋa ŋulu a Kilowe atemar iburaete iyes make.

¹²Ŋuna ayeni ayoŋ aneni kus ikes nu: irworo ŋinituŋanan alokidiŋ kus ebala, “Arae ayoŋ ŋini a Paulo”, kori “Arae ayoŋ ŋini ka Apolo”, kori “Arae ayoŋ ŋini a Petero”, kori “Arae ayoŋ ŋini a Kristo.”

¹³Ketyakatyakae mono Kristo a? Arae mono Paulo aponi kibubukinoe lomusalaba aŋuna kus a? Kori aponi ikibatisae iyes alokiro a Paulo?

¹⁴Alakara ayoŋ neni ka Akuj, anerae nyibatisa ayoŋ idiotuŋanan alokidiŋ kus, mati Kirispo ka Gaio.

¹⁵Aŋun, emam ituŋanan ŋini itemokino tolimu atemar aponi ikibatisae iyes alokiro kaŋ.

¹⁶(Ikwa kire abu ebatisa tari ŋituŋa a Stepana; nyayeni erae kebatisat icetuŋanan.)

¹⁷Anerae abu Kristo nyekeyakiya ayoŋ akibatis, nai alimonokin Ŋakiro ŋuna Ajokak; meere ka aosou a ituŋanan, ikotere nyeruwor atwanare ŋina a Kristo alomusalaba akoŋinait.

¹⁸Anerae akirot ŋina ke emusalaba erae abaŋao aneni a ŋituŋa a ŋulu ebukoro, nai aneni yok a ŋulu ikiiun erae apedor ŋina ka Akuj.

¹⁹Igiritae Nakigireta atemar, “Amunaari ayoŋ aosou a ŋikaosok ka etoŋopiari ayenut a ŋulu ayenak. ”

²⁰Ai mono alokiŋaren Akuj eyai ituŋanan ŋini aoson? Ai eyai ituŋanan ŋini eyeni? Ai eyai eketepegan anakwap a na? Nyeanyuwara tokona iyes epite ŋolo etabaŋaaniarya Akuj aosou ŋina ka akwap a na a?

²¹Ŋinapei koloŋ, abu Akuj anaosou keŋ nyecamak ŋituŋa ayenun iŋes anaosou kec, nai abu Akuj tolakar tocamu aiun ŋulu enupete anakiro a ŋuna ikilimonokin iwon, a ŋuna erae abaŋao aneni a ŋituŋa.

²²Iitanito Ŋiyudayan ŋakujuwuanisya kiwarito Ŋigirik aosou.

²³Nai tolimonokinetei bo isua ŋuna a Kristo a ŋolo aponi kibubukinoe, ŋolo erae akigukinet ananupit aneni a Ŋiyudayan ka ŋolo erae abaŋao alotuŋa a ŋulu nyerae Ŋiyudayan.

²⁴Nai neni a ŋulu adau Akuj anyarare, kerae Ŋiyudayan kori Ŋigirik, erae Kristo apedor ka aosou ŋina ka Akuj.

²⁵Anerae ibore ŋini esibit abaŋao ŋina ka Akuj alotuŋa, eos nooi akilo aosou ŋina a ŋituŋa ka nabo ibore ŋini esibit apalagu ŋina ka Akuj alotuŋa, egogoŋ nooi akilo agogoŋu ŋina a ŋituŋa.

²⁶Ŋikaitotoi, totamakisi mono iyes atemar ataŋae iyes ŋulu ikinyara Akuj; ekudyoko ŋulu esyomito nooi alokidiŋ kus alopite a ŋolo ka akwap, ekudyoko ŋulu erae ŋikepukak kori ŋulu idounitoe alokalya a ŋikarwok.

²⁷Nai abu Akuj toseu ŋulu etami akwap atemar ebaŋaaka, ikotere kisirumia ŋulu aosok ŋileec, abu Akuj toseu ŋulu etami akwap atemar epalag, ikotere kisirumia ŋulu agogoŋok ŋileec.

²⁸Abu Akuj toseu ŋulu ejamuwarit akwap, ikotere ituruwori ŋulu itopolooro ŋikoŋinae.

²⁹Abu Akuj kitiya ŋun, ikotere nyiturokinor idiotuŋanan alokiŋaren keŋ.

³⁰Erae aŋuna keŋ iŋes iyakatar iyes nakimorikina ka Yesu Kristo ŋolo abu Akuj kituruwo aosou yok, akiyookino yok ka ikiruwor iwon ŋulu ikityakunitae aŋuna ka Akuj ka ŋulu ikilakuna.

³¹Isiyookinito ŋun, ŋuna eya Nakigireta ebe, “Iŋes ŋini ituro, kiturokin aŋuna etiya Ekapolon.”