Read ngakarimojong 1 Ŋikor. 11 Bible Online

1 Ŋikor. 11 - ngakarimojong bible

1 Ŋikor. 11

¹Kituputoe ayoŋ, ikwapei etupusyo ayoŋ daŋ Kristo.

²Ekepuro ayoŋ iyes, anerae ikitamunito iyes ayoŋ jwi jwi anakiro a daadaŋ ka iwuapito iyes ŋitalyo a Ŋikristo, ŋulu eketatamianakini ayoŋ iyes.

³Acamit daŋ ayoŋ iyes toyenete atemar Kristo iŋes epolokinit ŋolokile daadaŋ ka epolokinit ekile aberu; nabo epolokinit Akuj Kristo.

⁴Ekile daadaŋ ŋolo ilipi kori edwari kimukite akou, nyitopoloorit Kristo.

⁵Nai aberu daadaŋ ŋina ilipi kori edwari nyimukit akou keŋ nyitopoloorit ekile keŋ--ikwaan ka abanyit akou keŋ.

⁶Ani pa kimuk aberu akou keŋ ka akitambara, itemokino tari tobanya ŋitim keŋ, nai ikwapei eraakar ŋileec aneni ka aberu abanyit akou keŋ, itemokino iŋes kimuk akou keŋ ka akitambara.

⁷Nyitemokino ekile akimuk akou keŋ, anerae erae iŋes etorube ka erae iŋes akitoodiunet ŋina ka apolou ka Akuj; erae nai aberu akitoodiunet ŋina ka apolou ke ekile.

⁸Anerae pa asubuni Akuj ekile anaberu, nai asubuni iŋes aberu alokile.

⁹Nabo pa asubuni Akuj ekile aŋuna ka aberu, nai asubuni iŋes aberu aŋuna ke ekile.

¹⁰Erae ŋakiro ŋun itemokino aberu imukitor akou ka akitambara kitoodiunia apolou keŋ aŋuna a ŋimalaikan.

¹¹Nai anakiyar yok alotooma Ekapolon, epol nooi ayakar ekile, nabo epol nooi ekile ayakar aberu.

¹²Esubunitae aberu alokile, nai tari ekile daŋ itorunit neni ka aberu ka Akuj iŋes asubi ŋiboro daadaŋ.

¹³Totyakutu mono iyes ŋilopeyek erae kejok aberu akilip neni ka Akuj pa imukit akou.

¹⁴Nyeyenete mono ŋituŋa atemar eronikinito ekile ŋitim ŋulu aoyak a?

¹⁵Nai aneni ka aberu erae ŋitim ŋulu aoyak akibuses. Anerae einakinitae iŋes ŋitim ŋulu aoyak kimukitor akou keŋ.

¹⁶Nai ani keyai ituŋanan ecamit apega ŋakiro ŋuna ikamunito ŋun, alimuni ayoŋ nu bon atemar emam etal ece ŋolo eyakare isua kori eyakatar ŋatukon a ŋikanupak.

¹⁷Anakiro a ŋuna tokona alimuni ayoŋ, nyekepurit ayoŋ iyes, anerae ŋapakio daadaŋ ŋuna iryamiryamyata iyes iwapei akilip, itiyaeneneete iyes ŋinyas, meere ajokis.

¹⁸Ŋuna esyaunak, eira ayoŋ atemar ŋina iryamiryamyata iyes ikwapei atukot a ŋikanupak, eyai atyakatyaka kidiŋ kus; aneni kaŋ, esibit ŋakiro ŋun ŋuna a kire.

¹⁹(Kire itemokino toyai atyakatyaka kidiŋ kus, ikotere kileereunioto ŋulu enupito kire.)

²⁰Apaki ŋina iryamiryamyata iyes, nyerae kire Akimuj ŋina ke Ekapolon imujete iyes.

²¹Anerae ani imujete iyes, isyakini ŋinituŋanan akinyam akeekimuj a ilope, tonyamite akoro ŋice ka tomeras ŋice.

²²Emam mono iyes ŋirerya ŋulu imujata ka imasyata a? Kori ijamuwarito iyes atukot ŋina a ŋikanupak a ŋulu ka Akuj ka isurumito ŋileec ŋituŋa ŋulu emam ibore eyai a? Nyaanu ŋuna alimuni ayoŋ anakiro a nu? Ekepuri ayoŋ iyes a? Nyapedori!

²³Anerae abu ayoŋ ejau aneni ke Ekapolon ŋakiro nu ŋuna adau ayoŋ akikobakin iyes. Abu Ekapolon Yesu ataboŋ ŋina alukinere, tolemu amugati,

²⁴ani kedau alakar neni ka Akuj, tonyilinyili, tolimu tema, “Erae naga akaakuwan ŋina ejalyo ikotere iyes. Kitiyaete ikona ikotere ikiitunitotor ayoŋ.”

²⁵Ikoŋinapei, kirikakis akimuj, tolemu ekopo tema, “Erae logo ekopo ŋolo a ŋaokot kaŋ a ŋuna ka Acamunet a ŋina kitete. Apaki daadaŋ ŋina imasyata iyes alokopo a lo, tomata ikiitunitotor ayoŋ.”

²⁶Iŋes atemar apaki daadaŋ ŋina imujata amugati na ka ŋina imasyata alokopo a lo, iseraete iyes atwanare ŋina ke Ekapolon akitodol ŋina eboŋunio Ekapolon.

²⁷Aŋun, ŋini daadaŋ imuji amugati kori emasi alokopo a ŋolo ke Ekapolon pa itopoloorit Ekapolon, eyany iŋes akuwan ka ŋaokot ke Ekapolon.

²⁸Aŋun, itemokino ŋinituŋanan kisyemo bon mono, ido nai kimuj amugati ka tomat alokopo.

²⁹Anerae ŋini daadaŋ imuji amugati ka emasi alokopo pa enupit apolou ŋina ka akuwan ka ŋaokot ke Ekapolon, etubokini Akuj iŋes.

³⁰Iŋes nai eraakatar ŋice alokidiŋ kus ŋulu epalag ka ŋulu edyakasi, nabo atwaka ŋice daŋ.

³¹Kerae esyemem iwon mono make, pa kikitubok Akuj iwon.

³²Nai ani ikisicani Ekapolon iwon, ikitatami erae akitatam, ikotere nyikitubokin iwon kaapei ka ŋituŋa ŋuluce ŋulu ka akwap.

³³Aŋun nai ŋikaitotoi kaŋ, ani iryamiryamete iyes akinyam Akimuj ŋina a Ekapolon, itemokino kidarunos daadaŋ.

³⁴Ani kenyamit idiotuŋanan akoro, itemokino iŋes kimuj mono alore keŋ, ikotere nyikitubok Akuj iyes daadaŋ. Ŋuna etapito ŋakiro ŋunace, akalimokini ayoŋ iyes ŋuna kitiya apaki ŋina abunio ayoŋ neni kus.