Read ngakarimojong 1 Ŋikor. 15 Bible Online

1 Ŋikor. 15 - ngakarimojong bible

1 Ŋikor. 15

¹Ŋikaitotoi kaŋ, acamit ayoŋ akitatamun iyes Ŋakiro ŋuna Ajokak ŋuna abu ayoŋ okolimok iyes, ŋuna ipotu iyes tocamut, ŋuna tokona icasitor anupit kus.

²Ikiunete iyes Ŋakiro ŋuna Ajokak ŋun, erae kicata iyes aneni kec lopite ŋolo akalimokinitor ayoŋ iyes--ŋaye kerae anupit kus akoŋinait!

³Abu ayoŋ mono ekobu neni kus ŋakiro ŋuna apolok, ŋuna abu ayoŋ ejau: Abu Kristo totwan aŋuna a ŋasecisya yok, ikwaŋina igiritere Nakigireta.

⁴Aponi iŋes tonukae, kiteyarunae kelunyar ŋirwa ŋiuni, ikwaŋina igiritere Nakigireta.

⁵Abu kitoodiun neni a Petero ka neni a Ŋikiyakia a ŋulutomon ka ŋiarei.

⁶Ekaku nabo, abu kitoodiun apaki apei neni a ŋikewuapak keŋ a ŋulu adeparit ekimar kec ŋamiae ŋakan. Eriŋa tokona ŋice kec daŋ eyarete, erae ketwakito ŋice daŋ.

⁷Ekaku nai, abu kitoodikin neni a Yakobo ka neni a Ŋikiyakia a ŋuluce a daadaŋ.

⁸Ekaku a daadaŋ, abu eketoodikin ayoŋ daŋ, tari kekoni ayoŋ ituŋanan ŋini ikirikiriunitae akidoun.

⁹Anerae arae ayoŋ ecaryoit a Lokiyakia, nyitemokino akanyaritae ekiyakia, anerae abu ayoŋ esican Ŋikristo.

¹⁰Nai aŋuna ka ajokis a ŋina ka Akuj, arae ayoŋ tokona ekiyakia ka nyeruworo ajokis ŋina abu iŋes okoinak ayoŋ akoŋinait. Akilo, etiya ayoŋ nooi adepar Ŋikiyakia ŋuluce daadaŋ, tari pa kerae agogoŋu kaŋ a elope etiyae, nai ajokis ŋina ka Akuj ŋina eyai neni kaŋ.

¹¹Aŋun, kitorunito Ŋakiro ŋuna Ajokak ŋun neni kaŋ kori neni a Ŋikiyakia a ŋuluce, ŋakiro ŋun ikes elimonokinio isua, ido ikes pei inupito iyes.

¹²Ŋakiro nu ikes ikilimonokini isua: adaun akiteyarun Kristo alokatwak. Kaanukiro nai ebaakatar ŋice kus nyiteyarunio ŋikatwak?

¹³Ani kemam ayarun a ŋikatwak, iŋes atemar nyiteyaruna Kristo;

¹⁴ani pa kiteyarunitae Kristo, iŋes atemar erae alimonokin kosi akoŋinait ka erae anupit kus daŋ akoŋinait.

¹⁵Nabo daŋ, ikitakani isua esibit ikimodyanakini ŋituŋa ikirworo ŋuna ka Akuj, anerae aponi isua tolimonokinae ebe abu Akuj kiteyaru Kristo alokatwak. Nai pa kiteyarunit Akuj Kristo, iŋes kire atemar nyiteyarunio ŋikatwak.

¹⁶Ani pa kiteyarun ŋikatwak, iŋes atemar nyiteyaruna Kristo.

¹⁷Ani pa kiteyarunitae Kristo, iŋes atemar erae anupit kus akoŋinait ka eriŋa nyisyoniyo ŋasecisya kus.

¹⁸Iŋes nabo atemar, tari ŋulu atwaka enupito Kristo daŋ abukorosi.

¹⁹Ani kerae akigeno kosi neni a Kristo ŋina ka akiyar a na bon, iŋes atemar itemokino ŋituŋa ikisyonito isua adepar tari idiotuŋanan anakwap.

²⁰Nai kire, adaun akiteyarun Kristo alokatwak ka itoodiunito ŋun atemar iteyarunio daŋ ŋulu etwakito.

²¹Anerae ikwaŋinapei ayaunia ituŋanan ipei atwanare neni a ŋituŋa, ayau daŋ ituŋanan ipei ayarun alokatwak neni a ŋituŋa.

²²Anerae ikwaŋinapei etwakyata ŋituŋa daadaŋ anakimorikina kec ka Adam, iteyarunio daŋ anakimorikina kec ka Kristo.

²³Nai iteyarunio ŋinituŋanan ikona: eteyarun mono Kristo; ekaku iteyarunio ŋikanupak a Kristo apaki ŋina eboŋunio iŋes.

²⁴Todolu nai asalunet ŋina ka akwap; apaki ŋin, ilouni Kristo ŋapukasinei ka ŋapolon ka ŋapedorosyo daadaŋ, ido inak Apukan neni ka Akuj a Papa.

²⁵Anerae, itemokino Kristo kipuka akitodol ŋina ilounia Akuj ŋimoi keŋ daadaŋ, kiwuak ikes kwap ŋakejen a Kristo.

²⁶Emoit ŋolo ilounio ekaku iŋes atwanare.

²⁷Anerae ebasi Ŋakigireta ebe, “Adau Akuj akiwuakin ŋiboro daadaŋ kwap ŋakejen a Kristo.” Nai ileere atemar nyimarakinitae Akuj nakiro ŋuna ebasi “Ŋiboro daadaŋ”, anerae Akuj ewuakini ŋiboro daadaŋ kwap ŋakejen a Kristo.

²⁸Nai ani iwuakinio ŋiboro daadaŋ Napukan a Kristo, ebuni nai Lokoku elope kiwuakin Napukan ka Akuj a ŋina adau akiwuakin ŋiboro daadaŋ Napukan a Kristo, ikotere nai toruwor Akuj akepukan a daadaŋ.

²⁹Anukiro nai elosikinito ŋituŋa ŋulu ibatisao aŋuna a ŋikatwak a ŋulu nyibatisatae? Ani pa kiteyarunio ŋikatwak, ikwapei ebaakatar ŋice, kaanukiro nai ibatisaere ŋituŋa ŋul aŋuna a ŋikatwak?

³⁰Kaanukiro ikiwuakinitor isua akiyar kosi natyokisyo ŋisaae daadaŋ?

³¹Ŋikaitotoi kaŋ, eyai atwanare kiŋaren kaŋ jwi jwi! Erae nu ŋuna a kire lopite ŋolo eturor ayoŋ aŋuna kus anakimorikina yok ka Yesu Kristo Ekapolon.

³²Inyoni nai aryamuni ayoŋ aŋuna ca ke ekibure a ituŋanan, erae ketijiye ŋituŋa ŋulu ikote ŋityaŋ ŋulu adedeŋak alo Epeso? Ani pa kiteyarun ŋikatwak, etiyata nai ikwapei elimunitere, “Emuja ka omata, anerae ikitwaki moi taparacu.”

³³Tocoito nyikimodikin! “Emunaarete ŋirukitos ŋulu aronok ŋipitesyo ŋulu ajokak.”

³⁴Itemokino tokyenyut, tojoŋoto asecesec, anerae nyeyenete ŋice alokidiŋ kus Akuj. Alimunit ayoŋ ŋun akisirum iyes ŋileec.

³⁵Nai epedori ituŋanan ice akiŋit atemar, “Ikokinio iteyarunio ŋikatwak ai? Ŋawat mono ŋuna ikote ai eyakaunotor ikes?”

³⁶Iyoŋ ebaŋaanot! Ŋina iekinia iyoŋ ekinyomit nalup, nyelomuni, nyeyari, mati mono ketwana.

³⁷Ibore ŋini iekini iyoŋ erae ca ekinyomit, kerae emomwae kori ekinyomit ece daadaŋ, nai meere ekitoe ŋolo apolou ŋolo adau arupun.

³⁸Nai einakinio ekinyomit ŋol akuwan lopite ŋolo ecamitor Akuj; einakini iŋes ŋolokinyomit akuwan ŋina itemokino.

³⁹Nyikwaan ŋawat a ŋiboorei a ŋulu eyarete; eyakatar ŋituŋa ekuwane ŋolo egelaana, ŋityaŋ daŋ eyakatar ekuwane ece, ŋikyeny daŋ ece ka ŋikolya daŋ ekecekuwane.

⁴⁰Eyai ekuwane ŋolo alokidiama ka eyai ŋolo alokwap; akibuses ŋina a ŋawat a ŋiboorei a ŋulu alokidiama nyikwaan ka akibuses ŋina a ŋiboorei a ŋulu alokwap.

⁴¹Eyakar akoloŋ akibuses keŋ ka alope, elap daŋ eyakar akibuses keŋ, ŋikacer daŋ eyakatar akibuses ŋina egelaana; nabo egelaana akibuses a ŋolokacerit.

⁴²Ikoni nenipei ayarun a ŋikatwak daŋ. Apaki ŋina enukere akuwan, erae ŋina inyasuna; ani iteyarunio, eruwor ŋina nyinyasuna.

⁴³Apaki ŋina enukere, eŋotor ka epalag; ani iteyarunio, ibusiar ka egogoŋior.

⁴⁴Ani enukio, erae iŋes akuwan ŋina eyakar ekuwane ŋolo ka akwap a na; ani iteyarunio, eruwor akuwan ŋina eyakar ekuwane ŋolo erae etau. Ikwapei eyakar akuwan ŋina erae ekuwane ŋolo ka akwap a na, itemokino daŋ toyai akuwan ŋina eyakar ekuwane ŋolo erae etau.

⁴⁵Anerae ebasi Ŋakigireta ebe, “Abu Akuj tosub ituŋanan ŋini ke ekiŋaren--Adam--erae ituŋanan ŋini eyari”; nai Adam ŋolo esidyon--Kristo--abu toruwor Etau ŋolo einanakini akiyar.

⁴⁶Meere akuwan ŋina eyakar ekuwane ŋolo erae etau iŋareni mono, nai akuwan ŋina eyakar ekuwane ŋolo ka akwap a na; totupak nai ekuwane ŋolo erae etau.

⁴⁷Adam ŋolo eŋarenon, ŋolo asubunio analup, erae ekaakwap. Adam ŋolo a ŋiarei ŋolo erae Kristo, erae ekanakuj.

⁴⁸Ŋituŋa ŋulu ka akwap, ikote ŋolo asubunio analup; ŋituŋa ŋulu anakuj, ikote ŋolo anakuj.

⁴⁹Ikwapei ikikwaanar tokona iwon ka ituŋanan ŋini asubunio analup, ikwaŋinapei, ikikwaanikin iwon ka ituŋanan ŋini anakuj.

⁵⁰Ŋikaitotoi, apolou a ŋakiro a ŋun iŋes na: ibore ŋini esubunitae anakiriŋ ka anaokot, nyepedori aryamun Apukan ka Akuj; ibore ŋini inyasun, nyeryamuni ibore ŋini nyinyasun.

⁵¹Kiirasi ŋakiro ŋuna a kire ŋuna imunono nu: nyikitwaki iwon daadaŋ, nai ani eruuni arupepe ŋina esidyon, ikilocokinio iwon daadaŋ atipei, ikwa akirwapakinet ŋina ka akoŋu. Anerae ani eruuni arupepe, iteyarunio ŋikatwak, nyetwakete nabo jik; ka ikilocokinio iwon ŋulu ikiyari.

⁵²

⁵³Anerae ibore ŋini inyasun, itemokino kilocokinoe toruwor ŋini nyinyasun; ibore ŋini etwani, itemokino kilocokinoe toruwor ŋini nyetwani jik.

⁵⁴Aŋun nai, kedau akinyasuno akilocokin toruwor ŋina nyinyasun ka ibore ŋini etwani toruwor ŋini nyetwani jik, iyookin nai Ŋakigireta ŋuna ebasi, “Adaun atwanare akinyasun; eloun, erikakin!

⁵⁵Atwanare, ai eyai akiloun kon? Ai atwanare eyai apedor kon ŋina wanet?”

⁵⁶Eryamunit atwanare apedor ŋina wanet anasecit ka eryamunit asecit apedor keŋ a Lokisila.

⁵⁷Nai ikilakara neni ka Akuj, a ŋina ikiinak iwon akiloun aŋuna ke Ekapolon yok Yesu Kristo!

⁵⁸Aŋun nai, ŋikaitotoi kaŋ ŋuluminan, kicata ka nyiryaŋiryaŋasi. Kitiyata ka agogoŋu etic ŋolo ke Ekapolon ikwapei iyeniata iyes atemar emam etic ŋolo itiyaete iyes anakimorikina ke Ekapolon, ŋolo eruwor ekoŋinait.