Read ngakarimojong 1 Ŋikor. 16 Bible Online

1 Ŋikor. 16 - ngakarimojong bible

1 Ŋikor. 16

¹Acamit tokona akirwor ŋakiro ŋuna etapito ŋuna a ŋisiliŋa a ŋulu erae tocunakinae kiŋaranakinere ŋituŋa ŋulu ka Akuj ŋulu eyakasi Yudeya. Itemokino iyes kitiyata ŋuna abu ayoŋ olimok ŋatukon ŋuna a Ŋikristo a ŋulu anakwap a Galatia.

²A ŋinakoloŋit a Esabit, itemokino ŋinituŋanan kus toseta nawae ŋisiliŋa ŋidi lotyae ŋolo ke ebari keŋ, kidiatakinos, ikotere ani abuni ayoŋ, nyecuni nabo ŋice.

³Ani adoluni ayoŋ neni kus, ainakini ŋikilyok ŋulu iseunete iyes ŋabaruwae ŋuna elimorito atemar erae ikes ataŋae; kiyakiyarae ikes yaasi ŋainakineta kus Yerusalem.

⁴Ani erae kejok ayoŋ daŋ alosit, ikirukori ayoŋ ka ikes.

⁵Abuni ayoŋ aanyun iyes kadau akitor nakwap a Makedonia, anerae itemokino etor Makedonia.

⁶Acepaki ikiruki iwon adiouriyen, kori daŋ ikiruki iwon ŋirwa ŋulu ka alilimu; ikotere ikiŋarakis iyes ayoŋ olot kiŋaren analosit kaŋ neni ca alosi ayoŋ daadaŋ.

⁷Nyacamit akitorun aanyun iyes tokona alotooma apaki na ŋina euruwuana, nai egeno ayoŋ akiya adiopaki ŋina aoyan ka iyes, erae kecamaki Ekapolon.

⁸Nai eboi ayoŋ a ne alotaun a Epeso akitodol akoloŋit ŋina a Pentekoste.

⁹Anerae ayakar tokona ayoŋ apaki ŋina ajokan ŋina itemokino ayoŋ etiyaa etic ŋolo apolon ŋolo emaikina etiya, tari kelalak ŋiketepegak a ne.

¹⁰Ani kebu Timoteo neni kus, kijautu iŋes ejok, ikotere nyekuryana iŋes irukito ka iyes; anerae itiyae iŋes etic ŋolo ke Ekapolon ikwa ayoŋ.

¹¹Nyejamuwa idiotuŋanan iŋes. Kiŋarakisi iŋes, ikotere torubak elosi a ekisil, ido toboŋu neni kaŋ; anerae edarit ayoŋ iŋes torukut ka ŋikanupak.

¹²Ŋuna etapito lokaato yok Apolo, abu ayoŋ esimukek iŋes nooi abunore kaapei ka ŋikaitotoi ŋuluce aanyun iyes, nai nyecamunit iŋes nooi abunore inaa ŋirwa lu. Nai ani eryamuni iŋes apaki, ebuni.

¹³Totenito, kicata ananupit, totitiny ka togogoŋ!

¹⁴Ŋuna daadaŋ itiyaete iyes, kitiyata anamina.

¹⁵Iyenete iyes Stepana ka ŋituŋa ŋulu ke ekal keŋ, erae ikes Ŋikristo ŋulu esyaunete akinup anakwap a ŋina ka Akaia ka ainakinosi akitiya etic aŋuna a ŋituŋa ka Akuj. Ekemaimai ayoŋ iyes ŋikaitotoi,

¹⁶topupo ŋikilyok ŋulu ikote ŋul ka ŋulu itiyaete ka ikes.

¹⁷Alakara ayoŋ aŋuna ka abunore a Stepana, Potunato ka Akaiko, anerae etemokis ikes daadaŋ ŋuna arae ŋuna kus;

¹⁸anerae esiyeŋut etau kaŋ, ikwaŋinapei aponiata kisieŋuniata ŋitai kus. Ejok akerit ŋikilyok ŋulu ikote ŋul.

¹⁹Ikimalaete iyes ŋituŋa ŋulu ka akwap a Asia. Ikimalaete iyes nooi Akwila ka Prisila ta ŋikanupak ŋulu iryamunun kai kec akilip alotooma Ekapolon.

²⁰Ikimalaete iyes ŋikaitotoi daadaŋ ŋulu eya ne. Kimalas itunasi make itoodiunito atemar iminin.

²¹Ayoŋ Paulo egirit ŋimalasyo lu ka akan kaŋ a elope.

²²Ani pa kemina ituŋanan Ekapolon, itemokino iŋes kicenoi. Ekapolon kosi, bua!

²³Toyai neni kus ajokis ŋina ke Ekapolon Yesu.

²⁴Toyai neni kus daadaŋ amina kaŋ anakimorikina yok ka Yesu Kristo.