Read ngakarimojong 1 Ŋikor. 2 Bible Online

1 Ŋikor. 2 - ngakarimojong bible

1 Ŋikor. 2

¹Ŋikaitotoi, apaki ŋina abunio ayoŋ neni kus alimonokin ŋakiro ŋuna ka Akuj, ŋuna imunono pa erworo ayoŋ ebeli ŋakiro anapiiryanut kori anaosou.

²Anerae abu ayoŋ otyaku atemar nyitemokino ayoŋ eketatam iyes idiobore, mati ŋuna a Yesu Kristo bon a ŋolo aponi kibubukinoe lomusalaba.

³Apaki ŋin, ayai ayoŋ neni kus arae ituŋanan ŋini palag anakuryanu a ŋina apolon ka anamaran.

⁴Ipotu iyes nyicamut ŋakiro kaŋ aŋuna ka aosou a ŋina a ŋituŋa, nai arae aŋuna abunio Akuj kitoodiu atemar erae ŋuna a kire anapedor a ŋina ke Etau a ŋolo ka Akuj.

⁵Abu ayoŋ olimonok ikoŋina, ikotere nyeruwor anupit kus ŋina ebunit anaosou a ŋituŋa, nai anapedor a ŋina ka Akuj.

⁶Tari kikote nen, ikitatami isua ka aosou neni a ŋituŋa a ŋulu epakito anatameta kec tari pa kerae aosou na ŋina ka akwap a na, kori ŋina a ŋikepukak a ŋulu ka akwap a na a ŋulu esaluni apolou kec.

⁷Nai ikitatami isua iyes aosou ŋina ka Akuj ŋina imunono ŋina iwuaitae. Eriŋa tari akwap nyesubuna, keris Akuj ketyaku atemar itemokino iwon omora ka iŋes apolou keŋ.

⁸Amam tari ŋikepukak ŋulu ka akwap a na ŋulu ayenete ŋun, amam tari epei daŋ; kerae toyenunito, pa kibubukinito Ekapolon ŋolo ka apolou.

⁹Ikwaŋina igiritere Nakigireta ebe, “Ibore ŋini nyiŋolikina ŋakonyen, kori nyiirara ŋaki, kori nyetama ŋatameta a ŋituŋa, erae ibore ŋin ŋini abu Akuj kitemok aŋuna a ŋulu eminasi iŋes.”

¹⁰Nai adau Akuj akitoodikin isua ŋun alotooma Etau keŋ. Eripiripi Etau ŋakiro daadaŋ, tari ŋuna iwuaitae ŋuna ka Akuj.

¹¹Ŋae alotuŋa eyeni ŋatameta a ŋuluce? Etau a ituŋanan ŋolo eyai tooma keŋ, iŋes bon eyeni. Ikwaŋinapei, emam ituŋanan eyeni ŋatameta ŋuna ka Akuj mati Etau ŋolo ka Akuj.

¹²Nai aryamun isua Etau ŋolo ebunit aneni ka Akuj, meere ŋolo ka akwap, ikotere oyenuniata ibore daadaŋ ŋini ikiinak isua Akuj ikoŋin.

¹³Aŋun nai, ikilimonokini isua ŋakiro ŋun alopite a ŋolo itatamya Etau ŋolo ka Akuj, meere alopite a ŋolo itatamyata ŋituŋa anaosou kec, nai lopite ŋolopei ikilimonokinia isua ŋakiro ŋuna ka Akuj ikwa ecamitor Etau keŋ.

¹⁴Ituŋanan ŋini emamukar Etau ŋolo ka Akuj, nyecamuni ŋakiro ŋuna ke Etau a ŋolo ka Akuj, anerae erae ŋun abaŋao aneni keŋ; ido nyepedori ayenun ikes, anerae epedorosi ŋun ayenun anakiŋarakinet a ŋina ke Etau a ŋolo ka Akuj bon.

¹⁵Ituŋanan ŋini eyakar Etau ŋolo ka Akuj, epedori ayenun aronis ka ajokis a ŋinibore a daadaŋ, nai emam ŋini epedori ayenun aronis ka ajokis keŋ.

¹⁶Igiritae Nakigireta ebe, “Ŋae ayenu ŋatameta ŋuna ke Ekapolon Akuj, ŋae epedori akitatam Akuj?” Nai ikiyakar isua ŋatameta ŋuna a Kristo.