Read ngakarimojong 1 Ŋikor. 3 Bible Online

1 Ŋikor. 3 - ngakarimojong bible

1 Ŋikor. 3

¹Ŋikaitotoi, pa apedorit ayoŋ akisirwor iyes ikwa ŋituŋa ŋulu ipukat Etau ŋolo ka Akuj, nai ikwa ŋituŋa ŋulu ipukato ŋipitesyo ŋulu ka aseconu; ikote iyes ŋidwe ŋulu cicik ananupit kus Kristo.

²Abu ayoŋ eketan iyes a ŋakile, meere ka akimuj a ŋina agogoŋon, anerae ariŋa iyes idisyak. Tari tokona daŋ eriŋa iyes ikote nenipei,

³anerae eriŋa ŋipitesyo ŋulu ka aseconu ikipukato iyes. Anerae ani keyai arakao ka ebura kidiŋ kus, nyitoodiunito nai ŋun atemar ikipukato ŋipitesyo ŋulu ka aseconu ka ikwaan iyes ka ŋituŋa ŋuluce a?

⁴Anerae kelimu ipei tema, “Arae ayoŋ ŋini a Paulo”, tema ice, “Arae ayoŋ ŋini ka Apolo”, nyikote nai iyes ŋituŋa ŋuluce ŋulu nyipukat Etau ŋolo ka Akuj a?

⁵Nyo mono ca Apolo? Ka nyo erae Paulo? Ikirae isua ŋiketiyak ŋulu ka Akuj ŋulu apotu ikitunupa iyes, ikwaŋina ekorakinitor Ekapolon ŋinituŋanan ekeetic.

⁶Abu ayoŋ odupak ekinyomit, tobukok Apolo ŋakipi; nai Akuj iŋes etopolouni.

⁷Aŋun nai, emam apolou eyai neni a ŋini adupan kori neni a ŋini abukon ŋakipi, nai eyai neni ka Akuj bon a ŋina itopoloe ŋinibore.

⁸Ikwaan ituŋanan ŋini edupi ka ŋini ebuki ŋakipi ka eryamuni ŋinituŋanan aneni ka Akuj eropit lotyae ŋolo ke etic keŋ.

⁹Anerae ikitiyae isua kaapei ka Akuj. Irae iyes emanikor ŋolo ka Akuj. Iraakasi daŋ Akai ka Akuj.

¹⁰Aŋuna ka ajokis a ŋina abu Akuj okoinak ayoŋ, abu etiya ikwa ekadukon ŋolo aoson, odukok akisyakinet ŋina ka akai, ido eduki ituŋanan ice akai ŋin. Nai itemokino ŋinituŋanan tocoikinete epite ŋolo edukyo akai ŋin.

¹¹Anerae emam akisyakinet ace ŋina epedori idiotuŋanan abokakin akilo ŋina erae Yesu Kristo.

¹²Edukete ŋituŋa ŋice nakisyakinet ŋin a egolid, esilipa kori a ŋamoru a ŋuna epol egyelit; ŋice edukete a ŋakito, a ŋanya kori a eoot.

¹³Akoloŋit ŋina esidyon, isileereunio etic a ŋinituŋanan alotooma akim, anerae ikatakinio ka akim ibore ŋini edukitor iŋes.

¹⁴Ani pa kenomiya akim ibore ŋini kedukokinit ituŋanan ŋin nakisyakinet, eryamuni iŋes eropit.

¹⁵Ani kenomiya akim ibore ŋini kedukokinit iŋes nakisyakinet, nyeryamuni ituŋanan ŋin eropit, nai eiun iŋes ikwa ituŋanan ŋini abucun anakim.

¹⁶Nyiyenete mono iyes atemar iraakasi iyes Akai ka Akuj ka eyai Etau ŋolo ka Akuj tooma kus a?

¹⁷Ituŋanan ŋini emunaari Akai ka Akuj, emunaari Akuj iŋes daŋ, anerae erae Akai ka Akuj ŋina keŋ bon ka iyes pei iraakasi Akai keŋ.

¹⁸Nyitemokino idiotuŋanan emodikin bon. Ani ketami idiotuŋanan alokidiŋ kus atemar aos iŋes alopitesyo a ŋulu ka akwap a na, itemokino iŋes tobaŋaan, ikotere nai eruwor ŋini aoson kire.

¹⁹Anerae aosou ŋina ka akwap a na, erae abaŋao alokiŋaren Akuj. Ikwaŋina igiritere Nakigireta ebe, “Ikamununui Akuj ŋikaosok anaosou kec”

²⁰ka ebasi Ŋakigireta aiwace, “Eyeni Ekapolon Akuj atemar erae ŋatameta a ŋikaosok ŋakoŋinae.”

²¹Aŋun nai, nyitemokino iyes iturokinotor idiotuŋanan. Erae ŋiboro daadaŋ ŋulu kus;

²²kerae Paulo, Apolo kori Petero; kerae akwap na, akiyar kori atwanare, kerae ŋuna a tokona kori ŋuna a rwanu. Erae daadaŋ ŋulu kus;

²³nai iraakasi iyes ŋulu a Kristo ka erae Kristo ŋolo ka Akuj.