Read ngakarimojong 1 Ŋikor. 5 Bible Online

1 Ŋikor. 5 - ngakarimojong bible

1 Ŋikor. 5

¹Elimunitoe kire atemar eyai amalao kidiŋ kus ŋina aronon nooi, ŋina nyeryamun tari aneni a ŋulu nyenupito Akuj ŋina a kire. Anerae elimunitoe ebe eyai ekile ŋolo elomenene aberu a papa keŋ ŋinace!

²Kaanukiro nai iturotor iyes? Kitemokino iyes kiyaloloŋete, nabo kitemokino ituŋanan ŋini itiyae ŋakiro ŋun, totyakarae anatukot kus.

³Aneni kaŋ, adau ayoŋ alokiro ke Ekapolon Yesu atubokin ŋini itiyae ŋun esibit kikirukit iyes ka ayoŋ alo Korinto, tari daŋ kalwana ayoŋ aneni kus, ikirukit iyes ka ayoŋ jik alotau kaŋ. Apaki ŋina itukokinotor iyes ka apedor a ŋina ke Ekapolon yok Yesu, ikirukit iwon kaapei alotau.

⁵Itemokino iyes nai apaki ŋin kipotokis ituŋanan ŋin neni a Satan, ikotere kinyasunae akuwan keŋ, ido toiunae etau keŋ Akoloŋit ŋina ke Ekapolon.

⁶Nyitemokino iyes iturosi! Nyiyenete mono iyes alimunet ŋina ebala, “Itubuunete ŋakinyalet ŋuna ekudyoko ŋakirya ŋuna alalak” a?

⁷Itemokino tolemasi ŋakinyalet ŋuna ŋorok ŋuna erae asecit, kikwaanikinos ka amurat ŋina kitete ŋina emam ŋakinyalet, ikotere tosegut nai nooi ikwapei kire ayenia ayoŋ atemar ikote iyes neni. Anerae aponi Kristo ŋolo erae imesek ŋini a Paska toarae erae amuronot yok.

⁸Nyikinumunum Paska yok a ŋamugati a ŋuna eya ŋakinyalet kec ŋuna ŋorok ŋuna ka asecit ka aronis, nai enumunuma a ŋamugati a ŋuna emam ŋakinyalet--ŋamugati ŋuna itesegunitae ka ŋuna a kire.

⁹Anabaruwa a ŋina ekegirakinit ayoŋ iyes, abu okolimok iyes aesikin arukit ka ŋituŋa ŋulu malaanotin.

¹⁰Pa akalimokinit ayoŋ iyes atemar nyirukito ka ŋituŋa ŋulu nyerae ŋikanupak ŋulu emalaaka, kori ŋulu erorokaka kori ŋulu ekokolaka kori ŋulu ilipete neni a ŋakujo a ŋace. Ani kerae olimunite ayoŋ ikoŋina, kitemokino iyes aesikin akwap na jik.

¹¹Nai ŋuna abu ayoŋ olimu ikes nu: nyirukito ka ituŋanan ŋini ebala arae iŋes lokaato alotooma Kristo, nai tomalaana kori tororokana kori kilipi neni a ŋakujo a ŋace kori tosyomar ŋuluce kori tomerana kori tokokolana. Nyimora tari ka ituŋanan ŋin akimuj.

¹²Nyerae ekaatic atubonokin ŋituŋa ŋulu nyeyakasi natukot a Ŋikristo. Akuj iŋes etubokini ikes. Nai itemokino iyes totubonokinete ŋituŋa ŋulu eyakasi natukot a Ŋikristo ikwapei ebaakatar Ŋakigireta ebe, “Totyakasi anatukot kus ituŋanan ŋini itiyae aronis.”