Read ngakarimojong 1 Ŋikor. 7 Bible Online

1 Ŋikor. 7 - ngakarimojong bible

1 Ŋikor. 7

¹Tokona, acamit ayoŋ akirwor ŋakiro ŋuna etapito ŋuna ipotu iyes ikigirakis ayoŋ. Itiyae ekile ŋuna ajokak erae pa keryamu aberu.

²Nai aŋuna elalaata ŋakitemyeta ŋuna ka adoteu, itemokino ŋolokile toryamu aberu keŋ a elope ka ŋinaberu ekile keŋ ka alope.

³Itemokino ekile kitiya etic keŋ ejok ikwapei eraakar ekile, aberu daŋ kitiya etic keŋ ikwapei eraakar aberu.

⁴Nyepolokinit aberu akuwan keŋ ka alope, nai ekile epolokinit; ikwaŋinapei, nyepolokinit ekile akuwan keŋ a elope, nai aberu epolokinit.

⁵Nyimikasi make ŋawat kus, mati sek icamuna iyes ikoŋina apaki adio, ikotere kisitiyata apaki ŋin akilipya. Nai kiryamunos nabo ikwapei ekile ka aberu ikwaŋinapei sek, ikotere nyikitem Satan iyes, anerae imamukatar iyes akiyapara.

⁶Alimunit ayoŋ ŋun pa akareikinit, nai erae ca acamakinet.

⁷Okoe, kerae kikote ŋituŋa daadaŋ ayoŋ ŋolo amamukar aberu. Nai eyakar ŋinituŋanan ainakinet keŋ aneni ka Akuj; icetuŋanan ainakinet ŋina ikoni ŋin, ice ŋina egelaana.

⁸Abala nai ayoŋ neni a ŋulu nyiitara ka neni a ŋapuseru ebe, ejok ikes akiboi nyiitara ikwa ayoŋ.

⁹Nai ani pa kepedorito ikes akiyaparit ekibure kec, itemokino kiitasi. Ejok akiitar akilo akitaara ekibure.

¹⁰Nai abala ayoŋ neni a ŋulu iitarito ebe, nyerae alimunet na ŋina kaŋ, nai ŋina ke Ekapolon: nyitemokino aberu etyakar aneni ke ekile keŋ.

¹¹Nai ani ketyakar, itemokino iŋes kiboi emam ekile kori kisila toboŋokinos ka ekile keŋ. Nyitemokino ekile elaki aberu keŋ.

¹²Nai neni a ŋuluce, alimuni ayoŋ elope, meere Ekapolon, ebe: ani keyakar Ekristoit aberu ŋina nyerae Akristoit, nai tocamunite aberu ŋin akiruk ka iŋes, nyitemokino iŋes tolak.

¹³Keyakar aberu ŋina erae Akristoit ekile ŋolo nyerae Ekristoit, nai tocamunite ekile ŋol akiruk ka iŋes, nyitemokino iŋes totyakar.

¹⁴Anerae ecamunit Akuj iŋes aŋuna ka akimorikina ka aberu keŋ. Aberu ŋina nyerae Akristoit daŋ ecamunit Akuj aŋuna ka akimorikina ka ekile ŋolo Kristoit. Kerae nyikote nen, kikote ŋidwe kec ŋulu a ŋituŋa a ŋulu nyenupito Akuj; nai ecamunit Akuj ikes.

¹⁵Nai ani kecamit ŋini nyerae Ekristoit atyakar aneni ke Ekristoit, kimyekisi totyakar. Anakiro a ŋuna ikote ŋun, nyereikinitae ŋini erae Ekristoit, kerae ekile kori aberu. Anerae adau Akuj anyarare iyes akiboi alotooma ekisil.

¹⁶Iyoŋ aberu ŋina Kristoit, ianyuni iyoŋ ikwaani atemar iuni iyoŋ lokile kon? Iyoŋ ekile ŋolo Kristoit, ianyuni iyoŋ ikwaani atemar iuni iyoŋ aberu kon?

¹⁷Itemokino ŋinituŋanan torubak iboi alopite a ŋolo einakinit Akuj iŋes akiboi, ikwaŋina eboiyo apaki ŋina anyaraa Akuj iŋes. Erae akirot na ŋina etatami ayoŋ natukon a Ŋikristo daadaŋ.

¹⁸Ani kileŋeritae sek ituŋanan apaki ŋina enyaraa Akuj iŋes, nyitemokino iŋes alemar ŋimacarin ŋulu ka akileŋer; ani pa kileŋeritae sek ituŋanan apaki ŋina enyaraa Akuj iŋes, nyitemokino iŋes kileŋerae.

¹⁹Tari kileŋeritae ituŋanan kori kemam, erae ŋun ŋakoŋinae aneni ka Akuj, nai akiwuap Ŋikisila ŋulu ka Akuj iŋes epol.

²⁰Itemokino ŋinituŋanan torubak eyai lopite ŋolo sek anyaraa Akuj iŋes.

²¹Ani sek kirae iyoŋ epito apaki ŋina ikinyaraa Akuj iyoŋ, nyimitak; nai ani kipedori iyoŋ aryamun alacakino, kisitiya apaki kon.

²²Anerae, epito ŋolo adau Ekapolon anyarare, aruwor ŋolo elacakina, ŋolo ke Ekapolon; ikwaŋinapei, ŋini elacakina, ŋini adau Kristo anyarare, aruwor epito a Kristo.

²³Abu Akuj itogyelu iyes aruwor ŋulu keŋ, aŋun, nyiruworosi ŋipi a ŋituŋa.

²⁴Ŋikaitotoi, itemokino ŋinituŋanan torubak imorikina ka Akuj lopite ŋolopei ayakar iŋes apaki ŋina anyaraa Akuj iŋes.

²⁵Egiri tokona ayoŋ ŋuna ikamunito ŋuna ipotu iyes kigira aŋuna a ŋituŋa a ŋulu nyiitara: emam ŋuna akalimoki ayoŋ Ekapolon, nai alimuni ayoŋ ŋuna atami ayoŋ elope, ikwapei araakar ayoŋ ŋolo ekinyoma aŋuna ka akisyon a ŋina ke Ekapolon.

²⁶Ani eŋolikini ayoŋ ŋican ŋulu tokona eyakasi, atami ayoŋ atemar, ejok ekile akiboi nyiitara.

²⁷Ani kiitarit iyoŋ, nyiwar atyakar aneni ka aberu kon. Ani kimamukar iyoŋ aberu, nyiwar aryamun adio.

²⁸Nai ani kiita iyoŋ, nyisecit iyoŋ ka ani kiitar aberu ŋina sek nyiisitae, nyesecit iŋes. Nai eryamunete ŋituŋa ŋulu iitarito ŋatyokisyo ka acamit ayoŋ akiŋarakin iyes nyiryamut ŋun.

²⁹Ŋikaitotoi kaŋ, apolou a ŋakiro a ŋun iŋes na: aditeu apaki. Ameun tokona, itemokino ŋikilyok ŋulu iitarito kiboiyoto esibit nyiitarito;

³⁰ŋulu igworosi, kiboiyoto esibit nyiyaloloŋete; ŋulu ekienasi, kiboiyoto esibit nyelakara; ŋulu egyelete ŋiboro, kiboiyoto esibit nyerae ŋiboro ŋul ŋulu kec.

³¹Itemokino ŋituŋa ŋulu isitiyaete ŋiboro ŋulu ka akwap a na, kiboiyoto esibit nyidaŋakina ikes loboro ŋul. Anerae epite ŋolo eyakar akwap na tokona, esaluni.

³²Acamit ayoŋ iyes tomamukatar amitakinit aneni kus. Emitakinit ekile ŋolo nyiitarit etic ŋolo ke Ekapolon, anerae ecamit iŋes akitalakar Ekapolon.

³³Nai emitakinit ekile ŋolo iitarit ŋiboro ŋulu ka akwap a na, anerae ecamit iŋes akitalakar akeeberu;

³⁴aŋun, iriyarito iŋes ŋirotin ŋiarei. Aberu ŋina nyiitit kori apese ŋina nyiryamakina ka ekile emitakinit etic ŋolo ke Ekapolon, anerae ecamit iŋes ainakin akuwan ka etau keŋ daŋ neni ke Ekapolon. Nai aberu ŋina iitit, emitakinit ŋiboro ŋulu ka akwap a na, anerae ecamit iŋes akitalakar lokile keŋ.

³⁵Alimunit ayoŋ ŋun akiŋarakin iyes. Nyewuakinit ayoŋ neni kus egogos ŋolo apolon. Nai acamit ayoŋ iyes kiboiyoto alopite a ŋolo iyookino ka kitiyanakis Ekapolon emam akitumonor.

³⁶Ani keyai ekile ŋolo etami atemar nyejokak ŋipitesyo keŋ alotooma aŋayaŋayat akiit apese ŋina iikina ka iŋes ka ani kegogoŋ ekibure keŋ, itemokino ikes kiitas ikwa ecamitor iŋes. Nyesecit iŋes.

³⁷Nai ani ketubu kire ekile atemar nyeitari, nyereikinitae iŋes, nabo ani kipukat iŋes ekibure keŋ ka toris sek iŋes atyaku alotau keŋ ŋuna kitiya, etiya iŋes ejok erae pa kiit apese ŋin.

³⁸Aŋun, ekile ŋolo iitari apese ŋina iikina akiito ka iŋes, itiyae ŋuna ajokak; nai ekile ŋolo nyiitari, itiyae ŋuna ajokak nooi.

³⁹Aberu ŋina iitit, eenikinito Ŋikisila ŋulu ka Akuj neni ke ekile keŋ, eriŋa ekile keŋ eyari, nai ani ketwana ekile keŋ, ecamakinio iŋes akiitakin ka ekile daadaŋ ŋolo ecamit iŋes, nai itemokino ekile ŋol torae Ekristoit.

⁴⁰Anakitam kaŋ ebuni aberu ŋin alakari nooi, erae kidoŋ iŋes nyiitara. Erae ŋun atamakinit ayoŋ, nai atami ayoŋ atemar ayakar ayoŋ daŋ Etau ŋolo ka Akuj.