Read ngakarimojong 2 Ŋikor. 1 Bible Online

2 Ŋikor. 1 - ngakarimojong bible

2 Ŋikor. 1

¹Ayoŋ Paulo ŋolo arae ekiyakia ŋolo a Yesu Kristo, aŋuna ka acamit a ŋina ka Akuj ka Timoteo lokaato yok, ikigirit abaruwa na neni ka atukot a Ŋikristo a ŋina eyai Korinto ka lotuŋa ŋulu ka Akuj ŋulu eya Akaia daadaŋ.

²Toyai neni kus ajokis ka ekisil aneni ka Akuj Papa yok ka aneni ke Ekapolon Yesu Kristo.

³Epuro ayoŋ Akuj ŋina erae Papa ke Ekapolon yok Yesu Kristo, Papa ŋolo esyonon, Akuj ŋina ebunitor akiŋarakinet daadaŋ!

⁴Ikiŋaranakini iŋes iwon alocan yok a daadaŋ, ikotere opedoryata akiŋarakin ŋuluce, ŋulu eyakatar ŋican kan akiŋarakinet ŋinapei abu Akuj ikiinak iwon.

⁵Ikwaŋinapei ikimorya iwon ŋican ŋulu a Kristo ŋulu alalak, ikimori daŋ alotooma Kristo ŋakiŋaranakineta ŋuna alalak ŋuna ka Akuj.

⁶Ani kikiryamu isua ŋican, erae aŋuna ka akiŋarakino ka aiuno kus; ani kikiŋarakin isua, erae aŋuna ka akiŋarakino kus, ikiinakinete iyes ŋun akidaŋidaŋ ŋican ŋulu ikote ŋulu idaŋidaŋio isua daŋ.

⁷Nyiloconokin akigeno kosi ŋina ikiyakar isua neni kus; anerae ikiyeni isua atemar, ikwaŋinapei ikimorya ŋican kosi, ikimori daŋ ŋakiŋaranakineta kosi.

⁸Ŋikaitotoi, ikicamit isua iyes toyenut ŋican ŋulu aponi isua toryamunae anakwap a ŋina ka Asia. Aponi isua toryamunae ŋican ŋulu alalak nooi, tolalata ŋican ŋul nooi, todaun aneni kosi akigeno daadaŋ ŋina ka akiyar.

⁹Kire aponi isua totamakinae atemar ikitubokin atwanare. Nai apotu ŋun kitiyakin, ikotere nyiwuakin isua akigeno neni kosi a ŋilopeyek, nai neni ka Akuj bon, a ŋina iteyarununui ŋikatwak.

¹⁰Erae iŋes abu itoiu isua anatwanare a ŋina ikoni ŋin ka ikiuni iŋes isua nabo; ikiwuakinit isua akigeno kosi neni keŋ: ikiuni iŋes isua nabo.

¹¹Itemokino iyes daŋ ikiŋarakis isua anakilipasinei kus; ikotere tolakaros ŋikalalak neni ka Akuj aŋuna a ŋarereŋisyo a ŋuna ikiinakini Akuj isua, a ŋuna erae aboŋokinet a ŋakilipasinei a ŋuna alalak.

¹²Erae akituro kosi na akiteyenunet ŋina a ŋatameta kosi ebe: ikitiŋ isua jwi jwi ŋituŋa daadaŋ akilo nooi iyes, anakerit ka anapatanu a ŋina ebunit aneni ka Akuj ka aŋuna ka ajokis a ŋina ka Akuj, ikidau isua akitiya nu emam aosou ŋina a ŋituŋa.

¹³Ikigirunit isua neni kus ŋakiro ŋuna ipedorete iyes asyomun ka ayenun. Egeno ayoŋ atemar,

¹⁴ikiyenunete iyes isua ejok lopite ŋolopei ikiyenuniata tokona iwadio, ikotere kiturokinos aŋuna kosi lopite ŋolopei iturokinere isua daŋ aŋuna kus Akoloŋit ŋina ke Ekapolon Yesu.

¹⁵Aŋuna ayenia ayoŋ nooi ŋuna alosikinit, iŋes acamitor abunore mono neni kus, ikotere toryamut arereŋu ace nabo.

¹⁶Atubunit sek ayoŋ abunore aanyun iyes apaki ŋina alosyo ayoŋ Makedonia ka etoru nabo neni kus aboŋuni, ikotere aryamunia adiokiŋarakinet aneni kus aŋuna ka alosit kaŋ Yudeya.

¹⁷Apaki ŋina atubunio ayoŋ nu, itamete mono iyes atemar kaŋayaŋayat ayoŋ a? Kori atuki ayoŋ alopite a ŋolo a ŋituŋa a ŋulu ka akwap, a ŋulu etenito atemar, “Ee, Ee” ka “Mam, Mam” apaki ŋinapei a?

¹⁸Akuj iŋes erae esuuda kaŋ atemar nyerae akiikinet kaŋ atemar ca “Ee” ka “Mam”.

¹⁹Anerae Yesu Kristo ŋolo erae Lokoku ka Akuj ŋolo apotu Silipano, Timoteo ka ayoŋ itolimonokin iyes ŋakiro keŋ--nyerae iŋes, “Ee” ka “Mam”, nai erae iŋes, “Ee” ŋolo ka Akuj.

²⁰Anerae aryamut ŋakiikineta daadaŋ ŋuna ka Akuj “Ee” kec aneni a Yesu. Iŋes nai ikilimununuyo alotooma Yesu Kristo atemar “Amen” apaki daadaŋ ŋina ipurore Akuj.

²¹Akuj alope iŋes ikimorik isua ka iyes alotooma Kristo ka Akuj alope ikityaku iwon,

²²ewuak iŋes emacar keŋ neni yok ka ewuak Etau keŋ lotai yok erae ibore ŋini ikiteyenuni iwon atemar eryamunio ibore ŋini adau iŋes akiikin.

²³Anyarit ayoŋ Akuj erae esuuda kaŋ, iŋes eyeni ŋuna eyakasi lotau kaŋ! Arae aŋuna pa acamitor ayoŋ akisican iyes, iŋes pa abunio ayoŋ Korinto.

²⁴Nyikicamit isua akitiŋakin iyes ŋuna itemokino tonupa; ikiyeni isua atemar icasito iyes ananupit kus. Akilo ŋun, ikitiyae isua kaapei ka iyes aŋuna ka alakara kus.