Read ngakarimojong 2 Ŋikor. 10 Bible Online

2 Ŋikor. 10 - ngakarimojong bible

2 Ŋikor. 10

¹Ayoŋ Paulo ekemaimai iyes anakiyapara ka anarimaanut a Kristo--ayoŋ ŋolo “Akuryana apaki ŋina ikirukitor iwon” ka “Aryenyaana apaki ŋina alwania aneni kus”.

²Ekelipit iyes nyikitiŋakis ayoŋ aryenyaaniar apaki ŋina adolunio inaa! Ayeni ayoŋ kire atemar apedori aryenyaanikin ŋituŋa ŋulu ikisitanakinete isua ebasi ebe ikitiyae alopite a ŋolo ka akwap a na.

³Kire, ikiboi isua anakwap a na, nai nyikiji alopite a ŋolo ka akwap a na.

⁴Nyerae ŋiboro ŋulu ikijiyo isua ŋulu ka akwap a na, nai erae ŋiboro ŋulu agogoŋok ŋulu ka Akuj. Ikisitiyae isua ŋiboro ŋul akilounia ŋajorei a ŋolo Aronon.

⁵Inyasunio isua ŋipegeta ŋulu nyiyookino ka ŋinibore eturon daadaŋ ŋini epedori akiretakin ayenut Akuj; ikikatakinit isua akikamun ŋatameta daadaŋ etacamutu akipup Kristo.

⁶Ani nai kidaut iyes akitoodiun atemar ipupete ŋuna ikilimokin, etenio isua akisican daadaŋ ŋulu nyepupete ŋuna elimokinitae ikes.

⁷Iteete iyes ŋiboro alopite a ŋolo etakaniata alokiŋa bon. Eyai idiotuŋanan ŋini ebala arae iŋes ŋini a Kristo a? Itemokino iŋes totam nabo, ido eyenuni atemar eraakae isua daŋ ŋulu a Kristo ikwapei iŋes.

⁸Anerae nyekerumito ayoŋ ŋileec, tari keturokina ayoŋ nooi aŋuna ka apolou a ŋina ikiinak Ekapolon isua adukunio iyes, nai meere akielielaar iyes.

⁹Nyacamit ayoŋ otakan esibit acamit akitubul iyes a ŋabaruwae kaŋ.

¹⁰Anerae, ebasi ŋice ebe, “Eryenyaaka ka etyoko ŋabaruwae a Paulo, nai ani ikirukit iŋes ka iwon, erae ŋolo epalag ka erae ŋakiro keŋ ŋacaryo!”

¹¹Itemokino ŋituŋa ŋul toyenete atemar ŋakiro ŋuna ikirworo isua a ŋabaruwae ikilwaka, ikwaan ka ŋuna ikirworo isua tari ikirukit ka iyes.

¹²Kire, nyikiyakar isua atitinyu akimarakin ka akikwaanikin ka ŋituŋa ŋulu igiranakinosi make ŋabaruwae ŋuna eyenunere ikes. Ebaŋaaka ikes nooi! Elemunito ikes akipimet kec a ŋilopeyek ka ipimasi ka akipimet a ŋin.

¹³Nai nyedepari akituro kosi akipimet ŋina erae etic ŋolo abu Akuj ikiinak isua ka ikimarakinitae iyes nakipimet ŋin.

¹⁴Ikimarakinitae iyes nakipimet ŋina abu Akuj ikigerok isua. Aŋun nyitedepakina isua neni sek ikigerokinitoe anaponare kosi akitodol Korinto akisera Ŋakiro ŋuna Ajokak ŋuna a Kristo.

¹⁵Aŋun, nyikituro isua aŋuna ke etic a ŋolo adaut ŋuluce akitiya, a ŋolo nyimarakinitae nakipimet ŋina sek ikigerokinit Akuj isua. Nai akilo, ikigeno isua atemar topolou anupit kus ka opedosi akitiya etic ŋolo apolon nooi alokidiŋ kus.

¹⁶Ani kitiyakinosi ŋun, ikipedori isua alosit nakwapin ŋunace ŋuna alokiŋa Korinto, ido olimonokisi Ŋakiro ŋuna Ajokak. Nyikiponi isua akiturokinor etic ŋolo adau ituŋanan ice akitiya aneni egerokinit Akuj iŋes.

¹⁷Nai ikwapei ebaakatar Ŋakigireta ebe, “Iŋes ŋini ituro, kiturokin aŋuna etiya Ekapolon.”

¹⁸Nyecamunit Ekapolon ituŋanan ŋini iteyenuna bon, nai ecamunit Ekapolon ŋini iteyenunit iŋes elope.