Read ngakarimojong 2 Ŋikor. 13 Bible Online

2 Ŋikor. 13 - ngakarimojong bible

2 Ŋikor. 13

¹Erae na abunet kaŋ ŋina a ŋauni ŋina abunio aanyun iyes. “Itemokino ŋinasitan kitogogoŋito ŋisuudae ŋiarei kori ŋulu edeparito ŋiarei,” ikwapei ebaakar Akigiret.

²Acamit alimokin iyes ŋulu idaut akisec ŋapakio ŋuna alunyarosi ka ŋuluce daadaŋ; alimunit ayoŋ ŋun paaran apaki ŋina abunitor ayoŋ neni kus abunet ŋina a ŋaarei, nai alimuni ayoŋ nabo ŋakiro ŋunapei ikwapei alwania aneni kus; apaki ŋina abunio ayoŋ nabo neni kus, esicani nooi ŋikasecak ŋul.

³Ipote iyes ayenun kire atemar irworo Kristo aneni kaŋ. Nyepalag Kristo ŋina itiyaa aneni kus, nai itiyae apedor keŋ alotooma kus.

⁴Tari kibubukinitoe iŋes lomusalaba anapalagu, eyari iŋes aŋuna ka apedor a ŋina ka Akuj. Ikipalag iwon daŋ anakimorikina ka Kristo; nai ani kikitiya isua alokidiŋ kus, ikimori apedor ŋina ka Akuj, anakiyar a ŋina a Kristo.

⁵Toripiripas make toanyut kirubakinito ananupit kus. Torotas iyes make. Nyeanyuna mono iyes atemar eyai Yesu Kristo tooma kus a? Ani kemam, iŋes atemar kikipiyosi iyes ŋakikatanakineta.

⁶Egeno ayoŋ atemar iyanyunete atemar nyipiyoro ŋakikatakineta isua.

⁷Ikilipi isua Akuj atemar nyitiyata iyes aronis adio. Nyelimunitoe isua ŋun akitoodiunor atemar ikilou isua ŋakikatakineta, nai erae ikotere kitiyata iyes ŋuna iyookino, tari kesibit ikipiyorito ŋakikatakineta isua.

⁸Anerae nyepedoryo isua akitiya idiobore ŋini itepegit ŋuna a kire, nai ikitiyae aŋuna a kire.

⁹Ikilakara isua ŋina igogoŋioto iyes, tari kikipalag isua. Aŋun, ikilipit isua Akuj kitogogoŋ ŋitai kus jik.

¹⁰Egiri ayoŋ nu eriŋa alwana aneni kus, ikotere ani abuni, nyadedeŋiar alopite a ŋolo esitiyaa apolou ŋina abu Ekapolon okoinak ayoŋ aŋuna ka adukunio, nai meere akielielaar iyes.

¹¹Ŋuna isidiyete ŋikaitotoi, ikianyun! Kitogogoŋo ŋitai kus. Kitatamas make; tocamununos make; kiboiyoto a ekisil. Toyai neni kus Akuj ŋina ka amina ka ekisil.

¹²Kimalas itunasi make itoodiunito atemar iminin.

¹³Ikimalaete iyes ŋituŋa ŋulu ka Akuj daadaŋ a ne.

¹⁴Toyai neni kus daadaŋ ajokis ŋina ke Ekapolon Yesu Kristo ka amina ŋina ka Akuj ta akimorikina ŋina ke Etau a ŋolo Asegan.