Read ngakarimojong 2 Ŋikor. 3 Bible Online

2 Ŋikor. 3 - ngakarimojong bible

2 Ŋikor. 3

¹Iŋes nai atemar esyakin nabo isua akituro a? Kori ikiitanit isua ikwapei ŋituŋa ŋuluce, aryamun ŋabaruwae ŋuna ikiyenunere isua iyes kori iyes isua?

²Iyes iraakasi ŋabaruwae kosi--ikidau isua akigirakin Kristo lotai kus--ikotere daadaŋ eyenuniata ka tosyoma.

³Iyookino kire atemar iraakasi iyes abaruwa ŋina a Kristo, ŋina erae isua ikigirit. Nyigiritae iŋes ka akalam, nai igiritae a Etau a ŋolo ka Akuj a ŋina eyari ka nyigiritae namoru, nai lotai a ŋituŋa.

⁴Ikirworo isua nu, anerae ikiwuakinit isua akikinyomit kosi neni ka Akuj, alotooma Kristo.

⁵Emam ibore ŋini ikiyakar isua, ŋini ikitilimuni atemar ikiyakar isua apedor ŋinakitiyaet etic lo. Apedor ŋina ikiyakar isua ebunit aneni ka Akuj.

⁶Erae iŋes abu ikiinak isua apedor ŋina kitiyanakinet neni ka Acamunet a ŋina kitete, meere ŋina a Ŋikisila a ŋulu igirir, nai ŋina ke Etau, anerae Ŋikisila ŋulu igiritae ikiarete, nai ikiinanakini Etau akiyar.

⁷Edeŋokinitoe Ŋikisila namoru, ido abu akica ŋina ka Akuj totakanu apaki ŋina epotunere ikes ka akwaŋ nooi akica aloreet a Moses, kilore Ŋisirael nyepedosi akitere iŋes. Ikwapei keponiata Ŋikisila ŋulu eyaunete atwanare torukut ka akica ŋina etya ŋin,

⁸etya nai ai akica ŋina erukunete ka ŋiticisyo ŋulu ke Etau a ŋolo ka Akuj?

⁹Ani ketya nen apolou ŋina a ŋiticisyo a ŋulu ka atubokino, etya nai ai ŋina a ŋiticisyo a ŋulu ka aiuno!

¹⁰Iŋes atemar, elunyokin tokona akica ŋina epol nooi neni ayai akica ŋinaŋorot, ŋina apuripuryaar akwaŋis keŋ.

¹¹Ikwaŋina kepoloo akica ŋina kebu topuripuryaar, etya nai ai akica ŋina nyedaun?

¹²Aŋuna ikiyakar isua akigeno na ŋina apolon, ikirworo emam akuryanu.

¹³Nyikikwaan isua ka Moses, ŋolo abu torap ereet keŋ ka akitambara, ikotere nyeanyuwaryata ŋituŋa a Isirael akica epuripuryaar, toŋopiya.

¹⁴Apotu ŋatameta kec kiryokiata! Tari tokona daŋ, ŋina esyometa ikes ŋakiro ŋuna ka Acamunet a ŋina Ŋorot, eriŋa ŋatameta kec erapap ka akitambara a ŋinapei a ŋin. Elemanaryo akitambara ŋin apaki bon ŋina imorikinotor ituŋanan ka Kristo.

¹⁵Kire, tari tokona, apaki daadaŋ ŋina esyomyata ikes Ŋikisila a Moses, erapenene akitambara ŋatameta kec.

¹⁶Nai, ani ibelekin ituŋanan neni ke Ekapolon, elemaryo akitambara ŋin anatameta keŋ.

¹⁷Erae nai Ekapolon Etau ŋolo ka Akuj ka neni eyai Etau ŋolo ke Ekapolon, eyai alacakina.

¹⁸Ikitoodiunit iwon daadaŋ akica ŋina ke Ekapolon a ŋireetin yok a ŋulu nyerapap ka akitambara. Ikiloconokinio iwon iwadio akitodol ŋina ikikwaanikinor ka iŋes ka erae lo etic ŋolo ke Ekapolon a ŋolo erae Etau ŋolo ka Akuj.