Read ngakarimojong 2 Ŋikor. 5 Bible Online

2 Ŋikor. 5 - ngakarimojong bible

2 Ŋikor. 5

¹Ikiyeni iwon atemar, ani ŋina inyasunor eema lo--akuwan yok ŋina esaluni--eyakaunor Akuj akai aŋuna yok nakuj, akai ŋina adau iŋes alope akitemokin, ŋina a ŋikaru ka ŋikaru.

²Aŋun tokona, ikirurumae iwon ka ikiitanit atemar kerae onapa ere yok ŋolo anakuj--akuwan yok ŋina nyesaluni;

³ani kenapi iwon akuwan ŋina nyesaluni ŋin, nyikiyakaun iwon ikileri.

⁴Anerae, ani eriŋa iwon ikiya loeema lo, ŋolo ka akwap a na, ikirurumae ka ikiridakinitae; meere aŋuna ikicamitor alemar ekuwane lo ŋolo ka akwap, nai ikicamit iwon onapa ŋawat ŋuna nyesalunete, ikotere kiliko akiyar ŋina nyesaluni akuwan ŋina esaluni.

⁵Akuj iŋes ikitemok iwon aŋuna ka akilocokin a na ka ikiinak iŋes iwon Etau keŋ erae ibore ŋini ikiteyenuni iwon atemar eryamunio iwon ibore ŋini adau iŋes akiikin.

⁶Aŋun, ikiyakar isua atitinyu jwi jwi. Ikiyeni atemar ani ca eriŋa isua ikiyari alokuwane a lo, ikilwaka aneni eyai Ekapolon.

⁷Anerae ikiyari iwon ananupit, meere aŋuna ikiŋolyanakini.

⁸Ikiyakar isua atitinyu, ido ikiburit isua nooi akimyekin ekuwane lo, ido oruko ke Ekapolon anakuj.

⁹Aŋun, tari erae kikiya isua lokuwane lo, kori kikiruk ka iŋes anakuj, ŋuna ikilosikinit isua erae akitalakar iŋes.

¹⁰Anerae, itemokino iwon daadaŋ owua alokiŋaren Kristo ekatubonokinan yok. Eryamuni nai ŋinituŋanan eropit ŋolo emaikina iŋes toryamu lopite ŋolo itiyator iŋes ejok kori erono alokuwane a lo.

¹¹Ikiyeni isua ibore ŋini erae akerit Ekapolon, aŋun nai ikikatakinit isua akitacamun ŋuluce. Ikiyeni Akuj isua nooi ka egeno ayoŋ atemar ikiyenete iyes daŋ ayoŋ alotai kus.

¹²Nyikikatakinit isua akitojoka aneni kus; nai ikikatakinit isua ainakin iyes Ŋakiro ŋuna Ajokak, ŋuna emaikina iyes kiturokinotor aŋuna kosi, ikotere topedoryata aboŋonokin ŋulu iturosi aŋuna ke etakane a ituŋanan, nai meere aŋuna a ŋipitesyo keŋ.

¹³Ani kesibit ikikerepikinit isua, erae aŋuna ka Akuj ka ani kesibit ikiosok isua, erae aŋuna kus.

¹⁴Amina ŋina a Kristo iŋes ikipukat isua, anerae ikiyeni isua atemar abu ituŋanan ipei totwan aŋuna a daadaŋ, iŋes atemar emorete daadaŋ atwanare keŋ.

¹⁵Abu iŋes totwan aŋuna a daadaŋ, ikotere ŋulu eyarete tojoŋoto akiyar aŋuna kec make, nai toyara aŋuna a ŋolo atwani ka kiteyarunae aŋuna kec.

¹⁶Ameun tokona, nyeriŋa isua ikitubokini idiotuŋanan alopite a ŋolo a ŋituŋa a ŋulu ka akwap. Tari erae kikiyenunit isua Kristo kocooloŋ alopite a ŋolo ka akwap a na, nyeriŋa tokona ikiyeni iŋes alopite a ŋol.

¹⁷Aŋun, ani keyai ŋini eyai tooma Kristo, aruwor iŋes isubuna ŋini kitete; asalut ŋuna ŋorok, apotu ŋuna kitet.

¹⁸Akuj iŋes etiya nu daadaŋ, Akuj ŋina ikimorik iwon ka iŋes alotooma Kristo ka abu iŋes ikiinak iwon etic ŋolo ka akimoryanakin.

¹⁹Akuj iŋes abu kimorikinos ka akwap alotooma Kristo, nyimari iŋes ŋasecisya a ŋituŋa aŋuna ka akisicania ikes. Ikicikak iŋes isua etic ŋolo ka akimoryanakin.

²⁰Ikirae isua ŋikawuoikinitok ŋulu a Kristo ka erae neni kosi ikinyaritor iyes Akuj anakiro kosi: alokiro a Kristo, ikimaimai isua iyes tocamut akimorikin ka Akuj.

²¹Amam asecit aneni a Kristo, nai abu Akuj kituruwo iŋes asecit aŋuna yok, ikotere nai iwon alotooma keŋ oruworos ŋulu ikiyookino aneni ka Akuj.