Read ngakarimojong 2 Ŋikor. 6 Bible Online

2 Ŋikor. 6 - ngakarimojong bible

2 Ŋikor. 6

¹Ikwaŋina itiyaere iwon kaapei ka Akuj, ikilipit isua iyes nyicanican ajokis ŋina idaut iyes aryamun aneni ka Akuj.

²Anerae ebala Akuj: “Ani ŋina adolyo apaki ŋina kitoodiunet ajokis kaŋ, abu ekeira iyes; ani ŋina adolyo akoloŋit ŋina akaiunia iyes, abu ayoŋ ekeŋarak iyes.” Kiirasi! Erae tokona na apaki ŋina ryamunet ajokis ŋina ka Akuj, erae tokona na Akoloŋit ŋina ka aiuno!

³Nyecamitae isua aruwor akigukinet aneni a idiotuŋanan, ikotere tomam ŋuna itoroniaritere etic kosi.

⁴Akilo, aloticisyo a daadaŋ a ŋulu ikitiyae isua, ikitoodiunit isua atemar ikirae ŋiketiyak ŋulu ka Akuj, aŋuna ikidaŋidaŋia ka atitinyu: alotooma ŋican, ŋatyokisyo ka ŋiburasinei.

⁵Aponi ikibuŋae isua, ikiwuakin mabus ka itosutonokin; aponi ikisitiyae isua nooi, nyejotooro kori nyimuja.

⁶Aŋuna ka asegis alotai kosi, anayenut, anatitinyikinit ka anarimao, ikitoodiun isua ikirae ŋiketiyak ŋulu ka Akuj alotooma Etau ŋolo Asegan, ka anamina kosi a ŋina a kire

⁷ka ŋakiro ŋuna a kire anapedor a ŋina ka Akuj. Ikiyakar isua akiyookino erae ibore ŋinijiet, ŋinikitijikinet ka ŋini kipakaret.

⁸Ikitopolooritae ka ikijamuwaritae isua; ikiyanyo ka ikipuroe. Ikitusubunitae isua ŋikalyokonok, erworos bo isua ŋuna a kire;

⁹ikitusubunitae ŋulu nyikiyenio, itoyenete bo daadaŋ, ikitusubunitae ŋulu ikitwakit, nai kire ikiyari isua ikwapei iteoto iyes. Tari kikisicanitae daŋ, nyikiaritae isua;

¹⁰tari kikisiyaloloŋitoe daŋ, ikilelyani isua jwi jwi; kikisibit ŋikulyak daŋ, nai ikitabarenene isua ŋituŋa ŋulu alalak, kesibit emam ibore ikiyakar daŋ, ikiyakar kire ŋiboro daadaŋ.

¹¹Ikirworo isua neni kus Ŋikorinto analacakina; ikisunyakinit isua iyes ŋakiro daadaŋ ŋuna alotai kosi.

¹²Meere isua ikigol ŋitai kosi aneni kus, nai iyes igol ŋitai kus aneni kosi.

¹³Erworo tokona ayoŋ neni kus esibit irae iyes ŋidwe kaŋ: kisunyakinae iyes isua daŋ ŋakiro ŋuna alotai kus!

¹⁴Tocoito ilomarete nayokot apei ka ŋituŋa ŋulu nyenupito Kristo. Ikokinete mono ŋuna iyookino ka ŋuna nyiyookino erukete ai? Ikokinete akica ka akiryonut imorikinosi ai?

¹⁵Ikokinete Kristo ka Satan ecamunosi ai? Nyo epedori akimorikin ekanupan ka ŋini nyerae ekanupan?

¹⁶Ikokinete ŋakujo ŋace elomarete Kai ka Akuj ai? Anerae ikirae iwon Akai ka Akuj a ŋina eyari! Ikwaŋina elimunitor Akuj ebe, “Abuni akiboi alotuŋa kaŋ, ido oruko ka ikes; oruwor ayoŋ Akuj kec ka eruworosi ikes ŋituŋa kaŋ.”

¹⁷Nabo, ebala Ekapolon, “Itemokino iyes toesikis ikes, totyakaros aneni kec. Nyitap idiobore ŋini nyeseg, ido ekejau ayoŋ iyes.

¹⁸Abuni ayoŋ oruwor Papa kus ka iruworosi iyes daŋ ŋidwe kaŋ ŋulusapa ka ŋulupesur, adau Ekapolon ŋolo etiron alimun.”