Read ngakarimojong Ŋigal. 4 Bible Online

Ŋigal. 4 - ngakarimojong bible

Ŋigal. 4

¹Nai tokona, ani eriŋa ŋolo rwanu irumi ebari a papa keŋ edit, iteo iŋes ikwa epito tari kerae iŋes elope a ŋiboro a ŋul a daadaŋ.

²Ani eriŋa iŋes edit, eyakasi ŋikilyok ŋulu iyokiyete iŋes, topolokinito ŋakiro keŋ daadaŋ akitodol apaki ŋina itemokinit papa keŋ.

³Ikwaŋinapei, ikipotu iwon daŋ eriŋa nyeyenuna ŋuna a kire, oruworos ŋipi ŋulu a ŋipyan a ŋulu ipukato akwap.

⁴Nai, ani edoli apaki ŋina etemokino, abu Akuj kiyaku Lokoku keŋ ka alope. Abu iŋes bu erae lokoku ka aberu ikwa ŋulucetuŋa ka abu topolou ipukato Ŋikisila a Ŋiyudayan,

⁵aŋuna ka alakun ŋulu ipukato Ŋikisila, ikotere iwon ikiruwor ŋidwe ŋulu ka Akuj.

⁶Aŋuna ka akitoodiun atemar iraakasi iyes ŋidwe keŋ, abu Akuj kiyaku Etau ŋolo a Lokoku keŋ tooma yok, Etau ŋolo iworoe ebala, “Papa! Apa kaŋ!”

⁷Aŋun, nyeriŋa iyoŋ irae epito, nai irae lokoku. Ikwaŋina iraakar iyoŋ lokoku keŋ, ikiinakini Akuj iyoŋ ŋinibore daadaŋ idaritor iŋes ŋidwe keŋ.

⁸Koloŋ sek, pa iyenete iyes Akuj, ido ipotu toruworos ŋipi ŋulu a ŋakujo a ŋuna nyerae Akuj ŋina a kire.

⁹Nai ikwaŋina tokona iyenuniata iyes Akuj, kori ikiyenunia Akuj iyes, ikokinete iyes icamito aboŋor neni a ŋipyan a ŋulu ipukato topalag ka topapanito ai? Kaanukiro icamitotor iyes aruwor ŋipi kec nabo?

¹⁰Iricito iyes ŋirwa ŋice, ŋilapyo ŋice, ŋatyakiata ŋuna ke ekaru ŋace ka ŋikaru ŋice.

¹¹Akabulit ayoŋ aŋuna kus! Apolou keŋ mono atemar etic daadaŋ ŋolo etiya ayoŋ aŋuna kus aruwor ekoŋinait a?

¹²Akadyekit ayoŋ iyes ŋikaitotoi kaŋ, kikokis ayoŋ, anerae ekoni ayoŋ daŋ iyes. Nyitiyakina iyes ŋadi ŋuna aronok neni kaŋ.

¹³Iyenete iyes atemar apaki ŋina ke ekiŋaren, abu ayoŋ ogeiya alimonokin iyes Ŋakiro ŋuna Ajokak apaki ŋina adyakar ayoŋ.

¹⁴Nai tari ŋina abunio apalagu ŋina ka adyak kaŋ yau ŋatyokisyo neni kus, ipotu iyes nyikijamuwasi kori nyikiŋero ayoŋ. Akilo, ipotu iyes ikijaut ayoŋ esibit emalaika ŋolo ka Akuj; ipotu iyes ikijaut ayoŋ esibit ijaunito Yesu Kristo.

¹⁵Ilakara iyes apaki ŋin nooi! Nyo bo tokona atakanu? Alimuni ayoŋ kire atemar kerae topedorito, kigorunito iyes tari ŋakonyen kus a ŋilopeyek apaki ŋin, ikiinakis ayoŋ.

¹⁶Aruwor mono tokona ayoŋ emoit kus aŋuna ka alimokin iyes ŋuna a kire a?

¹⁷Ecamito nooi ŋituŋa ŋuluce ŋul akiriwor iyes, nai nyejokak ŋuna iwarito ikes. Ŋuna make iwarito ikes, erae ŋuna ka atyakar iyes aneni kaŋ, ikotere icamunete iyes arukit ka ikes.

¹⁸Ejok acamit ibore idio--erae ca kejok ibore ŋin--iyookin ŋun jwi jwi, meere apaki ŋina ikirukitor iwon bon.

¹⁹Ŋidwe kaŋ ŋuluminan, aryeba ayoŋ nabo aŋuna kus ikwa eryebar aberu idouni; aryeba ayoŋ akitodol ŋina iruworotor iyes ŋulu ipakito anakiro a Kristo.

²⁰Kerae ca tokona orukito iwon, kaanyu ayoŋ epite ece ŋolo ekesirworya iyes! Nyayeni ayoŋ ŋuna kitiya aŋuna kus!

²¹Ekeŋisi iyes ŋulu icamito akiwuapit Ŋikisila: nyipupete iyes ŋuna irworosi Ŋikisila a?

²²Ebasi ikes ebe ayakar Aburaam ŋidwe ŋulusapa ŋiarei, epei arae lokoku ka aberu a ŋina arae apito, epei arae lokoku ka aberu a ŋina pa arae apito.

²³Aponi touruunae lokoku a ŋina arae apito alopite a ŋituŋa daadaŋ, nai lokoku a ŋina pa arae apito, aponi touruunae aŋuna ka akiikinet a ŋina ka Akuj.

²⁴Eyenun ŋakiro ŋun erae akitaanyikinet. Ikote ŋaberu ŋunaarei ŋun Ŋacamuneta ŋunaarei. Ŋina edounitoe ŋidwe keŋ anapitoonut erae Agar ka ikoni iŋes Acamunet ŋina etiyao alomoru a ŋolo enyaritae Sinai.

²⁵Agar na ŋina isikwaanitae ka emoru Sinai ŋolo eyai nakwap ŋina ka Arabia, ikoni Yerusalem ŋolo a tokona, ŋolo erae epito kaapei ka ŋituŋa keŋ daadaŋ.

²⁶Nai Yerusalem ŋolo anakuj, nyerae epito ka erae toto yok.

²⁷Anerae ebasi Ŋakigireta ebe, “Tolakari iyoŋ aberu ŋina ikolupana! Tocelu ka kiworok ka alelyan, iyoŋ ŋina nyeanyuna aryeba ŋina ka akidoun! Anerae eryamuni aberu ŋina abu lokile keŋ toesik ŋidwe ŋulu alalak, akilo aberu ŋina eyakar ekile!”

²⁸Ŋikaitotoi kaŋ, iraakasi iyes ŋidwe ŋulu ka Akuj aŋuna ka akiikinet keŋ, lopite ŋolo aryamunia Aburaam lokoku keŋ Isaka.

²⁹Nai alorwa a ŋul, esicaneene esapat ŋolo edounio alopite a ŋolo a ŋituŋa a daadaŋ esapat ŋoloce ŋolo edounitoe aŋuna ke Etau a ŋolo ka Akuj ka ikote tokona daŋ nenipei.

³⁰Nai ebasi Ŋakigireta ai? Ebasi ebe, “Kirita apito ka lokoku keŋ; anerae nyepedori jik lokoku ka apito akirum ŋiboro a papa kec, ikwa lokoku ka aberu a ŋina nyerae apito.”

³¹Aŋun nai ŋikaitotoi, nyikirae iwon ŋidwe ŋulu ka apito, nai ikirae ŋidwe ŋulu ka aberu a ŋina nyerae apito.