Read ngakarimojong Ŋigal. 5 Bible Online

Ŋigal. 5 - ngakarimojong bible

Ŋigal. 5

¹Ikilacak Kristo iwon, aŋun, nyitemokino nabo iwon eboiyoto ikwa ŋipi. Torubakisi nai icasito iraakasi ŋituŋa ŋulu elacakina ka nyicamut aruwor ŋipi nabo.

²Topupokisi, ayoŋ Paulo akalimokinit iyes ebe ani kicamut iyes akileŋeryo, iŋes atemar ecaryono kire Kristo aneni kus.

³Aboŋokini nabo alimun atemar ituŋanan daadaŋ ŋini acamu akileŋeryo, itemokino kiwuap daŋ Ŋikisila daadaŋ.

⁴Iyes ŋulu ikatakinito aruwor ŋulu iyookino alokiŋaren Akuj aŋuna ka akiwuapit Ŋikisila, idaut iyes atyakar aneni a Kristo. Ipena iyes neni nyikiinakinia Akuj iyes ajokis keŋ.

⁵Aneni kosi, ikigeno atemar ikituruwor ŋulu ikiyookino alokiŋaren Akuj aŋuna ka anupit Kristo ka erae ŋun ikidarit isua anapedor a ŋina ke Etau a ŋolo ka Akuj.

⁶Anerae ani ikimorikina iwon ka Yesu Kristo, emam ajokis ikiryamuni iwon anakileŋeryo kori anamamukau akileŋeryo, mati ananupit bon a ŋina itoodiuna alotooma amina.

⁷Ilosete paaran iyes ananupit kus ejok! Ŋae ikiretak iyes anakiwuapit ŋakiro ŋuna a kire?

⁸Meere Akuj ŋina ikinyarit iyes kitiyae ŋun.

⁹Eyai alimunet ŋina ebala ebe, “Itubuunete ŋakinyalet ŋuna ekudyoko ŋakirya ŋuna alalak”.

¹⁰Alotooma Ekapolon, ekekinyomit ayoŋ iyes, nyiyakaunotor ŋatameta ŋace. Nai ituŋanan daadaŋ ŋini ikibatarit iyes, tari kerae iŋes ŋae, etubokini Akuj iŋes a ŋun.

¹¹Nai aneni kaŋ ŋikaitotoi, ani karubak ayoŋ alimonokini atemar iitana akileŋeryo, kaanukiro bo eriŋa ŋituŋa ekesicanitotor ayoŋ? Kerae kikote nen, pa kepedorito ŋakiro ŋuna ka atwanare a Kristo alomusalaba ayaun ŋatyokisyo.

¹²Tolimokisi ŋituŋa ŋulu ikibatarito iyes, ŋulu ecamito akileŋeryo ŋul, kidoŋos daŋ make!

¹³Nai iyes ŋikaitotoi kaŋ, aponi iyes ikinyarae aruwor ŋulu ilacakina. Nyicamakis nai alacakina ŋin eruwor ŋina kimyekinet ekibure ŋolo a ŋawat kus ikipukae iyes. Akilo, kimyekisi amina ikiinak iyes akijaanakin make.

¹⁴Anerae eyakasi Ŋikisila daadaŋ tooma akiciket ŋina ebala, “Tomina ekonikidunyet ikwaŋina iminar iyoŋ akonikuwan”.

¹⁵Nai ani kitiyaete iyes ikwa ŋityaŋ ŋulu ka ariet ŋulu ekonyokonyasi ka tonyamas make, tocoito nai nyirikarosi make.

¹⁶Ŋakiro ŋuna erworo ayoŋ ikes nu: kimyekisi Etau ŋolo ka Akuj kipuka akiyar kus, nyikipuka nai iyes ekibure ŋolo ka aseconu a ituŋanan.

¹⁷Anerae ediŋasi aseconu a ituŋanan ka Etau ŋolo ka Akuj; erae ŋinice emoit a ŋinice. Aŋun nai, nyipedorete iyes akitiya ŋuna icamito akitiya.

¹⁸Nai ani kikitenit iyes Etau ŋolo ka Akuj, iŋes atemar nyikipukato iyes Ŋikisila.

¹⁹Ileere aseconu ŋina itiya alotooma ituŋanan anakiro a nu: amalao, asiilyanut, adoteu,

²⁰akilip neni a ŋakujo, akikukuja, aremo, ebura, arorokanut, aŋoit, amarya, atyakatyaka aŋuna ka agelegelya a ŋatameta, atyakatyaka aŋuna a ŋatukon,

²¹akimanit, emeret, amatanu ŋagwe ka ŋace daŋ ŋuna ikote nenipei nen. Akalimokini tokona ayoŋ iyes ikwapei sek akalimokinitor: ikes ŋulu eyakatar ŋun, nyeyakaun Napukan ka Akuj.

²²Nai eyauni Etau ŋolo ka Akuj na erae arait alotooma ituŋanan: amina, alelyan, ekisil, akidaŋidaŋ, arimao, ajokis, akikinyoma,

²³akitiditeuna ka akiyokiuno bon. Emam Ŋikisila eremokino ka ŋakiro ŋuna ikote ŋun.

²⁴Adaut ikes ŋulu erae ŋulu a Kristo akitotwakiar aseconu ŋina alotooma kec ka ekibure keŋ alomusalaba a Kristo.

²⁵Adau Etau ŋolo ka Akuj ainakin iwon akiyar; itemokino Etau ŋolopei ŋol kiyok akiyar yok.

²⁶Nyitemokino eturokinos kori obenyununos make kori erakanaros make aŋuna a ŋuluce.