Read ngakarimojong Ŋigal. 6 Bible Online

Ŋigal. 6 - ngakarimojong bible

Ŋigal. 6

¹Ŋikaitotoi kaŋ, ani keriko asecit idiotuŋanan, itemokino iyes ŋulu ikipukat Etau ŋolo ka Akuj kiŋarakis iŋes, ikotere inyakun iŋes; nai itemokino iyes kitiyata ŋun alotooma akitiditeuna. Kiuryar ŋinituŋanan kus bon, ikotere nyitemi iŋes daŋ.

²Kiŋaranakinos make anatyokisyo kus, ido alopite a ŋol, iwuapete iyes ekisil ŋolo a Kristo.

³Ani ketami ituŋanan atemar arae iŋes ŋae torae bo kire ikoŋinait, emodyanakin iŋes bon.

⁴Itemokino ŋinituŋanan toyenu ŋipitesyo keŋ. Ani kejokak, epedori nai iŋes akiturokin aŋuna adau iŋes elope akitiya, pa isikwaanit ka ŋuna adau ŋinice akitiya.

⁵Anerae itemokino ŋinituŋanan kitir ŋipitesyo keŋ a ilope.

⁶Itemokino ituŋanan ŋini itatamyo ŋakiro ŋuna a Ŋikristo tomora ka eketataman keŋ ŋiboro ŋulu ajokak daadaŋ ŋulu eyakar iŋes anakiyar keŋ.

⁷Tocoito nyimodikinosi! Emam ituŋanan epedori akitabaŋaan Akuj. Elemi ituŋanan ibore ŋinipei aris iŋes keeki.

⁸Anerae ani keeki ituŋanan nakiitanit ŋina ka aseconu keŋ, nenipei nen ecunakinia iŋes akilem keŋ, ŋina erae atwanare; nai ani keeki iŋes neni ke Etau a ŋolo ka Akuj, nenipei nen ecunakinia iŋes akilem keŋ, ŋina erae akiyar ŋina nyedaun.

⁹Nyitemokino iwon ikiup akitiya ŋuna ajokak, anerae ani pa kikiesik iwon akitiya ŋuna ajokak, edoluni apaki ŋina ikiryamunia iwon akilem ŋina ajokan.

¹⁰Aŋun nai, ani eriŋa iwon ikiyakar apaki ŋina ajokan, itemokino etiyata ŋuna ajokak neni a ŋituŋa a daadaŋ, akilo nooi neni a ŋulu erae ŋikanupak ikwa iwon.

¹¹Ayoŋ elope egiri nu neni kus ka akan kaŋ; ipedorete iyes ayenun nu alopite a ŋolo epolooto ŋinyukutae.

¹²Ŋituŋa ŋulu ikatakinito akitiŋakin iyes akileŋeryo, ikes ecamito akitoodiuna erae ŋulu ajokak alokiŋaren ŋituŋa. Itiyaete ikes ŋun, ikotere nyisicani ikes aŋuna a ŋakiro a ŋuna ke emusalaba a Kristo.

¹³Nai tari ŋulu iwuapito ŋakiro ŋuna ka akileŋeryo, nyiwuapito ikes ŋilopeyek Ŋikisila; ecamito ikes atemar ikileŋeri iyes, ikotere ikes iturokinosi temasi ipotu iyes kiwuapa etal ŋolo ka akileŋeryo.

¹⁴Nai aneni kaŋ, nyacamit jik akiturokin aŋuna a ŋacekiro, mati ŋuna ke emusalaba bon a ŋolo ke Ekapolon yok Yesu Kristo; anerae aŋuna ka atwanare keŋ alomusalaba, etwanit akwap alokiŋaren kaŋ ka atwanit ayoŋ alokiŋaren akwap.

¹⁵Anerae nyerae akileŋerit kori amamukau akileŋeryo epol alotooma ituŋanan; ibore ŋini epol iŋes aruwor ituŋanan ŋini kitete.

¹⁶Toyai ekisil, ka akisyon neni a ŋulu iwuapito ŋakitatameta ŋun anakiyar kec--ka neni a ŋituŋa a daadaŋ a ŋulu iwuapito Akuj, ŋulu erae Ŋisirael ŋulu a kire.

¹⁷Erikakini: nyitemokino nabo idiotuŋanan ekesican ayoŋ, anerae itoodiunito ŋapores ŋuna anakuwan kaŋ atemar arae ayoŋ epito ŋolo a Kristo.

¹⁸Toyai neni kus ŋikaitotoi daadaŋ ajokis ŋina ke Ekapolon yok Yesu Kristo! Amen.