Read ngakarimojong Ŋiep. 1 Bible Online

Ŋiep. 1 - ngakarimojong bible

Ŋiep. 1

¹Ayoŋ Paulo, ŋolo arae ekiyakia ŋolo a Yesu Kristo aŋuna ka acamit a ŋina ka Akuj, egirit abaruwa na neni a ŋituŋa a ŋulu ka Akuj a ŋulu eyakasi Epeso, ŋulu ikinyoma alotooma akimorikina ka Yesu Kristo:

²Toyai neni kus ajokis ka ekisil aneni ka Akuj Papa yok ka aneni ke Ekapolon Yesu Kristo.

³Olakaros neni ka Akuj a ŋina erae daŋ Papa ke Ekapolon yok Yesu Kristo! Anerae anakimorikina yok ka Kristo, ikiterereŋ iŋes iwon anainakin ŋarereŋisyo daadaŋ ŋuna ke Etau ŋuna anakuj.

⁴Tari eriŋa akwap nyesubuna, aris Akuj kikiseu iwon alotooma Kristo aruwor ŋulu keŋ, ikotere nai ikipedori iwon ayakau kiŋaren keŋ ikirae ŋulu ikisegak alotai ka ŋulu ikiyookino alokiŋaren keŋ.

⁵Aŋuna ka amina keŋ, aris Akuj ŋinapei anakisyakinet ketubu akituruwor iwon ŋidwe keŋ aŋuna a Yesu Kristo--arae ŋun alakara ka acamit keŋ.

⁶Ikotere iwon ikipuri iŋes aŋuna ka ajokis keŋ a ŋina apolon, a ŋina erae ainakinet keŋ ŋina a Lokoku keŋ a ŋolo minat!

⁷Anerae ikituruwor iwon ŋulu ikilakuna a ŋuna a ŋaokot a Kristo, a ŋuna aponi tobukoroe alomusalaba; iŋes nai atemar esyoni ŋasecisya yok. Alopite a ŋol, ikitoodik Akuj iwon epite ŋolo epoloo nooi ajokis keŋ.

⁸Anajokis a ŋin, abu Akuj ikiinak iwon aosou daadaŋ ka ayenut,

⁹ikitaanyu iŋes iwon alosikinet keŋ ŋina imunono ikwapei araakar acamit ka alakara keŋ ŋin.

¹⁰Irikakini Akuj alosikinet ŋin apaki ŋina itemokinor. Alosikinet ŋin, iŋes acunakin ŋisubuna daadaŋ iwapei, ibore daadaŋ ŋini eyai nakuj ka ŋini eyai kwap, ido toruwor Kristo Ekapolon kec.

¹¹Itiyao ŋiboro daadaŋ alopite a ŋolo itemokinitor ka etubunitor Akuj ka abu Akuj ikiseu iwon aŋuna ka acamit keŋ aruwor ŋituŋa keŋ ka alope anakimorikina ka Kristo, ikwa kebunio iŋes totubunio ŋinapei anakisyakinet.

¹²Aŋun nai itemokino isua ŋulu ikisyauni akigeno neni a Kristo, eboiyoto ikirae ŋulu ikipuro apolou ŋina ka Akuj.

¹³Ipotu iyes daŋ toruworos ŋituŋa ŋulu ka Akuj apaki ŋina iiraryata ŋakiro ŋuna a kire, Ŋakiro ŋuna Ajokak ŋuna apotu yaut aiuno neni kus. Ipotu iyes tonupa neni a Kristo ka abu Akuj ikiinak iyes Etau ŋolo Asegan ŋolo aris iŋes kikiik iyes; abu Etau ŋol kikok aneni kus emacar keŋ ŋolo itoodiunit atemar irae ŋulu keŋ.

¹⁴Etau ŋol iŋes erae akitoodikinet neni yok atemar eryamunio iwon ŋarereŋisyo ŋuna adau Akuj akiikin neni a ŋituŋa keŋ apaki ŋina elakunia Akuj ŋituŋa keŋ jik, ikotere nai kipuroe apolou keŋ.

¹⁵Aŋuna a ŋakiro a ŋun ka aŋuna adaunia ayoŋ akiirar anupit kus neni ke Ekapolon Yesu, ka amina ŋina iyakatar iyes aŋuna a ŋituŋa a ŋulu ka Akuj a daadaŋ,

¹⁶eriŋa nyejoŋo ayoŋ alakara neni ka Akuj aŋuna kus. Akatamununui ayoŋ iyes apaki daadaŋ ŋina elipya ayoŋ.

¹⁷Elipenene ayoŋ Akuj ŋina ke Ekapolon yok Yesu Kristo, Papa ŋolo eyai apolou daadaŋ, ikiinak iyes aosou ka ŋakitoodyanakineta, ikotere toyenut iyes iŋes ejok.

¹⁸Elipit ayoŋ Akuj toŋaar ŋatameta kus, ikotere toyenut akigeno ŋina adau iŋes anyarakin iyes ka epite ŋolo elalaata ŋarereŋisyo ŋuna epolok, ŋuna adau Akuj akiikin ainakin ŋituŋa keŋ;

¹⁹nabo daŋ alalau ŋina ka apedor keŋ a ŋina apolon a ŋina itiyae alotooma yok a ŋulu ikinupit. Apedor ŋin ŋina itiyae aneni yok, ikwaan ka apedor

²⁰ŋina abu iŋes kisitiya apaki ŋina eteyarunia Kristo alokatwak ka kisiboik iŋes lowae keŋ ŋolo aloteten anakuj.

²¹Ipukat Kristo aina ŋikepukak daadaŋ ŋulu alokidiama, ŋikawuoikinitok akwap, ŋapedorosyo, ŋikapolok ka daadaŋ ŋulu eyakatar apolou anakwap a na ka a ŋina ebunit.

²²Abu Akuj kiwuak ŋiboro daadaŋ kwap ŋakejen a Kristo ka inak iŋes ŋolo epolokinit ŋiboro daadaŋ.

²³Ido erae iŋes akou a Ŋikristo a ŋulu eraakasi akuwan keŋ. Erae akuwan keŋ ŋin akisiyookinet ŋina a ŋolo erae iŋes elope isiyookini ŋiboro daadaŋ anakiboisyo a daadaŋ.