Read ngakarimojong Ŋiep. 4 Bible Online

Ŋiep. 4 - ngakarimojong bible

Ŋiep. 4

¹Ekemaimai nai ayoŋ iyes--ayoŋ Paulo ŋolo arae emabus aŋuna ka akijaanakin Ekapolon Yesu: kiboiyoto lopite ŋolo itemokino iboiyoto ŋituŋa ŋulu enyarit Akuj aruwor ŋulu keŋ.

²Itemokino iyes kitiditeuna, kiyapara ka totitiny. Kitoodiutu amina kus alotooma adaŋa make.

³Kitiyata ka agogoŋu kus a daadaŋ, torubakinito anakimorikina a ŋina ikiinakinit iyes Etau ŋolo ka Akuj anakiricit ekisil ŋolo ikimorikinit iyes.

⁴Eyai akuwan apei ka Etau epei ŋolo ka Akuj ikwapei eyakar akigeno apei ŋina adau Akuj anyarakin iyes.

⁵Eyai Ekapolon epei, anupit apei ka ebatisimu epei.

⁶Eyai Akuj apei ŋina erae Papa a ŋituŋa a daadaŋ; ŋina erae Ekapolon a daadaŋ, ŋina itiyae alotooma daadaŋ ka eyai neni a daadaŋ.

⁷Aryamu ŋinituŋanan yok daadaŋ ainakinet ŋina ejok lotyae ŋolo ikiinakinia Kristo.

⁸Ikwapei irworotor Ŋakigireta ebe, “Ani elosi iŋes kidiama nooi, abu ya ŋirikon ŋulu alalak; inak ŋainakineta lotuŋa.”

⁹Nyo mono apolou a ŋakiro a ŋuna ebasi, “Ani elosi iŋes kidiama”? Apolou kec atemar abu iŋes ekiŋaren bu kwap kiporo tari nakibois ŋina a ŋikatwak.

¹⁰Iŋes ŋolo abu bu kwap, iŋes pei abu kiporo tari anadis, ikotere ilopiyari iŋes ŋinibore daadaŋ.

¹¹Iŋes ŋolo egiritae ebe, “Inak ŋainakineta lotuŋa”; abu inak ŋice aruwor ŋikiyakia, ŋice ŋikadwarak; ŋice aruwor ŋikalimonokinak, ŋice ŋikeyokok ŋulu a ŋatukon a Ŋikristo ka ŋiketatamak.

¹²Abu iŋes kitiya ŋun aŋuna ka akitemonokin ŋituŋa ŋulu ka Akuj daadaŋ aŋuna ke etic a ŋolo a Ŋikristo, ikotere itopolooto atukot a Ŋikristo, ŋina erae akuwan a Kristo

¹³akitodol ŋina ikimorikinor iwon daadaŋ kaapei ananupit ka oyenutu ejok Lokoku ka Akuj. Ikiponi nai iwon daadaŋ kaapei apol alotooma ituŋanan ipei ŋini apolon, ŋini erae Kristo, oruworos ŋulu ikipakit ikwa iŋes.

¹⁴Ejoŋoo nai iwon ayakau ikisibit ŋidwe, ŋulu ikiryaŋiryaŋete ŋakitatameta a ŋituŋa a ŋulu alyokonok, ikwa ataker ŋina iryaŋiryaŋete ŋikaguragurae ŋulu a ŋakipi; iteseceneneete ŋituŋa ŋul ŋuluce aŋuna ka amodiyo a ŋina elimonokinete ikes.

¹⁵Akilo, anakirworo ŋuna a kire ŋuna itorunito namina, itemokino iwon opoloto alopitesyo a daadaŋ ekokisi Kristo, ŋolo erae akou a Ŋikristo a ŋulu erae akuwan keŋ.

¹⁶Aŋuna epolokinitor iŋes ŋinerin ŋulu ka akuwan, eyeunito ŋinerin daadaŋ akuwan apei ka erae akuwan daadaŋ apei ka ikamuna ŋaruceta daadaŋ anakuwan. Ani nai itiyae ŋolokiner ikwapei itemokino itiyaa, epolouni akuwan daadaŋ toduko anamina.

¹⁷Akalimokini tokona ayoŋ iyes alokiro ke Ekapolon atemar: tojoŋoto akiboi alopite a ŋolo a ŋituŋa a ŋulu nyeyenete Akuj, ŋulu erae ŋatameta kec ŋakoŋinae,

¹⁸ŋulu eyakasi ŋatameta kec nakiryonut. Aŋuna eyakatar ikes amaaŋe, amudukan ikes anakiro a ŋuna ka Akuj; aŋun, atyakarosi ikes anakiyar a ŋina ikiinanakini Akuj.

¹⁹Nyeriŋa ŋileec irumeneneete ikes anakiro tari a ŋuna asiilyanak; itiyaeneneete ikes asiilyo ka aronis emam ibore ekacito.

²⁰Meere ŋakiro ŋun ipotu iyes toyenut aneni a Kristo!

²¹Ipotu iyes kire kiirasi ŋakiro keŋ ikwapei ŋikewuapak keŋ, aponi ikitatami iyes ŋakiro ŋuna a kire ŋuna ka akimorikina ka Yesu.

²²Aŋun, tolemasi ŋipitesyo ŋulu ke ekuwane kus a ŋoloŋorot a ŋolo paaran iyaryata iyes--ekuwane ŋolo ŋorot, ŋolo abu ikinyasu iyes alokibure keŋ a ŋolo ka amodiyo.

²³Itemokino ŋitai kus toruworos ŋulu kitet kaapei ka ŋatameta kus daŋ

²⁴ka itemokino iyes tonapa ekuwane ŋolokitete, ŋolo asubi Akuj ikwaan ka iŋes, ŋolo itoodiunit eyakae keŋ anakiyar a ŋina a kire, a ŋina iyookino ka ŋina ejok nooi.

²⁵Tojoŋoto amodyanakin! Itemokino ŋinituŋanan kirwor ŋuna a kire neni ke ekanupan a ŋoloce, anerae ikirae iwon daadaŋ ŋipei alotooma Kristo ikwapei ikiraakar iwon ŋinerin ŋulu ka apeikuwan.

²⁶Ani kiŋoa iyes, nyicamut aŋoit kus ikiteseci iyes ka kisila eriŋa akoloŋ nyedoiyoro;

²⁷nyiteryamut Satan apaki ŋina kitemyet iyes.

²⁸Tojoŋo ekademanaran ademanar, nai emaikina togeu akitiya etic, ikotere toryamu eropit aŋuna ke etic keŋ ka topedo tari akiŋarakin ŋulu iitanito akiŋarakino.

²⁹Nyirworosi ŋakiro ŋuna awanak, nai kirworos ŋuna eŋarakinak, ŋuna epedorete akiŋarakin ŋituŋa alotooma ŋuna iitanito ikes, ikotere yaut ŋarereŋisyo lotuŋa ŋulu ikipupete iyes.

³⁰Nyitunyunyurikis Etau ŋolo Asegan ŋolo ka Akuj, anerae erae Etau ŋolo Asegan emacar keŋ ŋolo ikituruworit iyes ŋulu keŋ, ibore ŋini itoodiunit atemar ebunit Akoloŋit ŋina ikilakunia Akuj iyes jik.

³¹Tojoŋoto arakao, anyunyura, aŋoit, ecelet ka akiyany Akuj.

³²Akilo, toruworos ŋulu irimaaka ka ŋulu iyapara alotai, kisyonios make ikwapei adaunia Akuj akisyon iyes alotooma Kristo.