Read ngakarimojong Ŋiep. 5 Bible Online

Ŋiep. 5 - ngakarimojong bible

Ŋiep. 5

¹Ikwapei iraakatar iyes ŋidwe ka Akuj ŋuluminan, itemokino iyes kituputo iŋes.

²Itemokino iyes kiboiyete alotooma amina lopite ŋolopei abunio Kristo itominakinia iwon, ido tojal akiyar keŋ aŋuna yok erae amuronot ŋina akukunyon, ŋina ecamuna ka ŋina italakarit Akuj.

³Ikwapei iraakatar iyes ŋituŋa ŋulu ka Akuj, nyitemokino ŋakiro daadaŋ ŋuna ka amalao kori ŋuna ka asiilyanut kori arorokanut elimitoe alokidiŋ kus.

⁴Nyejok daŋ iyes irworosi ŋakiro ŋuna a ŋileec, ŋuna a ŋiyany kori ŋuna ke erasi. Nai itemokino tolakanaros neni ka Akuj.

⁵Toyenete nai atemar emam ituŋanan ŋini amalaanan, asiilyanan kori ŋini arorokanan (anerae ikwaan arorokanut ka akilip akuj ace) ŋini eyakaun Napukan ŋina a Kristo ka Akuj.

⁶Nyicamut idiotuŋanan ikimodikini iyes a ŋakiro a ŋuna ka amodiyo; anerae aŋuna a ŋakiro a ŋun, ebuni anyunyura ŋina ka Akuj neni a ŋulu nyepupete ŋakiro keŋ.

⁷Aŋun, nyirukito ka ŋituŋa ŋulu ikote nen.

⁸Iyakasi paaran sek iyes nakiryonut, nai aŋuna ka akimorikina kus ka Ekapolon, iyakasi tokona iyes nakica. Aŋun, itemokino iyes kiboiyete ikwa ŋituŋa ŋulu erae ŋulu ka akica,

⁹anerae eyauni akica nu erae arait: ajokis, akiyookino ka akirworo ŋuna a kire.

¹⁰Kikatakisi ayenun ŋuna italakarito Ekapolon.

¹¹Nyilomanarete nakiro ŋuna koŋinae ŋuna ka akiryonut, nai kisileereutu ikes.

¹²(Nai erae ŋileec nooi iyes tari akirworo ŋakiro ŋuna itiyaete ŋituŋa ŋul anakimunono.)

¹³Nai ani isileereunio ŋakiro daadaŋ anakica, apaki ŋin nai itoodiunere ŋipitesyo kec ejok;

¹⁴anerae akica iŋes itoodiuni ibore daadaŋ ejok. Iŋes elimunitere ebe, “Tokienyu, iyoŋ ekajoton, ido toyaru alokatwak, ikiwuakini Kristo iyes nakica.”

¹⁵Aŋun, tocoikinito alopite a ŋolo iboiyoto iyes. Nyiboiyete ikwa ŋituŋa ŋulu abaŋaanak, nai ikwa ŋituŋa ŋulu aosok.

¹⁶Kisitiyata ejok apaki daadaŋ ŋina iyakatar iyes, anerae erae ŋirwa lu ŋulu aronok.

¹⁷Nyibaŋaaka, nai kikatakisi ayenun ŋuna ecamit Ekapolon.

¹⁸Nyimerakinosi a ŋagwe a ŋuna epedorete amunaar iyes, nai tocamakisi Etau ŋolo ka Akuj kilelebikin neni kus.

¹⁹Ani irworosi iyes make, kisimukekinos a Ŋieosyo a Daudi, a ŋieosyo a ŋulu ipurore Yesu ta ŋieosyo ŋulu ke Etau; toeikisi ipurosi Ekapolon alotai kus.

²⁰Alokiro ke Ekapolon yok Yesu Kristo, tolakanaros jwi jwi neni ka Akuj Papa aŋuna a ŋakiro a daadaŋ.

²¹Topuponoros make aŋuna ka akerit kus Kristo.

²²Ŋaberu, topupete ŋikilyok kus, ikwaŋina ipupyoto Ekapolon.

²³Anerae epolokinit ekile aberu keŋ, ikwaŋina epolokinitor Kristo Ŋikristo; erae Kristo elope iŋes ekaiunan ŋolo a Ŋikristo, a ŋulu erae akuwan keŋ.

²⁴Ikwaŋina epupyoto Ŋikristo Kristo, itemokino ŋaberu daŋ topupete jik ŋikilyok kec.

²⁵Ŋikilyok, tominas ŋaberu kus, ikwaŋina aminar Kristo Ŋikristo, ido tojal akiyar keŋ aŋuna kec.

²⁶Abu Kristo kitiya ŋun aŋuna ka ainakin ikes neni ka Akuj, kedau akitesegun ikes a ŋakipi a ŋuna ke ebatisimu ka alotooma akirot keŋ;

²⁷ikotere eyauni atukot a Ŋikristo neni keŋ erae ateran anakibuses keŋ a daadaŋ--tomam akemer, nyerinyit ereet, kori tomam ibore daadaŋ ŋini nyitesegi iŋes; aŋun, epedori ayakau kiŋaren keŋ erae ŋina ajokan nooi ka ŋina eseg alotau.

²⁸Ikwaŋinapei, itemokino ŋikilyok daŋ tominas ŋaberu kec ikwaŋina eminatar ikes ŋawat kec a ŋilopeyek. Ekile ŋolo emina aberu keŋ, emina iŋes akuwan keŋ ke elope.

²⁹Emam ituŋanan ŋini itidiŋit akuwan keŋ a ilope. Akilo, itani ka irici iŋes, ikwaŋina iricitor Kristo atukot a Ŋikristo,

³⁰anerae ikirae iwon ŋinerin ŋulu ka akuwan keŋ.

³¹Ikwapei igiritere Nakigireta ebe, “Aŋun, eesikini ekile papa keŋ ka toto keŋ, kimorikinos ka akeeberu, toruworos ŋuluarei ŋul apeikuwan.”

³²Eya Nakigireta ŋun ŋakiro ŋuna ajokak ŋuna imunono, ŋuna ayenu ayoŋ atemar ikamunito Kristo ka atukot a Ŋikristo.

³³Nai ikikamunito iyes daŋ ŋakigireta ŋun: itemokino ŋolokile tomina aberu keŋ, ikwaŋina eminar iŋes akuwan keŋ ke elope; itemokino ŋinaberu tokerite lokile keŋ.