Read ngakarimojong Ŋipil. 1 Bible Online

Ŋipil. 1 - ngakarimojong bible

Ŋipil. 1

¹Ayoŋ Paulo ka Timoteo ŋiketiyak ŋulu a Yesu Kristo, ikigirit abaruwa na neni a ŋituŋa a daadaŋ a ŋulu ka Akuj alo Pilipi, a ŋulu imorikina ka Yesu Kristo ka neni a ŋibicopyo a ŋatukon a Ŋikristo ta ŋikeŋarakinitok kec.

²Toyai neni kus ajokis ka ekisil aneni ka Akuj Papa yok ka aneni ke Ekapolon Yesu Kristo.

³Alakanari ayoŋ neni ka Akuj kaŋ ŋapakio daadaŋ ŋuna akatamununuya ayoŋ iyes;

⁴alelyani ayoŋ ŋapakio daadaŋ ŋina elipyanenea aŋuna kus,

⁵aŋuna ke epite a ŋolo ikimorya iyes ka ayoŋ etic ŋolo a Ŋakiro a ŋuna Ajokak, ageun akoloŋit ŋina esyaunan ŋina inupyata iyes, tari tokona.

⁶Ayeni ayoŋ kire atemar irikakini Akuj ŋina ageikini akitiya etic ŋolo ajokan lo aneni kus Akoloŋit ŋina eboŋunio Yesu Kristo.

⁷Itemokino ayoŋ okatamunite iyes daadaŋ ikona, anerae akamina ayoŋ iyes nooi, ikwapei ikimorya iwon daadaŋ ainakinet ŋina adau Akuj ainakin ayoŋ, tari anapaki a na, a ŋina ayakar ayoŋ mabus ka apaki ŋina erworor ayoŋ aŋuna a Ŋakiro a ŋuna Ajokak etogogoŋit.

⁸Eyeni Akuj atemar ŋuna erworo ayoŋ erae ŋuna a kire--akamina ayoŋ iyes lopite ŋolo ikiminar iyes Yesu Kristo.

⁹Elipi ayoŋ Akuj kiturubak amina kus iyata jik, kaapei ka ayenut ka aosou ŋina ipedoryata atyakatyak ŋuna ajokak ka ŋuna aronok, ido

¹⁰topedosi nai acamun ibore ŋini ajokan nooi; ikotere toruworos ŋulu isegak alotai, tomam aronis adio daŋ, Akoloŋit ŋina eboŋunio Kristo.

¹¹Ilelebun nai akiyar kus arait ŋina ebunit anakiyookino kus alokiŋaren Akuj, ŋina erae Yesu Kristo bon eyauni, aŋuna ka akitopoloor ka akipur Akuj.

¹²Ŋikaitotoi, acamit ayoŋ iyes toyenut ebe, ŋakiro ŋuna etiyakin neni kaŋ, eŋarakis akielar Ŋakiro ŋuna Ajokak.

¹³Eyenete ŋasigarya ŋuna ka akai a ŋina ke ekawuoikiniton ekepukan a Roma anakwap a na ka ŋuluce daŋ ŋulu eyakasi ne atemar, ayai ayoŋ mabus, anerae arae ayoŋ eketiyan ŋolo a Kristo.

¹⁴Nabo eyatak ayakau kaŋ mabus lokaitotoi ŋulu alalak alotooma Kristo akikinyom Ekapolon, ido elimonokinete Ŋakiro ŋuna Ajokak etitiny ka emam akuryanu.

¹⁵Kire, elimonokinete ŋice ŋakiro a Kristo anarakao ka anakiloiloa, nai elimonokinete ŋice alotai a ŋulu ajokak.

¹⁶Itiyaete ŋul ŋun anamina, anerae eyenete ikes atemar ayai ayoŋ mabus aŋuna a Ŋakiro a ŋuna Ajokak.

¹⁷Elimonokinete ŋuluce ŋakiro a Kristo anakiloiloa, meere alotai a ŋulu ajokak; etamete ikes atemar kori iyatakinete ŋatyokisyo neni kaŋ eriŋa ayoŋ ayai mabus.

¹⁸Nyemisitae ŋuna! Nai ŋuna apolok alorotin a daadaŋ ikes alimonokin ŋakiro ŋuna a Kristo kiwarito ikes ŋuna kec a ŋilopeyek kori ŋuna a kire. Arubakini ayoŋ alakara a ŋun; ŋakiro ŋun ikes eruworosi alakuno kaŋ,

¹⁹anerae ayeni ayoŋ ebe aŋuna a ŋakilipasinei kus ka anakiŋarakino a ŋina ebunit aneni ke Etau a Yesu Kristo,

²⁰eitanit ayoŋ nooi ka egeno atemar nyekerumete jik ayoŋ ŋileec, nai ayakaunor atitinyu ŋina itemokino, anapakio a daadaŋ, nooi tokona, ikwapei sek itopolooritere Kristo aŋuna kaŋ, eriŋa ayari kori katwana.

²¹Anerae aneni kaŋ, Kristo iŋes erae akiyar, ido atwanare eyauni epoida.

²²Nai ani karubak ayari, iŋes atemar apedori akitiya etic ŋolo ajokan; aŋun, nyayeni ayoŋ ibore ŋini aseuni, akiyar kori atwanare!

²³Nyayeni ayoŋ ewae ŋolo aseuni. Ekeburit ayoŋ aesikin akiyar na, ido oruko ka Kristo, anerae ejok nooi arukit ka Kristo;

²⁴nai aŋuna kus, itemokino ayoŋ orubak ayari.

²⁵Aŋuna anupitor ayoŋ ŋun, ayeni atemar arubakini ayari ekeŋarak iyes daadaŋ, ikotere kiyatakinor anupit kus ka alelyan ŋina ebunit ananupit.

²⁶Alopite a ŋol, iyakaunotor ŋakiro ŋace ŋuna iturokinotor alokiŋaren Yesu Kristo aŋuna kaŋ apaki ŋina ikirukio iwon nabo.

²⁷Tokona ibore ŋini epol iŋes en: itemokino akiyar kus torae ŋina itopoloorit Ŋakiro ŋuna Ajokak ŋuna a Kristo, ikotere ani kabu kori pa kabu ayoŋ aanyun iyes, eira atemar icasito iyes jik alotooma etau epei ka iyakatar akiitanit apei ŋapakio daadaŋ ŋuna imunikinitotor iyes aŋuna ka anupit Ŋakiro ŋuna Ajokak.

²⁸Nyikera ŋiketepegak kus! Toyakatar jik atitinyu, ido itoodiunete ŋun neni kec atemar inyasuni Akuj ikes, nai iiunosi iyes.

²⁹Anerae nyeinakina Akuj iyes apaki ŋina nupet Kristo bon, nai ikiinak tari apaki ŋina ka akisicanio aŋuna keŋ.

³⁰Ido tokona ikimunikinit iwon kaapei aŋuna a Ŋakiro a ŋuna Ajokak, lopite ŋolopei iponiata iyes ikiŋolikiniata ayoŋ amunikinit ka ŋolopei amunikinitor ayoŋ tokona, ikwapei ipupyoto.