Read ngakarimojong 1 Ŋites. 1 Bible Online

1 Ŋites. 1 - ngakarimojong bible

1 Ŋites. 1

¹Ayoŋ Paulo ka Silipano ta Timoteo ikigirit abaruwa na neni ka atukot a Ŋikristo a ŋulu eyakasi Tesalonika, a ŋulu erae ŋulu ka Akuj Papa ka ŋulu ke Ekapolon Yesu Kristo. Toyai neni kus ajokis ka ekisil.

²Ikilakanari isua jwi jwi neni ka Akuj aŋuna kus a daadaŋ, ka ikitamununuyo isua iyes apaki daadaŋ ŋina ilipere.

³Anerae apaki daadaŋ ŋina ilipere isua Akuj Papa, ikitamunit epite ŋolo itiyaata iyes aŋuna ka anupit kus ka epite ŋolo imunikinitotor aŋuna ka amina kus, ta epite ŋolo ititinyikinitotor aŋuna ka akigeno kus neni ke Ekapolon yok Yesu Kristo.

⁴Ŋikaitotoi, iyes ŋulu ikimina Akuj, ikiyeni isua atemar adau iŋes aseun iyes aruwor ŋulu keŋ.

⁵Anerae aponi isua yaunae Ŋakiro ŋuna Ajokak neni kus, meere alorwor bon, nai anapedor a Etau a ŋolo Asegan ka ipotu iyes toanyut kire epite ŋolo ikikinyomitor isua jik ŋakiro ŋun. Iyenete iyes epite ŋolo ikiboiyo isua apaki ŋina ikirukitor iwon; arae aŋuna ka akiŋarakin iyes.

⁶Ipotu iyes ikituputo isua ka Ekapolon, anerae ipotu kijaut ŋakiro ŋuna ka Akuj ka alakara a ŋina ebunit aneni ke Etau a ŋolo Asegan, tari ŋina daŋ iponiata iyes toryamuniata ŋican ŋulu alalak.

⁷Alopite a ŋol, ipotu iyes toruworos akitaanyikinet neni a ŋikanupak a daadaŋ a ŋulu alo Makedonia ka Akaia.

⁸Anerae meere bon ŋakiro ŋuna ke Ekapolon ŋuna alimonokin iyes eelakin Makedonia ka Akaia, nai tari anupit kus Ekapolon, eelakin akwap daadaŋ. Aŋun, emam ŋace ŋuna itemokino isua olimutu.

⁹Kire, erae ŋituŋa ŋuluce ŋilopeyek irworosi epite ŋolo ikijauniata iyes isua apaki ŋina aponere isua akipeyokin iyes ka epite ŋolo iponiata iyes kibelekinos anakujo, ido kiwuapa Akuj ŋina a kire ŋina eyari;

¹⁰nabo, irworosi epite ŋolo idaritotor iyes Lokoku keŋ bu anakuj--Yesu ŋolo abu iŋes kiteyaru alokatwak ŋolo ikiuni iwon ananyunyura a ŋina ebunit aneni ka Akuj.