Read ngakarimojong 1 Ŋites. 4 Bible Online

1 Ŋites. 4 - ngakarimojong bible

1 Ŋites. 4

¹Ŋuna esidyok ŋikaitotoi, ipotu iyes toyenut aneni kosi epite ŋolo itemokino iyes iboiyoto, ido kitalakasi Akuj. Kire erae epite ŋolopei ŋol sek iboiyoto iyes. Nai tokona ikilipit ka ikimaimai isua iyes alokiro ke Ekapolon Yesu, kitiyata nooi akilo tari ŋina sek.

²Anerae iyenete iyes ŋuna aponi isua itolimokin iyes alokiro ke Ekapolon Yesu.

³Ŋuna ecamit Akuj ikes nu: toruworos ŋulu isegak ŋulu itoodiuna anakiyar kus atemar irae ŋulu keŋ. Toŋero amalao;

⁴itemokino ŋolokile toyeni epite ŋolo eryamunia aberu, epite ŋolo italakarit Akuj ka ŋituŋa.

⁵Meere alokibure a ŋolo aronon, ikwa ŋituŋa ŋulu a ŋakwapin ŋulu nyeyenete Akuj.

⁶Anakiro a ŋun nai, nyitemokino idiotuŋanan itiyae ŋuna aronok neni a lokaato keŋ alotooma Ekapolon, kori amodikin iŋes a ediopite. Adaun isua alimokin iyes ŋun ka agogoŋu eriŋa apaki, ikiteyenikin daŋ atemar ebuni Ekapolon akisican ŋulu itiyaete ŋun.

⁷Nyenyara Akuj iwon akiboi alokibure a ŋolo ka amalao, nai akiboi anakiyar a ŋina asegan, a ŋina itoodiunit atemar ikirae ŋulu keŋ.

⁸Aŋun nai, ŋini ewouni ŋakiro ŋun ŋuna ikilimonokini isua, nyerae ituŋanan eŋerit iŋes, nai Akuj, ŋina adau ainakin iyes Etau ŋolo Asegan.

⁹Nyitemokino ayoŋ ekegirak iyes ŋakiro ŋuna ikamunito amina alokidiŋ kus ŋikanupak, anerae adau Akuj akitatam iyes ŋilopeyek epite ŋolo ipedoryata aminanar make.

¹⁰Kire iminasi iyes ŋikaitotoi kus daadaŋ alotooma Ekapolon, ŋulu eyakasi nakwap daadaŋ ŋina a Makedonia. Nai ikisimukekinit iyes ŋikaitotoi, kitiyata nooi akilo tari ŋina sek.

¹¹Kiwara nooi epite ŋolo ajokan ŋolo kiboiyet; itemokino ŋinituŋanan tomitak ŋuna keŋ a ilope, kitiyau a ŋakan keŋ ibore daadaŋ ŋini iitanit iŋes aŋuna ka akiyar keŋ, ikwapei sek ikilimokinitor isua iyes.

¹²Alopite a ŋol, ikikerete iyes ŋituŋa ŋulu nyerae ŋikanupak, ido daŋ nyiitanete iyes adiokiŋarakinet aneni a ituŋanan a idio.

¹³Ŋikaitotoi, ikicamit isua iyes toyenut ŋakiro ŋuna a ŋituŋa a ŋulu atwaka, ikotere nyiyaloloŋioto iyes ikwa ŋituŋa ŋuluce ŋulu emam akigeno.

¹⁴Ikinupit iwon atemar abu Yesu totwan ka abu toyaru, ikwaŋinapei, iteyaruni Akuj ŋikatwak ŋulu sek anupito Yesu, ido ya ikes kaapei ka Kristo neni keŋ.

¹⁵Ŋuna ikilimonokinio tokona isua iyes erae ŋakiro ŋuna etatami Ekapolon: iwon ŋulu eriŋa ikiyari akitodol apaki ŋina eboŋunio Ekapolon, nyiŋarenikinio iwon ŋituŋa ŋulu adaut atwakare.

¹⁶Anerae, apaki ŋina elimunio Akuj atemar adol apaki, iirarete ŋituŋa etoil ŋolo ke emalaika a ŋolo apolon ka eruye ŋolo ka arupepe a ŋina ka Akuj. Apaki ŋin nai ebunio Ekapolon elope anakuj. Isyaunete mono ŋikatwak ŋulu sek anupito Kristo ayarun;

¹⁷ido nai orukosi iwon ŋulu eriŋa ikiyari kaapei ka ikes kidiama lodouwon akiryamun ka Ekapolon. Oruko nai ka Ekapolon jwi jwi.

¹⁸Aŋun nai, kisimukekinos make a ŋakiro a ŋun.