Read ngakarimojong Yos. 11 Bible Online

Yos. 11 - ngakarimojong bible

Yos. 11

¹Ani iirari erwosit Yabin ŋolo ka Asor ŋakiro ŋun, kiyakiya ŋituŋa neni a Yobab a erwosit a Madon ka neni a ŋolo a Simiron ta neni a ŋolo ka Akisap.

²Kiyakiya nabo ŋituŋa neni a ŋirwosi a ŋulu aya nakwap ŋina a ŋikamukumukui ŋina alowae a ŋolo alo Kuju ka neni a ŋulu aya Araba nadipo ŋina alo Kwap anam Galileya ka neni a ŋulu anadipo a ŋina a ŋikamukumukui a ŋulu a Karimel ta neni a ŋulu nadipo ka anam Mediteranian diyete Dor.

³Kiyakiya daŋ ŋituŋa neni a Ŋikanaani a ŋulu alomito Kide ka To aŋolol Yorodan ka neni a Ŋiamori, neni a Ŋiitaiti, neni a Ŋiperisi ka neni a Ŋiyebusi a ŋulu alomito nakwap ŋina a ŋikamukumukui ta Ŋiipi ŋulu alomito nakeju a emoru Erimon nakwap ŋina enyaritae Misipa.

⁴Apotu ŋirwosi ŋul potu ka ŋasigarya kec daadaŋ. Alalak ŋasigarya ŋun nooi atya alalau kec asinyon ŋina eyai lokipetot ka anam. Ayakatar daŋ ikes ŋaŋolei ka ŋagaari ŋuna iritae a ŋaŋolei.

⁵Kiryamuryamunos ŋirwosi ŋul daadaŋ neni acamunito ikes akiryamun, tocunakis ŋajorei kec toruwor apei, kiboikinos diyete ŋakipi ŋuna ka ayonae a ŋina enyaritae Merom aŋuna ka akitijiore Ŋisirael.

⁶Tolimok nai Ekapolon Yosua tema, “Nyikibul aŋuna kec, anerae moi taparacu ŋisaae lu peilu, epotokini ayoŋ ikes neni a Ŋisirael tomunyarae. Tosodi nai iyoŋ totubutubu ŋamori ŋuna a ŋakejen a ŋaŋolei, ido kicunyak ŋagaari kec.”

⁷Abu nai Yosua ka ŋasigarya keŋ daadaŋ kituumikis ŋajorei ŋun kisiiryakis anakipi a Merom.

⁸kipotok nai Ekapolon ŋirwosi ŋul ka ŋasigarya kec nakan a Ŋisirael, toarae ikes kiritarae lowae ŋolo alo Kuju, todolo neni enyaritae Sidon ka Misirepoti-Maim, todolo tari Kide nakadipaalat ŋina enyaritae Misipa. Toarae ŋimoe ŋuk nyidoŋ tari ipei.

⁹Kitiyak Yosua neni kec lopite ŋolo alimokinitor Ekapolon iŋes. Totubutubu ŋamori ŋuna a ŋakejen a ŋaŋolei kec, kicunyak ŋagaari kec.

¹⁰Abu Yosua apaki ŋinapei toboŋo kaku kikama Asor, toar a ekileŋ erwosit keŋ. Arae sek erwosit ka Asor apolokinit neni epukato ŋirwosi ŋul daadaŋ.

¹¹Toara Yosua ka ŋituŋa keŋ ŋituŋa daadaŋ ŋulu aya nen, mam ituŋanan aponi toesikinae eyari. Ani ekaku, kicunyakis etaun Asor.

¹²Abu Yosua tomunya ŋitaunio ŋul kaapei ka ŋirwosi kec, toar a ekileŋ ŋituŋa daadaŋ, lopite ŋolo kicikitor Moses ŋolo arae eketiyan a Ekapolon iŋes.

¹³Nai ŋitaunio ŋulu adukitoe loreŋoroto apotu Ŋisirael nyicunyakis, mati Asor bon ŋolo abu Yosua kicunyak.

¹⁴Apotu Ŋisirael taŋatasi ŋiboro daadaŋ ka ŋibaren alotaunio a ŋul. Nai toara ikes a ekileŋ ŋituŋa daadaŋ nyeesikis tari ipei eyari.

¹⁵Arae epite ŋolopei sek ecikitor Ekapolon Moses eketiyan keŋ, abunio Moses kicikia Yosua, tosodi Yosua kitiyak ŋun. Nyeesikina iŋes akitiya idiobore daadaŋ ŋini ecikit Ekapolon Moses.

¹⁶Kikama Yosua akwap ŋin daadaŋ, akwap ŋina a ŋikamukumukui, ŋadipoe a ŋikamukumukui, Kuju ka Kwap, kikama akwap a Gosen daadaŋ ka aloŋisat ŋina alo Kwap ka Araba.

¹⁷Toar Yosua ŋirwosi ŋul daadaŋ ka kikama ŋakwapin kec ŋinapei alomoru Alak a ŋolo idiri Seir akitodol neni enyaritae Baaligad neni a akadipaalat a Lebanon a ŋina anakeju a emoru a ŋolo enyaritae Erimon.

¹⁸Ajito Yosua ka ŋirwosi ŋul daadaŋ ŋirwa ŋulu alalak.

¹⁹Mam etaun epei daŋ ŋolo apotu ŋituŋa keŋ toruworos ŋipei ka Ŋisirael mati Gibeon bon ŋolo a Ŋiipi. Aponi ŋuluce daadaŋ kilounae alojie,

²⁰anerae arae Ekapolon iŋes abu kitogogoŋ ŋakyes kec, ikotere imukekinete akitijiore Ŋisirael, ido tomunyarae jik nyisyoni tari ipei, nai tolemarae jik anakwap lopite ŋolopei ecikitor Ekapolon Moses.

²¹Apaki ŋin, abu Yosua tolot kitiji ka toar ŋituŋa ŋulu anyaritae Ŋinakim [3] ŋulu alomito nakwapin ŋuna a ŋikamukumukui nu: Eburon, Debir ka Anab ta nakwapin ŋuna a ŋikamukumukui daadaŋ alo Yudaya ka Isirael. Tomunya jik Yosua ikes ka ŋitaunio kec.

²²Mam Ŋianakim tari ipei ŋini abu kidoŋ nakwap a Isirael, nai apotu ŋidikudyo kidoŋo Gasa ka Gat ta Acidod.

²³Abu Yosua kikama akwap daadaŋ lopite ŋolo ecikitor Ekapolon Moses. Inak Yosua akwap ŋin neni a Ŋisirael toruwor ŋina kec, totyakatyaka, inak ŋolokabila akwap keŋ. Todaun nai ejie, kieŋa akwap ŋin.