Read ngakarimojong Yos. 2 Bible Online

Yos. 2 - ngakarimojong bible

Yos. 2

¹Kiyakiya nai Yosua ŋolo arae lokoku a Nun ŋirototin ŋiarei aneni anyaritae Sitim alosit akireb anakimunono. Kicik ikes tema, “Toloto torebo akwap, torae nooi Yeriko.” Toloto ikes, tolomasi ewari kai ŋina ka amalaat a ŋina anyaritae Raab topero nen.

²Keponi tolimokinae erwosit ŋolo ke etaun a Yeriko atemar kepotu akoloŋit ŋin nakwaare Ŋisirael ŋice tolomut lotaun aŋuna ka akireb akwap.

³Abu nai erwosit ŋol kiyaki ŋituŋa neni a Raab tema, “Kimyek ŋikilyok ŋulu eya kai kon yaunae ne, anerae eponito erae ŋikarebok akwap a Kanaan daadaŋ.”

⁴Nai keris Raab kiwua ŋirototin ŋuluarei ŋul. Tosodi iŋes tolimu tema, “Kire, aponito ŋikilyok ŋul kai kaŋ, nai pa ayeni ayoŋ neni keponitotor.

⁵Apotu ikes torotokis imusumusokini akwap, esaa ŋolo aapuunia agolokin epuke ŋolo ke etaun. Nyayeni ayoŋ neni kepotu ikes toloto. Kiwuapakisi ikes atipei, ipedorete jik aditar.”

⁶Nai ewuait iŋes ikes alokidiama akai keŋ, anerae anakwap a ŋin, alapat kidiama ŋakais; ido erapirapit Raab ŋikilyok ŋul a ŋakopit a ŋuna sek kinapinapit iŋes kidiama akai.

⁷Apotu nai ŋikilyok ŋul kiwuapa ŋirototin ŋul, todolo diyete ŋidoketa ŋulu ka aŋolol Yorodan. Ani elomarete ikes alotaun, aponi ekek ŋolo ke etaun togolokinoe.

⁸Ani eriŋa ŋirototin nyikamuna ŋajo alokidiama akai,

⁹bu Raab neni aya ikes tema, “Ayeni ayoŋ atemar adau Ekapolon Akuj ainakin iyes akwap na. Elelebun akuryanu neni kosi ka ebulit ituŋanan daadaŋ ŋini ka akwap a na aŋuna kus,

¹⁰anerae ikidau isua akiirar epite ŋolo kitoonio Ekapolon Akuj anam ŋina enyaritae Anam ŋina Areŋan idolunete iyes nen apaki ŋina irotokinioto anakwap a Ijipit. Ikiirarit nabo epite ŋolo kiaryata iyes Sikon ka Og, ŋirwosi ŋiarei ŋulu a Ŋiamori a ŋulu elomito Kide aŋolol Yorodan.

¹¹Ikipotu isua ŋinapei ikiirari ŋakiro ŋun, omaranikisi, itobul nooi aŋuna kus. Kire jik, Ekapolon Akuj kus, iŋes erae Akuj alokidiama ka anakwap a ne.

¹²Aŋuna nai tokona etiyaa ayoŋ arimao neni kus, kikoŋo alokiro a Ekapolon atemar irimaakyata iyes neni a ŋiyeneta kaŋ. Nabo kitoodikinae ibore ŋini eketunupi ayoŋ ŋakiro kus.

¹³Kiikinae ayoŋ atemar iesikinete iyes papa kaŋ, toto kaŋ, atalokaato kaŋ, atanakaato kaŋ kaapei ka ŋituŋa kec daadaŋ ka ikiiunete iyes isua nyikiari!”

¹⁴Tolimokis ŋikilyok ŋul iŋes temasi, “Tolema Akuj akiyar kosi pa kikitiya ŋuna ikidau akiikin. Nai nyikilimo isua, ikirimaaniar isua neni kon apaki ŋina ikiinia Ekapolon isua akwap na.”

¹⁵Kiyooliyo nai iŋes ikes ka auno kisitor lodirisa, anerae ayai akai keŋ narwatata ŋina awuat etaun.

¹⁶Kicik iŋes ikes tema, “Toloto nakan ŋina a ŋikamukumukui, ikotere nyiryamasi ka ŋikilyok ŋulu ikiwarito iyes. Toŋopa aina ŋirwa ŋiuni akitodol ŋina eboŋunioto ŋikilyok ŋul lotaun kec, totuboros nai iyes, toloto.”

¹⁷Tolimokis ŋirototin ŋul Raab temasi, “Ikiwuapi isua ŋakiro ŋuna idau iyoŋ akisikoŋ isua,

¹⁸erae kitiya iyoŋ ŋakiro nu: Apaki ŋina ikamarere isua akwap na, itemokino iyoŋ toenik arac ŋina areŋan na lodirisa ŋolo sek ikiyooliunio iyoŋ isua, itemokino iyoŋ tocunak kai kon papa kon, toto kon, atalokaato kon ka ŋituŋa a ekal a papa kon daadaŋ.

¹⁹Ituŋanan kon daadaŋ ŋini elomari kiŋa, ido toarae, eruwor atwanare keŋ nakou keŋ, meere nakyes kosi. Nai ani keari ituŋanan idio ŋini eyai tooma akai kon, eruwor atwanare keŋ nakyes kosi.

²⁰Ani kilimo iyoŋ ŋakiro nu, nyikinyamete isua ŋuna ka akikoŋ a ŋina ikisikoŋ iyoŋ isua.”

²¹Tolimu Raab tema, “Ŋuna idaut iyes alimun, daadaŋ ŋunapei.” Kimyek nai iŋes ikes toloto. Tosodi nai toenik arac ŋina areŋan lodirisa.

²²Toloto ŋirototin lowae ŋolo eya ŋikamukumukui, kiriyata aina ŋirwa ŋiuni, akitodol ŋina aboŋoryata ŋikilyok ŋulu ewuapito ikes. Kirimo ŋikilyok ŋul iwarito ŋirototin ŋul nen daadaŋ, nyeryamut.

²³Tosodo nai ŋirototin ŋuluarei ŋul todokut alokamukumukui, totuboros ekekwaye aŋolol Yorodan neni ayai Yosua lokoku a Nun, tolimonokis iŋes ŋakiro daadaŋ ŋuna apotu kitiyakinos analosit kec.

²⁴Ekaku kirworo ikes, temasi neni a Yosua, “Adau Ekapolon Akuj ainakin Kanaan daadaŋ nakan yok. Elelebun tokona ekabule lotai a ŋituŋa ka akwap a Kanaan daadaŋ.”