Read ngakarimojong Yos. 22 Bible Online

Yos. 22 - ngakarimojong bible

Yos. 22

¹Tonyarau nai Yosua ekabila a Ruben ka ŋolo a Gad ta atutubet apei ŋina a ekabila a Manase,

²tolimok ikes tema, “Idaut iyes akiwuap ŋakiro daadaŋ ŋuna abu Moses eketiyan a Ekapolon ikicik iyes ka iwuapa iyes ŋuna daadaŋ abu ayoŋ ekecik iyes akitiya.

³Ŋirwa ŋulu alalak, akitodol tokona, nyeŋero iyes ŋikaitotoi kus, nai idaut akitiya etic ŋolo ikiinakinit Ekapolon ŋolo erae Akuj kus iyes akitiya.

⁴Aŋuna nai tokona, adaunia Ekapolon ŋolo erae Akuj kus akisieŋar ŋikaitotoi kus ejie lopite ŋolo eikinitor iŋes ikes, toboŋosi nai tokona nakwap kus ŋina abu Moses eketiyan a Ekapolon ikiinaki iyes alo Kide, alokekwaye Yorodan.

⁵Nai kiwuapa ejok ŋakiciketa ka Ŋikisila lu ŋulu abu Moses eketiyan a Ekapolon ikicik iyes akiwuap: Amina Ekapolon Akuj kus, akitiya daadaŋ ŋuna ecamit iŋes, akiwuapit ŋakiciketa keŋ, arubakinit iminasi iŋes ka akitiya etic keŋ a ŋitai kus a daadaŋ ka anakiyar kus a daadaŋ.”

⁶Abu nai Yosua kiterereŋ ikes, ido kitoboŋo lorerya kec.

⁷Nai atutubet apei ŋina a ekabila a Manase ŋina sek keris Moses keinaki akwap ŋina eruwor ŋina kec alo Bacan ka atutubet ŋinace ŋina abu Yosua inak akwap aneni a Ŋisirael a ŋuluce alo To Yorodan, abu Yosua apaki ŋina etoboŋorya ikes lorerya kec ka ŋina eterereŋio ikes,

⁸tolimok ikes tema, “Toboŋosi lorerya kus, yaasi abaru ŋina alalan, ŋaatuk ŋuna alalak, esilipa, egolid, eburonis ka ŋasuwa ta ŋilowi ŋulu alalak; tokorakis ŋiyeneta kus daŋ ŋiboro ŋul ŋulu iŋatunete iyes alomoe kus.”

⁹Apotu nai ŋituŋa a ekabila a Ruben ka ŋulu a Gad ta ŋulu a atutubet a apei a ŋina a Manase torotokis aneni a Ŋisirael a ŋuluce alo Silo, alotaun a ŋolo ayai Kanaan, toboŋosi nakwap a Gilead ŋina ainakinio ikes ikwaŋina ecikitor Ekapolon Moses.

¹⁰Ani edolunete ŋituŋa a ekabila a Ruben ka ŋulu a Gad ta ŋulu a atutubet a apei a ŋina a Manase diyete Yorodan toriŋa eya nakwap a Kanaan, apotu todukokis nen Namuroet ŋina apolon nooi.

¹¹Ani iirarete Ŋisirael ŋuluce atemar adukokis ŋikabilae a Ruben ka Gad Namuroet lomukura a Kanaan neni enyaritae Gelilos alodiyete Yorodan, alowae a ŋolo ka akwap a Ŋisirael,

¹²apotu Ŋisirael daadaŋ tocunakinos Silo alosit ejie ka ikes.

¹³Aŋun, apotu Ŋisirael kiyakiyasi Pineas lokoku a Eleasar a esacaradoti alosit nakwap a Gilead neni a ŋituŋa a ekabila a Ruben ka ŋulu a Gad ta ŋulu a atutubet a apei a ŋina a Manase.

¹⁴Kiyakiyarae iŋes ka ŋikarikok ŋitomon, epei a ŋolokabila a Ŋisirael. Arae daŋ ŋikarikok ŋul ŋulu apolokinito ŋatekerin a Ŋisirael.

¹⁵Ani edolete ikes Gilead neni a ŋituŋa a ekabila a Ruben ka ŋulu a Gad ta ŋulu a atutubet a apei a ŋina a Manase, temasi,

¹⁶“Ikiŋisito iyes ŋituŋa daadaŋ ŋulu a Ekapolon ebe, ‘Anukiro aronok nu ŋuna itiyata iyes neni ka Akuj a Ŋisirael, ŋuna iŋeryoto akiwuapit Ekapolon, anerae iduko aŋuna kus Namuroet erae ŋinaŋeryet Ekapolon?

¹⁷Pa mono arono nooi aneni yok asecit a Peor a? Akitodol akoloŋit na, eriŋa iwon nyitaleuno make anasecit a ŋin; tari daŋ ŋina abunio edeke bu lotuŋa ŋulu a Ekapolon.

¹⁸Iŋero mono kire tokona iyes Ekapolon a? Ani kiŋerito iyes Ekapolon nakoloŋit na, eŋoikini Ekapolon Ŋisirael daadaŋ moi taparacu.

¹⁹Ani kitamete iyes atemar nyejok akwap kus iyes akilipya, towotutu nakwap ŋina ke Ekapolon ekekwalo Yorodan, nakwap ŋina eyai Eema ŋolo ilipere neni ke Ekapolon, ido omora ka isua akwap kosi. Nai, nyiŋero Ekapolon, kori isua anakiduk Namuroet aŋuna kus toyai bo sek ŋina ke Ekapolon Akuj yok.

²⁰Ani mono apaki ŋina asecia Akani lokoku a Sera ŋolo abu kinunaa ŋiboro ŋulu alimunit Ekapolon atemar emaikina tomunaarae, pa mono abu anyunyura a Ekapolon bu neni a Ŋisirael daadaŋ a? Nabo meere Akani bon abu totwan apaki ŋin aŋuna ka asecit keŋ.’”

²¹Apotu nai ŋituŋa a ekabila a Ruben ka ŋulu a Gad ta ŋulu a atutubet a apei a ŋina a Manase toboŋokis ŋikarikok a ŋatekerin a Ŋisirael ŋul temasi,

²²“Akuj ŋina Etiron, Ekapolon! Akuj ŋina Etiron, Ekapolon! Iŋes bon eyeni ŋuna ikiinakis isua akitiya nu ka emaikina Ŋisirael daŋ toyenut ŋunapei ŋun. Ani kikiŋerit isua Ekapolon, kimyekinitae akiwuap ŋakiro keŋ, tomunyarae isua nakoloŋit na!

²³Ani kedukitoe isua Namuroet aŋuna kosi aŋeryo Ekapolon, kori aŋuna ka ainanakin Namuroet ŋin ŋainakineta ŋuna epeyo ka ŋuna a ŋikinyom, kori aŋuna ka ainanakin ŋamuronisya ŋuna ke ekisil, kimyekisi Ekapolon elope ikisican isua.

²⁴Mam! Ikipotu isua etiyata ŋun anakuryanu otamakisi atemar acepaki epote manan ŋiletok kus atemar neni a ŋiletok kosi mam ŋakiro emaikina iyes kitiyata neni a Ekapolon Akuj ŋina a Ŋisirael.

²⁵Adau Ekapolon akituruwor aŋolol Yorodan ekukoru kosi ka iyes ŋituŋa a Ruben ka ŋulu a Gad. Nyiraakasi iyes ŋituŋa ŋulu ke Ekapolon. Aŋun, epedorete manan ŋiletok kus akiteesikin ŋiletok kosi akerit Ekapolon.

²⁶Ŋakiro ŋun iŋes ikiponia isua otemasi, ‘Odukokisi Namuroet aŋuna yok a ŋilopeyek, meere neni einanakinere ŋainakineta ŋuna epeyo, kori ŋamuronisya.’

²⁷Nai erae iŋes esuuda kosi ka iyes ka ŋolo a ŋiletok yok, esuuda ŋolo itoodiuni atemar erubakinio isua ilipyo neni ke Ekapolon anakibois a ŋina Asegan a na ka erubakinio einanakinio ŋainakineta ŋuna epeyo, ŋamuronisya ka ŋainakineta ŋuna ke ekisil; ikotere nai manan nyetemasi ŋiletok kus neni a ŋiletok kosi, ‘Nyiraakasi iyes ŋituŋa ŋulu ke Ekapolon.’ Ani ketemasi ikes nen neni a ŋiletok kosi, eboŋokinete ikes etemarete, kiŋolikisi etorube lo ŋolo a Namuroet a ŋina

²⁸aponi isua totamakinae ebe, ‘Ani ketemasi ikes nen neni a ŋiletok kosi, eboŋokinete ikes atemar kiŋolikisi etorube lo ŋolo a Namuroet a ŋina ikwaan ka ŋina ke Ekapolon. Arae atapapaa kosi apotu todukokis Namuroet ŋin meere aŋuna a ŋainakineta a ŋuna epeyo, kori a ŋamuronisya nai erae esuuda kosi ka iyes.’

²⁹Nyikiryama ca ka akitepeg Ekapolon ka akiŋer nakoloŋit na akiwuapit ŋakiro keŋ, ido odukokisi Namuroet aŋuna a ŋainakineta a ŋuna epeyo ka ŋainakineta ŋuna a ŋikinyom, kori aŋuna a ŋamuronisya. Nyecamitae isua akiduk Namuroet ace, toyai bo sek ŋina ke Ekapolon Akuj kosi, Namuroet ŋina eyai kiŋaren tooma Eema keŋ.”

³⁰Ani iirarete Pineas ŋolo arae esacaradoti ka ŋikarikok a Ŋisirael ŋulu aponito a natekerin a Ŋisirael ŋakiro ŋuna alimunete ŋituŋa a Ruben ka ŋulu a Gad ta ŋulu ka atutubet a apei a ŋina Manase, apotu tolakaros.

³¹Tolimok nai Pineas lokoku ka Eleasar ŋolo arae esacaradoti ŋituŋa a Ruben ka ŋulu a Gad ta ŋulu ka atutubet a a apei a ŋina a Manase tema, “Ikiyenu iwon nakoloŋit na atemar ikirukit iwon ka Ekapolon, anerae nyeŋero iyes akiwuapit ŋakiro ke Ekapolon anakiduk Namuroet na. Idaut tokona iyes aiun Ŋisirael, ido nyisicani Ekapolon ŋituŋa yok.”

³²Toboŋosi nai Pineas lokoku ka Eleasar ŋolo arae esacaradoti ka ŋikarikok ŋul Kanaan, kimyekis alo Gilead ŋituŋa a Ruben ka ŋulu Gad ta ŋulu ka atutubet a apei a ŋina a Manase. Toloto ikes neni a Ŋisirael, tolimokis ŋakiro daadaŋ.

³³Apotu Ŋisirael tolakaros iirarete ŋakiro ŋun daadaŋ, ido apotu kipuro Akuj, tojoŋoto akirworo ŋuna ka alosit ejie ka akinyasun akwap ŋina alomito ŋituŋa a Ruben ka ŋulu a Gad.

³⁴Tolimokis ŋituŋa a Ruben ka ŋulu a Gad Namuroet ŋin ekiro ŋolo abala “Erae na esuuda kosi ŋolo itoodiunit atemar Ekapolon iŋes erae Akuj.”