Read ngakarimojong Yos. 23 Bible Online

Yos. 23 - ngakarimojong bible

Yos. 23

¹Ekaku kelunyar apaki ŋina aoyan, kedau Ekapolon akisieŋun Ŋisirael alomoe kec alowaetin a akwap kec a daadaŋ, toris daŋ Yosua kemojoŋ nooi,

²abu Yosua tonyara Ŋisirael daadaŋ: Ŋikasikou, ŋikarikok, ŋikatubok ŋakiro ka ŋikapolok. Tolimok ikes tema, “Amojoŋ ayoŋ nooi,

³idaut iyes akiŋolikin ŋakiro daadaŋ ŋuna abu Ekapolon ŋolo erae Akuj kus kitiya lotuŋa a ŋakwapin aŋuna kus; arae Ekapolon ŋolo erae Akuj kus abu toji aŋuna kus.

⁴Kiirasi adau ayoŋ akorakin lokabilae kus akwap na daadaŋ ameun alo Kide anaŋolol Yorodan tari To nanam Mediteranian. Adau ayoŋ akorakin iyes ŋakwapin a ŋituŋa a daadaŋ a ŋulu aponi iwon kilounae ka ŋina a ŋulu eriŋa nyilouna.

⁵Ekapolon ŋolo erae Akuj kus iŋes ebwaŋi ŋituŋa a ŋakwapin a ŋun aneni kus, iritari ikes aneni itorete iyes apaki ŋina ilosyoto akirem ikes, ido nai kikamasi iyes ŋakwapin kec toruwor ŋuna kus lopite ŋolo ikiikinitor iyes Ekapolon ŋolo erae Akuj kus.

⁶Aŋun, totitiny iyes anakiwuapit ŋakiro daadaŋ ŋuna igiritae lokitaabo ŋolo a Ŋikisila a Moses, kiwuapa ŋakiro ŋun ikotere nyigetakis, kitiyata ŋuna nyeriyan;

⁷nyirukito ka ŋituŋa lu ŋulu idoŋito nakwapin ŋuna iboiyoto iyes, nyinyarito ŋirorwa a ŋakujo kec, kori nyikoŋo ilimito ŋirorwa a ŋakujo kec, kori nyitiyata ediotic aŋuna a ŋakujo a ŋun, kori nyilipete neni kec.

⁸Nai kikinyoma Ekapolon ŋolo erae Akuj kus lopite ŋolopei sek iponiata kikinyometa akitodol tari tokona.

⁹Adau Ekapolon akiloun aŋuna kus ŋakwapin ŋuna agogoŋok ka ŋuna arwok. Akitodol nakoloŋit na, mam ituŋanan apedo akiloun iyes.

¹⁰Abu epei alokidiŋ kus kirit ŋimoe aliput, anerae abu Ekapolon ŋolo erae Akuj kus toji aŋuna kus lopite ŋolo eikinitor.

¹¹Aŋun nai, torubakisi iminasi Ekapolon Akuj kus nooi, anerae namina iŋes iyareta iyes.

¹²Ani kiŋero iyes Ekapolon toruko ka ŋipiya ŋulu a ŋituŋa a ŋakwapin, ŋipiya ŋulu idoŋito nakiboisyo ŋuna iboiyoto iyes ka ani kiitakinosi iyes ka ikes,

¹³toyenete kire atemar nyerubakini Ekapolon kus iloununui ŋituŋa a ŋakwapin a ŋun alokiŋaren kus; nai ikokinete ikes eroko aneni kus auno ŋina elokitae, kori akipany ka ikokinete ikes epipil neni ikiramya ituŋanan ka adaset kaku, kori ikokinete ikes epipil aneni kus ŋikukwa ŋulu ebucakin akirem akoŋu. Erubakinete ŋun itiyasi akitodol ŋina idaunotor iyes anakwap a ŋina ajokan a na a ŋina adau Ekapolon ŋolo erae Akuj kus ainakin iyes.

¹⁴“Adol tokona ayoŋ aekar lore apolon neni eloseneneete ŋituŋa daadaŋ. Iyenete iyes a ŋitai kus a daadaŋ ka anakiyar kus a daadaŋ atemar ŋakiro ŋuna ajokak daadaŋ ŋuna abu Ekapolon ŋolo erae Akuj kus ikiik iyes, mam apei daŋ ŋina nyisiyookino. Esiyookin ŋakiro daadaŋ ŋuna ikiikinitae, mam apei daŋ ŋina nyisiyookino.

¹⁵Nai lopite ŋolopei eyookinotor aneni kus ŋakiro daadaŋ ŋuna ajokak, ŋuna ikiikinit iyes Ekapolon ŋolo erae Akuj kus, lopite ŋolopei, eyauni Ekapolon neni kus ŋakiro ŋuna aronok daadaŋ, ŋuna adau iŋes alimokin iyes, itiyakini Ekapolon ŋun neni kus akitodol ŋina ikimunyarya iyes anakwap a na a ŋina ajokan, a ŋina adau iŋes ainakin iyes.

¹⁶Ani kiŋero iyes Acamunet ŋina a Ekapolon a ŋolo erae Akuj kus, Acamunet ŋina adau iŋes alimokin iyes akiwuap, kori kitiyanakis iyes ŋakujo ŋace, toryediko kilipa neni kec, ikiŋoikini nai iyes Ekapolon, itomunya iyes anakwap a na a ŋina ajokan a ŋina adau iŋes ainakin iyes.”